عاسىر جاساعان قاريا

قاڭتار ايىنىڭ ءبىرىنشى كۇنى العاباس اۋىلدىق وكرۋگىنىڭ تۇرعىنى راحيما ەسەنعاليەۆا 100 جاسقا تولدى. كەيۋانانى عا­سىرلىق تويىمەن قۇتتىقتاي بارعان اۋدان اكىمى ابات شى­نىبەكوۆ قۋانىش يەسىنە قۇرمەتىن كورسەتىپ, يىعىنا قامزول-شارقاتىن جاپتى. اۋداندىق ارداگەرلەر كەڭەسىنىڭ توراعاسى انۋاربەك عالىموۆ, العاباس اۋىلدىق وكرۋگىنىڭ اكىمى وركەن امەنوۆ تە اۋدان باسشىسىمەن بىرگە لەبىزدەرىن ءبىلدىردى. راحيما ەسەنعاليەۆا 1917 جىلى جاڭاقالا اۋدانىنىڭ قازىرگى جاڭاقازان اۋىلىندا دۇنيەگە كەلگەن. 1924 جىلى مەكتەپكە بارىپ, 4 سىنىپتىق ءبىلىم العان. راحيمانىڭ تاعدىرى ءاپ دەگەننەن وڭاي بولمادى. اشتىقتى, جوقشىلىقتى كوردى. 12 جاسىنان باستاپ ەر ادامنىڭ جۇمىسىن جاسادى. 30-جىلداردىڭ الاساپىرانىندا قالعان راحيماعا باسقا امال دا بولعان جوق ەدى. ول ەگىن سالدى, شابىندىققا شالعى سىلتەدى, شومەلە ءۇيدى. ساۋىنشى بولدى, مالشىلارعا كومەكشى بولدى. سوعىستاعى جاۋىنگەر ازاماتتارعا قولعاپ توقىعان دا – وسى راحيما. راحيما اجە 1934 جىلى يسات ەسەنعاليەۆ دەگەن ازاماتپەن تۇر­مىس قۇردى. ەكەۋى التى بىردەي پەر­زەنتتى تاربيەلەپ, ءوسىردى. كسرو مينيسترلەر كەڭە­سىنىڭ 1947 جىلعى 3 ماۋسى­مىن­داعى قاۋ­­لىسىنا سايكەس كا­پۋس­تين يار راكە­تالىق پوليگونى قۇ­رىلدى. 1952 جىلى كەڭەستىك وز­بىر­لىق­تىڭ كەسىرى نارىنعا مىق­تاپ تۇرىپ ءتيدى. ەل توز-توز بولىپ, باسى اۋعان جاققا كۇش­تەپ كو­شىرىلدى. «مىل­تىق اتاتىنداردىڭ كەسى­رى­نەن ەلدەن كوشتىك!» دەيتىنى وسى عوي اجەيدىڭ. – ءبىزدى اسكەري كولىكپەن كو­شىردى. استىنا سابان توسەلگەن كولىكتىڭ اياداي بورتىنا ءدۇ­نيە­سىمەن, مۇلكىمەن بىرگە 4-5 وتباسى ءبىر تيەلەدى. جاڭاقازاننان اقىراپقا سولاي كەلدىك. بىرەر ايدان كەيىن مالىمىز كەلدى, – دەيدى اجە وتكەندى ەسكە الىپ. ءسويتىپ ەسەنعاليەۆتەر 1952 جىلى جاڭاقازان اۋىلىنان جىمپيتى اۋدانىنىڭ اقراپ اۋىلىنا (قازىرگى ساسىقكول ەلدى مەكەنى) كوشىپ كەلدى. اجەمىز 1967 جىلعا دەيىن ساۋىنشى بولىپ ەڭبەك ەتتى. سول جىلى زەينەت­كەرلىككە شىقتى. ول وسى ۋاقىتقا دەيىن ون ءۇش نەمەرە, جيىرما ءۇش جيەن, ەكى شوبەرە ءسۇيىپ وتىر. قازىر اۋىلدا ۇلى جەكسەنعالي, قىزى قاليمامەن بىرگە تۇرادى. ءالى تىڭ. گازەت وقيدى, ءتىپتى ينە ساباقتايدى. اڭگىمەشىل. بوس ءسوز ەمەس, دۇرىس اڭگىمە ايتادى. – باقىتقا جەتۋ ءۇشىن ادامعا كوپ ەشتەڭەنىڭ كەرەگى جوق. تەك ارمانىنان اينىماسا بولدى. ءبىر بايقايتىنىم, قازىرگى ۇر­پاق­تا تاسقىندىق كوپ. ىسى­راپ كوپ. بۇرىن­دارى بىرنەشە وتباسى ءبىر داس­تار­حانعا سياتىن-دى. قازىر ءبىر وتباسى ءبىر ۇيگە سىي­مايدى. بەرەكە دەگەن نازىك نارسە. سوعان مۇقيات بولىڭ­دار, اي­نالايىندار! – دەيدى راحيما اجە. باۋىرجان شيرمەدين ۇلى باتىس قازاقستان وبلىسى, سىرىم اۋدانى