«شاتقال» وپەراتسياسى

مۇنىڭ كينورەجيسسەر لەونيد گايدايدىڭ اتاقتى «وپەراتسيا «ى»-سىنا ەش قاتىسى جوق. بىراق, ومىرگە كەرەك. شىمكەنتتىڭ حالقى جىل سايىن ءوسىپ كەلەدى. كورشىلەس اۋدانداردان ەلدى مەكەندەر دە قوسىلدى. بىراق, جازدىڭ اپتاپ كۇندەرىندە, اۋە اينالىپ جەرگە تۇسكەن ىستىقتا جان قورعالار ساياباقتار از. ادامدار ىستىق كۇن تاباعا سالىپ قۋىرعاندا قالادان بەزىپ كەتە جازدايدى. وسىنىڭ ءبارىن وي ەلەگىنەن وتكىزگەن وبلىس باسشىسى جانسەيىت تۇيمەباەۆ بوس جاتقان شاتقالداردى ساياباققا اينالدىرۋدى ۇسىندى. ال, ول قالادا كوپ. بۇرىنعى قۇرعاپ قالعان سۋ ارنالارىنىڭ ورنىنان بولەك, تابيعاتتىڭ ءوزى قيىستىرعان, تابانىنا تۇسسەڭ قىستا ىق, جازدا سايا بولارلىقتاي شاتقالدار باس يە جوق, ەلەۋسىز جاتقان. سول ءۇشىن «شاتقال» دەگەن باعدارلاما قابىلداندى. «شاتقالداردى» جاقسى دەمالىس ورىندارىنا اينالدىرۋ ماسەلەسىنە باسشىلىق جاساۋ ءۇشىن وبلىس اكىمى ءوزىنىڭ ورىنباسارلارىنا پىشاق ۇستىنەن ءبولىپ بەردى. بۇگىندە ولار ءوزارا جارىسقا ءتۇسىپ تە كەتتى. قاڭتاردىڭ العاشقى اپتاسىنان باستالعان بۇل جۇمىستىڭ جاقسى نىشانى ءاز ناۋرىز مەرەكەسىن تويلاۋ كەزىنە دەيىن جالعاسپاق. ول ءۇشىن شاتقال تابانى تەگىستەلىپ, جان-جاعىنان سۋاعارلار جاسالادى, ورتاعا تروتۋار سالىنادى. ءتۇرلى كوشەتتەر ەگىلىپ, گۇلزارلار ىسكە قوسىلادى. تۇنگى جارىق تارتىلادى. قالادا قوعام جانە مەملەكەت قاي­راتكەرى اسانباي اسقاروۆ اتىنداعى دەن­دروساياباق بار. اقساقال شەتەلگە شىق­قاندا ءتۇرلى تروپيكالىق كوشەتتەردى دە اكەلدىرگەن ەكەن. مىڭ ءتۇرلى داراعى بار, الۋان قۇستاردىڭ تۇراقتى مەكەنىنە اينالعان دەندروساياباققا كىرسەڭىز, حوش يىستەن كوكىرەك سارايىڭىز اشىلىپ قويا بەرەدى. وسى دەندروباق ءاۋ باسىندا قوقىس الاڭى بولعان ەكەن. ىسكەر باسشىنىڭ ارقاسىندا ەرتەگىدەي مەكەنگە اينالدى. ونىڭ ۇستىنە بۇگىندە ساياباق سالارلىقتاي قالادان بوس جەر جوق. سوندىقتان قالا حالقى وبلىس باس­شى­سىنىڭ «شاتقال» باعدارلاما­سى­نان جاقسىلىق كۇتىپ وتىر. يگىلىكتەر ەڭ الدىمەن ادامدار ءۇشىن جاسالۋى كەرەك قوي. باقتيار تايجان, «ەگەمەن قازاقستان» وڭتۇستىك قازاقستان وبلىسى