استانادا دۇنيەجۇزىلىك وپەرا كونكۋرسى وتەدى

ۇلى وپەرا ءانشىسى ءارى ديريجەر پلاسيدو دومينگو نەگىزىن قالاعان ۆوكالشىلاردىڭ دۇنيە جۇزىندەگى ەڭ بەدەلدى «وپەراليا» بايقاۋى قازاقستاندا العاش رەت وتەدى, دەپ حابارلايدى «استانا وپەرا» تەاترىنىڭ ءباسپاسوز قىزمەتى. جيىرما بەسىنشى رەت ۇيىمداستىرىلعالى وتىرعان وپەرا ونەرىنىڭ دۇنيەجۇزىلىك كونكۋرسى  قر مادەنيەت جانە سپورت مينيسترلىگى قولداۋىمەن 2017 جىلدىڭ 24 - 29 شىلدەسى ارالىعىندا «استانا وپەرا» ساحناسىندا وتكىزىلەدى. «استانا وپەرا» تەاترىنىڭ ونەر ۇجىمى «ەكسپو-2017» كورمەسىنە وراي, ەستە قالارلىق كەرەمەت شارالار باعدارلاماسىن ازىرلەدى. سولاردىڭ قاتارىندا «وپەراليا» دا بار. ماەسترو دومينگونىڭ الەمدىك وپەرا ونەرىنە قوسقان ۇلەسىنە باعا جەتپەيدى. مۇنداي دەڭگەيدەگى تۇلعامەن بىرگە جۇمىس ىستەۋ- ءبىز ءۇشىن ۇلكەن ماقتانىش, - دەيدى «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ. «وپەراليا» بايقاۋىنا 18 بەن 32 جاس ارالىعىنداعى كەز كەلگەن ءانشى (باس داۋسىنان باستاپ, سوپرانوعا دەيىن) قاتىسا الادى. استاناعا دۇنيەجۇزىنىڭ تۇكپىر-تۇكپىرىنەن 40 جۋىق دارىندى ۆوكالشىلار كەلەدى. الدىن-الا ىرىكتەۋ ەلەكتروندىق ءوتىنىش بويىنشا 2016 جىلدىڭ جەلتوقسانىنان باستاپ, 2017 جىلدىڭ اقپانىنا دەيىن جۇرەدى. بايقاۋ ءۇش كەزەڭنەن تۇرادى جانە ماەسترو دومينگونىڭ «استانا وپەرا» سيمفونيالىق وركەسترىنە جەتەكشىلىك ەتۋىمەن وتەتىن جەڭىمپازداردىڭ گالا كونتسەرتىمەن اياقتالادى. بايقاۋدىڭ تالابىمەن جانە جاڭالىعىمەن وپەراليا سايتىندا تانىسۋعا بولادى.