قىزىلوردا وبلىسىنداعى 9 مادەني ەسكەرتكىش يۋنەسكو-نىڭ الدىن الا تىزىمىنە ەندى

قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ كەزەكتى وتىرىسى وتكەن جىلى قىزىلوردا وبلىسىندا ۇيىمداستىرىلعان بولاتىن. يۋنەسكو-نىڭ دۇنيەجۇزىلىك مۇرالارىنىڭ الدىن الا تىزىمىنە وبلىس اۋماعىنداعى سىعاناق, جانكەنت, كەسكەن-كۇيىك, شىرىك-رابات, ءبابىش-مولا, جەنت, بالاندى قالاشىقتارى, جەتىاسار مادەني ەسكەرتكىشتەرى جانە ساۋىسقاندىق پەتروگليفتەرى ەنگىزىلگەن. بۇل تۋرالى وڭىرلىك اكىمدىكتىڭ ءباسپاسوز قىزمەتى حابارلايدى. سونىمەن قاتار, قىزىلوردا وبلىسىنىڭ تاريحي-مادەني مۇرالارىن قورعاۋ جانە پايدالانۋ جونىندەگى عىلىمي-ادىستەمەلىك كەڭەستىڭ وتىرىسى وتكىزىلىپ, ناتيجەسىندە بيىلعى جىلى ارحەولوگيالىق قازبا جۇمىستارى جۇرگىزىلەتىن وبەكتىلەردىڭ اۋقىمى كەڭەيتىلگەن. وسى جىلى جەنت, سورتوبە, كەردەرى كەسەنەلەرىنە دە قازبا جۇمىستارى جۇرگىزىلەتىن بولدى. بۇگىن وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ مىندەتىن اتقارۋشى ميرا ءابۋوۆا  جىل سوڭىندا مادەنيەت جانە سپورت مينيسترلىگى جانىنداعى ەسكەرتكىشتەرگە مارتەبە بەرۋ جونىندەگى ارنايى كوميسسيا وتىرىسى ۇيىمداستىرىلعانىن ايتىپ ءوتتى. وتىرىستا وبلىستاعى 9 ەسكەرتكىش رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلدى.