مامين ەۋرازيالىق ەكونوميكالىق كوميسسيا كەڭەسىنىڭ وتىرىسىنا قاتىستى

بۇگىن قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين ۆيدەوكونفەرەنتسيا رەجيمىندە ەۋرازيالىق ەكونوميكالىق كوميسسيا كەڭەسىنىڭ كەزەكتى وتىرىسىنا قاتىستى. وتىرىستىڭ كۇن تارتىبىندە 19 ماسەلە قاراستىرىلدى, دەپ حابارلايدى primeminister.kz. تالقىلاۋ قورىتىندىسى بويىنشا قاتىسۋشى ەلدەر ەۋرازيالىق ەكونوميكالىق وداقتاعى (ەاەو) كەدەندىك-تاريفتىك رەتتەۋ, ونەركاسىپ جانە اوك, ەنەرگەتيكا, زياتكەرلىك مەنشىك جانە اقپاراتتاندىرۋ سالاسىنداعى بىرقاتار ماڭىزدى شەشىمدەر قابىلدادى. كوميسسيا كەڭەسىنىڭ وتىرىسى بارىسىندا ەۋرازەق-قا مۇشە مەملەكەتتەردەگى اۋىل شارۋاشىلىعىنا ارنالعان ماشينالار مەن جابدىقتار ءوندىرىسىن جانە ەكسپورتىن دامىتۋ ماسەلەلەرىنە باسا كوڭىل ءبولىندى. اتالعان ماسەلەلەردى ەۋرازيالىق ەكونوميكالىق وداققا مۇشە مەملەكەتتەردىڭ ۇكىمەت باسشىلارىنىڭ قاراۋىنا ەنگىزۋ جوسپارلانعان. بۇدان وزگە, ەۋرازيالىق دامۋ بانكىنىڭ ينتەگراتسيالىق الەۋەتكە يە كووپەراتسيالىق جوبالاردى دامىتۋدى قارجىلاندىرۋى ماسەلەلەرى تالقىلاندى. كەڭەس مۇشەلەرى سايكەس كووپەراتسيالىق جوبالاردى قاراۋ مەن ىرىكتەۋ ءۇشىن جۇمىس توبىن قۇرۋ تۋرالى وكىم قابىلدادى. اتالعان شەشىمدەردى ىسكە اسىرۋ ەۋرازەق-قا مۇشە مەملەكەتتەردىڭ بارلىعىنىڭ جالپى ونەركاسىپتىك دامۋىنا سەپتىگىن تيگىزەدى. بارلىق قاراستىرىلعان ماسەلەلەر بويىنشا ەۋرازيالىق ەكونوميكالىق وداقتىڭ ودان ءارى دامۋىنا باعىتتالعان ءوزارا ءتيىمدى شەشىمدەرگە قول جەتكىزىلدى.