جاڭا باسشى زەينەتاقى قورىن دامىتۋ جوسپارىن ايتتى

«بىرىڭعاي جيناقتاۋشى زەينەتاقى قورى» اق-نىڭ جاڭا باسقارما توراعاسى ءنۇربيبى ناۋرىزباەۆا قوردى دامىتۋعا قاتىستى جوسپارىن ايتتى, دەپ حابارلايدى قازاقپارات. «مەنىڭ جۇمىسىمنىڭ نەگىزگى ءپرينتسيپى - قوردىڭ سالىمشىلارى مەن زەينەتاقى الىپ وتىرعان ادامداردىڭ مۇددەلەرىن قورعاپ, قامقور بولۋ», - دەيدى ول. جاڭا باسشىسىنىڭ ايتۋىنشا, ەڭ الدىمەن بجزق قىزمەتىنىڭ اشىقتىعىنا قول جەتكىزىلەدى. قوردىڭ سالىمشىلارى مەن زەينەتاقى الىپ وتىرعان ادامدارمەن ارادا ءتيىمدى اقپاراتتىق جانە كوممۋنيكاتسيالىق بايلانىس ورناماق. سونىمەن قاتار, قوردىڭ وپەراتسيالىق جانە قارجى-شارۋاشىلىق قىزمەتىنىڭ اشىقتىعىن ارتتىرۋ ءۇشىن اقپاراتتىق جۇمىس جۇرگىزىلەدى دەپ بولجانىپ وتىر. ن.ناۋرىزباەۆانىڭ ايتۋىنشا, ەكىنشى باستى مىندەت - قوردىڭ ىشكى جۇمىسىن جاقسارتۋ, ياعني بجزق ىشىندەگى باقىلاۋ جۇيەسىن كۇشەيتۋ. «ءۇشىنشى باعىت - اكتسيونەرلەرمەن, رەتتەۋشىلەرمەن بىرگە جيناقتاۋشى زەينەتاقى جۇيەسىن رەفورمالاۋ بويىنشا جۇمىستى كۇشەيتۋ كەرەك. ازاماتتاردىڭ وقۋى, ەمدەلۋى, ءۇي الۋى ءۇشىن جيناعىنداعى قارجىسىنىڭ ءبىر بولىگىن الۋعا مۇمكىندىك بەرۋ, سالىمشىعا باسقارۋشى كومپانيانى تاڭداۋعا نەمەسە ءوزىنىڭ زەينەتاقى جيناعىن باسقارۋ ستراتەگياسىن تاڭداۋعا مۇمكىندىك بەرۋ سياقتى  باستامالار تالقىلانادى», - دەپ جالعاستىردى ن.ناۋرىزباەۆا. «وسىلايشا, زەينەتاقى قورىنداعى مەنىڭ نەگىزگى جۇمىسىم - قوردىڭ جۇمىسىن جاقسارتىپ, حالىق سەنىمىن ارتتىرۋ», - دەدى ن.ناۋرىزباەۆا.