سەنات توراعاسى قىتاي ەلشىسىن قابىلدادى

سەنات توراعاسى قاسىم-جومارت توقاەۆ قىتاي حالىق رەسپۋبليكاسىنىڭ قازاقستانداعى ەلشىسى چجان حانحۋەنى ونىڭ ءوتىنىشى بويىنشا قابىلدادى. جوعارعى پالاتانىڭ توراعاسى تاياۋ كۇندەرى قازاقستان مەن قىتايدىڭ اراسىنداعى ديپلوماتيالىق قاتىناستاردىڭ ورناعانىنا 25 جىل تولعانىن اتاپ ءوتتى. قازاقستان پرەزيدەنتى نۇرسۇلتان نازارباەۆ پەن قحر باسشىلارى شيرەك عاسىردا ەكى كورشى مەملەكەتتىڭ ۇزاق مەرزىمدى ستراتەگيالىق ارىپتەستىگىنىڭ سەنىمدى نەگىزىن جاسادى. مەملەكەتتىك شەكارا دەليميتاتسيالاندى جانە دەماركاتسيا جاسالدى, قازاقستان مەن قىتايدىڭ بەلسەندى تۇردە قاتىسۋىمەن ايماقتىق قاۋىپسىزدىك پەن ىنتىماقتاستىقتىڭ جاڭا قاعيداتتىق تۇرعىداعى جۇيەسى قۇرىلدى. ايماقتىق ەكونوميكا ءۇشىن «نۇرلى جول» جاڭا ەكونوميكالىق ساياساتى مەن «ءبىر بەلدەۋ, ءبىر جول» باستاماسىنىڭ ۇيلەسىم تابۋىنىڭ ماڭىزى زور. ق.توقاەۆ ەكى ەلدىڭ بۇۇ قاۋىپسىزدىك كەڭەسىندەگى ءوزارا تىعىز ءىس-قيمىلىنا سەنىم ءبىلدىردى. سەنات توراعاسى ءوزىنىڭ تاياۋداعى قىتايعا ساپارىنىڭ ناتيجەلى بولعانىن, ونىڭ ەكىجاقتى ىنتىماقتاستىقتىڭ ماڭىزدى ماسەلەلەرى جونىندەگى پارلامەنتارالىق ۇنقاتىسۋدى ۇدەتە تۇسۋگە ىقپال ەتكەنىن اتاپ ءوتتى.