زەينەتاقى جيناقتارىن مەرزىمىنەن بۇرىن العا مۇمكىندىك تۋى مۇمكىن

ەگەر ءتيىستى زاڭناماعا وزگەرىستەر ەنگىزىلسە, قازاقستاندىقتار زەينەتاقى جيناقتارىنىڭ ءبىر بولىگىن وقۋعا, ەمدەلۋگە نەمەسە يپوتەكا الۋعا جۇمساي الادى, دەپ حابارلايدى قازاقپارات. «قازىر بۇل ماسەلە (زەينەتاقى جيناقتارىن مەرزىمىنەن بۇرىن شەشىپ الۋ - اگەنتتىك) تالقىلانىپ جاتىر. ۇلتتىق بانك توراعاسى دا بۇل ماسەلە تۋرالى ايتقان, ياعني بۇل الەمدىك تاجىريبە بولعاندىقتان, تالقىلاپ جاتىرمىز. ەگەر بۇل زاڭمەن بەكىتىلسە, زەينەتاقى قورىنىڭ ءبىر بولىگى ەڭ كەرەكتى دۇنيەلەرگە, ەمدەلۋگە, ءبىلىم الۋعا نەمەسە يپوتەكا الۋعا بەرىلەدى. قازىرگى تاڭدا ازاماتتارعا ەڭ قاجەتتى وسى ءۇش باعىت الىنىپ وتىر», - دەدى «بجزق» اق باسقارما توراعاسى ءنۇربيبى ناۋرىزباەۆا. ونىڭ ايتۋىنشا, بۇل باستامالاردى جۇزەگە اسىرۋ ءۇشىن زەينەتاقىمەن قامتۋ تۋرالى زاڭعا وزگەرىستەر ەنگىزۋ كەرەك. الايدا قازىر بۇل ماسەلە تەك تالقىلانىپ جاتىر. سونداي-اق, ن.ناۋرىزباەۆا  بجزق جانىنان قوعامدىق كەڭەس قۇرىلاتىندىعىن ايتتى. ول كەڭەسكە جۋرناليستەر, ساراپشىلار, زەينەتاقى سالىمىن سالىپ وتىرعان ادامدار مەن زەينەتكەرلەر مۇشە بولادى.