قايرات سارىباي ەقىۇ كوميتەتىنە توراعا بولىپ تاعايىندالدى

قازاقستان ەقىۇ ەكونوميكا-ەكولوگيالىق كوميتەتىنە توراعالىق ەتەدى. بۇل تۋرالى قر سىرتقى ىستەر مينيسترلىگىنىڭ ءباسپاسوز قىزمەتى حابارلايدى. 12 قاڭتار كۇنى ەۋرازياداعى قاۋىپسىزدىك جانە ىنتىماقتاستىق ۇيىمى (ەقىۇ) تۇراقتى كەڭەسىنىڭ وتىرىسىندا اۆستريانىڭ سىرتقى ىستەر ءمينيسترى سەباستيان كۋرتس ەقىۇ توراعالىعىن قابىلداپ, ۇيىمدى دامىتۋ تۋرالى جالپى كوزقاراسىن ءبىلدىردى. اۆستريالىق توراعالىق ەقىۇ ءۇشىن قازاقستاننىڭ تۇراقتى وكىلى, قر-نىڭ اۆسترياداعى ەلشىسى قايرات سارىبايدى 2017 جىلى ەقىۇ ەكونوميكالىق-ەكولوگيالىق كوميتەتتىڭ باسشىسى رەتىندە تاعايىندادى. بۇل قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ  ەكونوميكالىق قارىم-قاتىناس, ءتۇرلى ينتەگراتسيالىق بىرلەستىكتەر اراسىنداعى ىنتىماقتاستىقتى دامىتۋ, جاسىل ەكونوميكا مەن ەكولوگيا, ترانسپورتتىق قاۋىپسىزدىك پەن ترانزيت ماسەلەلەرى تۋرالى يدەيالارىن ۇيىم اياسىندا العا تارتۋعا مۇمكىندىك بەرەدى. اتالمىش كوميتەتتەگى قازاقستاننىڭ توراعالىعى  2017 جىلدىڭ 14-16 ماۋسىم ارالىعىندا استاناداعى «ەكسپو-2017» الاڭىندا ەقىۇ ەكونوميكالىق-ەكولوگيالىق فورۋمىن جوعارى دەڭگەيدە وتكىزۋگە مۇمكىندىك بەرەدى.