استانا اكىمى گەرمانيا ەلشىسىمەن كەزدەستى

بۇگىن استانا اكىمى اسەت يسەكەشەۆ گەرمانيا فەدەراتيۆتى رەسپۋبليكاسىنىڭ توتەنشە جانە وكىلەتتى ەلشىسى رولف مافاەلمەن كەزدەستى, دەپ حابارلايدى ەلوردا اكىمدىگى. كەزدەسۋ بارىسىندا ەلوردا باسشىسى گفر ەلشىسىنە وتكەن جىلدىڭ جەلتوقسانىندا بەرلين قالاسىندا بولعان تەراكتىگە بايلانىستى كوڭىل ايتتى. «استانالىقتار بەرليندىك دوستارىنىڭ قايعىسىنا ورتاقتاسادى, ءبىز تەرروريزمنىڭ كەز-كەلگەن قۇبىلىستارىنا ىمىراسىز تۇردە قارسى تۇرۋدى ارقاشان قولدايمىز», - دەدى اسەت يسەكەشەۆ. استانا اكىمى اتاپ كورسەتكەندەي, قازاقستان مەن گەرمانيانى ءداستۇرلى دوستىق جىلى قاتىناستار بايلانىستىرادى. گفر رەسپۋبليكانىڭ الدىنعى قاتارلى ساۋدا ارىپتەستەرىنىڭ قاتارىنا كىرەدى, ال بەرلين استانانىڭ باۋىرلاس قالاسى جانە ارىپتەسى بولىپ تابىلادى. قازاقستان مەن گەرمانيا ەلوردالارىنىڭ اراسىندا ءتۇرلى سالالاردا ءوزارا قىزىعۋشىلىققا نەگىزدەلگەن مازمۇندى ديالوگ دامىپ كەلەدى. استانادا وتەتىن ەكسپو-2017 حالىقارالىق مامانداندىرىلعان كورمەسى قوس تاراپتى بايلانىستىرۋشى ماڭىزدى بۋىنداردىڭ ءبىرى بولماق. گەرمانيا كورمە اۋماعىنان العاشقىلاردىڭ ءبىرى بولىپ پاۆيلون العانداردىڭ قاتارىندا. وسى ورايدا استانا اكىمى تەك كورمەدە عانا ەمەس, بۇكىل قالا اۋماعىندا دا ءتۇرلى شارالار وتكىزۋ مۇمكىندىگىن قاراستىرۋدى ۇسىندى.