گولوۆكين مەن الۆارەستىڭ كوماندالارى كەلىسسوزدەر جۇرگىزىپ جاتىر

گەننادي گولوۆكيننىڭ پروموۋتەرى توم لەففلەردىڭ ايتۋىنشا قازاقستاندىق بوكسشىنىڭ كومانداسى مەكسيكالىق ساۋل «كانەلو» الۆارەسپەن جەكپە-جەك وتكىزۋ جونىندە كەلىسسوزدەر جۇرگىزۋدە. ول ءۇشىن GGG 18 ناۋرىزدا دەننيەل دجەيكوبستى ۇتۋى قاجەت, دەپ حابارلادى vesti.kz. «ازىرگە ەشنارسە شەشىلمەدى, كەلىسسوزدەردى جۇرگىزۋدەمىز. ەگەردە بۇل ءىستى تەزىرەك اياقتايتىن مۇمكىندىك بولسا جاقسى بولار ەدى. بىراق ەڭ ءبىرىنشى گەننادي 18 ناۋرىزدا دەننيدى جەڭۋى ءتيىس. ال كۇتپەگەن جەردەن جەڭىلەر بولسا, بولاشاقتا قانداي جەكپە-جەك ۇيىمداستىرسام دا ەش ماڭىزى جوق. ءبىرىنشى ءوزىنىڭ تيتۋلدارىن ساقتاپ قالۋى قاجەت. قالعانى بولاشاقتىڭ ەنشىسىندە», – دەدى لەففلەر. «Madison Square Garden ارەناسىندا نە بولارىن بولجاپ ءبىلۋ قيىن. ەكەۋى دە جەڭىستەرىنە سەنىمدى. مەنىڭشە, بىرەۋى نوكاۋتپەن جەڭەدى. ال قاجەتتى ناتيجەگە جەتەر بولساق, ۇلكەن جەكپە-جەكتەر ۇيىمداستىرامىز دەپ ۇمىتتەنەمىن», – دەدى گولوۆكيننىڭ پروموۋتەرى. بۇعان دەيىن قازاقستاندىق سپورتشى الۆارەسپەن جۇدىرىقتاسۋ بارىنەن دە ماڭىزدى ەكەنىن مالىمدەگەن. ونىڭ پىكىرىنشە, بۇل ءىستىڭ ورىن الماۋىنا مەكسيكالىقتىڭ پروموۋتەرلەرى كىنالى.