الاۋ كوتەرۋشىلەردىڭ ەسىمدەرى انىقتالدى

ەلىمىزدە الاۋ ەستافەتاسىنا قاتىساتىن 16 قالا ۋنيۆەرسيادا الاۋىن كوتەرۋ قۇرمەتىنە لايىقتى تۇلعالاردىڭ ەسىمىن انىقتادى. سانى مىڭ بولاتىن الاۋ كوتەرۋشىلەردىڭ 70 پايىزىن عىلىم, مادەنيەت جانە سپورت سالاسىندا جەتىستىكتەرگە جەتكەن 17 مەن 28 جاس ارالىعىنداعى ستۋدەنتتەر قۇراپ وتىر. سونىمەن قاتار, ەل سپورتى مەن قوعامدىق ومىرىندە ۇلكەن ەڭبەكتەر اتقارىپ جۇرگەن بەلسەندى ازاماتتار دا الاۋ كوتەرۋ قۇرمەتىنە يە بولدى. ولاردىڭ قاتارىندا گرەك-ريم كۇرەسىنەن 1980 جىلعى وليمپيادا چەمپيونى جاقسىلىق ۇشكەمپىروۆ, بوكستان 2000 جىلعى وليمپيادا چەمپيونى ەرماحان يبرايىموۆ, 1988 جىلعى وليمپيادا ويىندارىنىڭ كۇمىس جۇلدەگەرى, قازاقستان رەسپۋبليكاسىنىڭ ەڭبەك سىڭىرگەن باپكەرى داۋلەت تۇرلىحانوۆ, بوكستان ەكى دۇركىن الەم چەمپيونى نازىم قىزايباي, جۇزۋدەن 2016 جىلعى وليمپيادا چەمپيونى دميتري بالاندين, ءابۋ دابيدە وتكەن دجيۋ-دجيتسۋدان الەم چەمپيونى ءمولدىر مەكەنباەۆا, سونداي-اق, ءتۇرلى جىلدارى قازاقستانعا تالاي جەڭىس سىيلاعان باسقا دا كوپتەگەن سپورتشىلار بار. ەستەرىڭىزگە سالساق, الاۋ كوتە­رۋ­شىلەردى ىرىكتەۋ ءۇش كەزەڭنەن تۇردى. ىرىكتەۋدىڭ ءبىرىنشى كەزەڭى 1 قىركۇيەك كۇنى باستالىپ, رەسپۋبليكامىزدىڭ بارلىق جوعارى وقۋ ورىندارىن قامتىدى. ۋنيۆەرسيتەتتەر ىشكى بايقاۋ قورىتىندىسى بويىنشا ءوز ءوتى­نىمدەرىن قالىپتاستىردى. ەكىن­شى كەزەڭدەگى ىرىكتەۋ بارىسىنا وب­لىستىق ورتالىقتارداعى ەستا­فەتانى وتكىزۋمەن اينالىساتىن ايماقتىق شتابتار قوسىلدى. شتاب­تاردىڭ مىندەتى الاۋ كوتەرۋشىلەردى ىرىكتەۋ بارىسىن باقىلاپ, بايقاۋ كەزىندە بەدەلدى ءارى تارتىمدى دەگەن ۇمىتكەرلەردى وتكىزىپ الماۋعا باعىتتالدى. ەكىنشى كەزەڭدە الدىڭعى ۋني­ۆەرسيادالاردىڭ جەڭىمپازدارىنان, سپورت, عىلىم جانە مادەنيەت سالاسىنداعى جۇلدىزداردان قۇرالعان قاتىسۋشىلار انىقتالدى. ىرىكتەۋدىڭ ءۇشىنشى كەزەڭىندە الاۋ ەستافەتاسىنا قاتىسقىسى كەلگەندەر www.torchrelay.kz ساي­تىنداعى ءوتىنىمدى تولتىرىپ, الاۋ كوتەرۋشى اتاندى. 2017 جىلدىڭ 25 قاڭتارىندا استانادا 28-ءشى دۇنيەجۇزىلىك قىسقى ۋنيۆەرسيادا الاۋى تۇتاتىلماق. بەس كۇن ارالىعىندا ءاربىر وبلىس ورتالىعىندا الاۋدى جاعۋعا ارنالعان سالتاناتتى شارا جانە ەستافەتانىڭ ءوز كەزەڭى وتكىزىلەتىن بولادى. الاۋ ەستافەتاسى وڭىرلەردە وتكىزىلگەننەن كەيىن 16 الاۋ كوتەرۋشى الاۋدى الماتىعا جەتكىزىپ, ۋنيۆەرسيادانىڭ اشىلۋ سالتاناتى كەزىندە ءبىر توستاعانعا بىرىكتىرمەك. ستۋدەنتتىك ويىندار استاناسىندا الاۋدى 100 ادام كوتەرىپ وتەدى. جالپى العاندا, ۋنيۆەرسيادا الاۋى 22 500-دەن استام شاقىرىمعا سوزىلعان جولمەن ءجۇرىپ وتپەك, ونىڭ 200 شاقىرىمىندا الاۋ كو­تە­رۋشىلەر جۇرمەك. ستۋدەنت­تىك ويىنداردىڭ رەسمي اۋەتا­سى­مالداۋشىسى – «ەير استانا» كومپانياسى الاۋدى ايماقتاردان الماتىعا جەتكىزەدى. وسىلايشا, ەستافەتا الاۋى قالعان 22 300 شاقىرىمدى الماتىعا دەيىنگى جولدا وتكىزەدى. ال 29 قاڭتاردا ۋنيۆەرسيادا-2017 ءىس-شاراسىنىڭ رەسمي اشىلۋ سالتاناتى وتەدى. الاۋ ەستافەتاسىنىڭ ايماق­تار­داعى باعدارلاماسىن كەلتىرە كەتسەك, 25 قاڭتاردا استانادا ۋنيۆەرسيادا الاۋى تۇتاتىلعان سوڭ, 26 قاڭتاردا الاۋ وبلىس ور­تا­لىقتارىندا وسكەمەن, پاۆلودار, كوكشە­تاۋ, پەتروپاۆل, قوستاناي جانە قا­را­عاندى قالالارىندا جاعىلادى. ال 27 قاڭتاردا اقتوبە, ورال, اتى­راۋ جانە اق­تاۋ قالالارىندا تۇتاتىلماق. قى­زىل­وردا, شىمكەنت, تاراز, تالدى­قورعان قالالارى 28 قاڭتاردا كەزەك السا, 29 قاڭتاردا الماتىداعى الاۋدى تۇتاتۋ سالتاناتى ءال-فارابي اتىنداعى قازۇۋ-دە وتپەك. ميرا بايبەك, «ەگەمەن قازاقستان» الماتى