سايلاۋشىلار كوتەرگەن ماسەلەلەر زاڭدا كورىنىس تابادى

پارلامەنت ءماجىلىسىنىڭ توراعاسى نۇرلان نىعماتۋلين  جۇمىس ساپارىمەن قوستاناي وبلىسىندا بولدى. ول الدىمەن  «اگروماشحولدينگ» جانە «سارىارقااۆتوپروم» ماشينا جاساۋ زاۋىتتارىنا بارىپ, ولاردىڭ ونىمىمەن تانىستى. سودان كەيىن وسىنداعى ەڭبەك ۇجىمىمەن كەزدەستى. ءماجىلىس باسشىسى الدىمەن قوستانايلىق ماشينا جاساۋشىلاردى قازاقستان تاۋەلسىزدىگىنىڭ 25 جىلدىعىمەن  قۇتتىقتاپ, وسى ۋاقىت ىشىندە ەلىمىز قول جەتكىزگەن تابىستارعا نازار اۋداردى. – ەلباسى نۇرسۇلتان نازار­باەۆ­­تىڭ سارابدال سايا­ساتى­نىڭ ارقاسىندا 25 جىل ىشىندە ەلىمىز الدىمەن وتپەلى ۋاقىت­تىڭ بارلىق قيىندىقتارىن جەڭىپ, زور تابىستارعا جەتتى. قازاقستاندى جاڭا, ىرعاقتى دامۋ جولىنا تۇسكەن ەلگە اينال­دىردى, – دەدى نۇرلان زايرول­لا ۇلى. ءماجىلىس توراعاسى الدىمەن ەلىمىزدىڭ ەكونومي­كالىق قارىشتى دامۋى ونىڭ الەۋمەتتىك ءومىرىنىڭ كوتەرىلگەن­دىگىنەن كورىنەتىنىن تىلگە تيەك ەتتى. ول مىسالدارعا سۇيەنە ءسوي­لەدى. ەلىمىزدەگى الەۋمەتتىك سالاعا جۇمسالعان شىعىندار 25 جىل ىشىندە 26 ميلليون تەڭ­گەدەن 4,8 تريلليون تەڭگەگە دەيىن وسكەن, بۇل ەل بيۋدجەتىنىڭ 46 پايىزىن قۇرايدى. مەملەكەتتىك يندۋستريالىق- يننوۆاتسيالىق باع­دار­لاما اياسىندا ەلىمىزدە ءجۇز­دەگەن كاسىپورىن اشىلدى, سونىڭ ارقاسىندا جىل سايىن 270 مىڭ جۇمىس ورنى قۇرىلدى. زەينەتاقى مەن جاردەماقى ءوستى. اۋىل شارۋاشىلىعىن دامىتۋدىڭ باعدارلامالارى جۇزەگە اسىپ كەلەدى, اۋىلدى كوتەرۋ قولعا الىندى. ەلدىڭ ەكسپورتتىق الەۋەتى ەكونوميكالىق دامۋدىڭ كەپىلى بولدى, بۇگىن 2500 ءتۇرلى ءونىم 119 ەلگە ەكسپورتتالادى. بيزنەستى مەنشىك يەلەرى مەن كاسىپكەرلەر دامىتىپ وتىر. سپيكەر ەل ەكونوميكاسىندا وڭدەۋ ونەركاسىبىنىڭ شيكىزات سەكتورىنىڭ الدىنا شىققانىن ايتتى. اۆتوونەركاسىپ وسىنداي ءوسۋدىڭ ايعاعىنا جانە ەكونوميكا لوكوموتيۆىنە اينالدى. – وڭىرلەردىڭ ينۆەستيتسيا­لىق كليماتى جاقسارىپ كە­لەدى. ماشينا جاساۋ – سونىڭ جار­قىن مىسالى. ين­دۋس­تريالىق ايماقتار قۇرىلدى, وندا اۆ­توبولشەكتەر زاۋىتى سا­لىناتىن بولادى, – دەدى ن.نىع­ماتۋلين ماشينا جاساۋشى­لار الدىندا. راسىندا, قوس­تانايداعى قوس زاۋىت تەك ءوڭىردىڭ عانا ەمەس, جالپى ەلىمىزدىڭ ەكونوميكاسىنا قوماقتى ۇلەس قوسىپ كەلەدى. «سارىارقااۆتوپروم» زاۋىتى بىلتىر 5 مىڭ ماشينانى ساپقا قويدى. ءماجىلىس توراعاسى مۇنان كەيىن دەپۋتاتتاردىڭ زاڭ شى­عارۋ قىزمەتىنە توقتالدى. ول دەپۋتاتتار كۇزگى كانيكۋلدان بەرگى ۋاقىتتىڭ ىشىندە 9 زاڭ قابىلداعانىن, ال ءماجىلىستىڭ جاڭا شاقىرىلىمى جۇمىسىن باستاعان وتكەن جىلدىڭ ناۋ­رىز ايىنان بۇگىنگە دەيىن 51 زاڭ جوباسىن قاراپ, ونىڭ 40 شاقتىسىنا پرەزيدەنت قو­لى قويىلعانىن جەتكىزدى. نۇر­لان زايروللا ۇلى سونىڭ ءىشىن­دە الەۋمەتتىك وزەكتى ماسەلە­لەر – ءمىن­دەتتى الەۋمەتتىك مەدي­تسي­نا­لىق ساقتاندىرۋ تۋرالى, جايىلىم, رەسپۋبليكالىق بيۋدجەت, ەكس­ترەميزم مەن تەرروريزمگە قار­سى كۇرەس, ۆولونتەرلىق قىز­مەت تۋرالى زاڭدارعا توقتالىپ ءوتتى. – مەديتسينالىق ساقتاندىرۋ جارناسىنان ازاماتتاردىڭ 15 ساناتى بوساتىلادى, ولاردىڭ اراسىندا مۇگەدەكتەر, كوپ بالالى انالار, بالالار, زەينەتكەرلەر سەكىلدى الەۋمەتتىك از قورعالعان جاندار بار. مەدي­تسي­نالىق ساقتاندىرۋدىڭ ارقا­سىندا ازاماتتار ءوزىنىڭ وتباسى­لىق بيۋدجەتىنەن ءبىر تيىن شى­عارماي تەكسەرىلىپ, دەنساۋلى­عىن تۇزەيتىن بولادى, – دەدى ءماجىلىس توراعاسى. سونىمەن قا­تار, ن.نىعماتۋلين ەلىمىزدىڭ پار­لامەنت دەپۋتاتتارى قابىلداعان بارلىق زاڭ حالىقتىڭ جاعدايىن جاقسارتا ءتۇسۋ ءۇشىن الەۋمەتتىك رەفورمالارعا باعىتتالعانىن ايتتى. ماشينا جاساۋشىلار ۇجى­مىن­داعى كەزدەسۋدە جۇمىس­شىلار ءماجىلىس توراعاسىنا ءتۇرلى سۇراقتار قويدى. سونىڭ ءىشىن­دە قوستانايلىق ماشينا جاساۋشىلار شىعارعان كولىكتەر ساپاسى تۋرالى ونىڭ پىكىرىن بىلگىسى كەلدى. – پارلامەنت گاراجىنداعى كولىكتەردىڭ 90 پايىزى – قازاق­ستاندىق ءونىم. مەن قوستانايلىق ماشينا جاساۋشىلار شىعارعان ماشينالار ساپاسىن جوعارى باعالايمىن. مۇندا كولىكتەر تەرەڭدەتىلە قۇراستىرىلادى, قازاق­ستاندىق مازمۇندى يگەرگەن, – دەدى پارلامەنت ءماجى­لىسىنىڭ توراعاسى. مۇنان كەيىن ن.نىعماتۋلين قوستاناي ۇن كومبيناتىنا باس سۇعىپ, شىعارعان ونىممەن تانىس­تى. ەكسپورتقا شىعارىلاتىن ۇننىڭ تورتتەن ءبىرى قوستاناي كاسىپورىندارىندا وڭدەلەدى. قوستاناي ۇن كومبيناتى سونىڭ بىرەگەيى دەسەك بولادى. وندا تاۋلىگىنە 350 توننا ۇن تار­تىلىپ, 90 توننا ماكارون بۇيىمدارى وندىرىلەدى. كاسىپ­ورىن ءونىمى وتاندىق نارىق­تى تولتىرۋمەن قاتار, ونى اۋ­عانستان, قىرعىزستان, تۇرىك­مەن­ستان جانە گرۋزيا ساتىپ الادى. ءماجىلىس توراعاسى قان قۇيۋ ورتالىعىنىڭ جۇمىسىمەن تانىسقان سوڭ, ساپارىن قوستا­نايلىق مەديتسينا قىزمەت­كەرلەرىمەن كەزدەسۋمەن اياقتادى. وندا نۇرلان زايروللا ۇلى پارلامەنت ەلباسى تاپسىرمالارىن ورىنداۋعا بەلسەنە قاتىساتىنىن ەرەكشە اتاپ ءوتتى. مارتەبەلى قوناق دارىگەرلەر الدىندا حالىقتى الەۋمەتتىك قورعاۋ ماسەلەلەرىنە ارنايى توقتاپ, 2018 جىلدىڭ باسىنان ومىرگە جولداما الاتىن زاڭ­دارداعى جاڭالىقتار تۋرالى ايتىپ بەردى. توراعانىڭ سوزىنە قاراعاندا, اتاۋلى الەۋمەتتىك كومەكتى كۇنكورىس قورجىنىنىڭ 40-50 پايىزى بولاتىنداي ەتىپ تاعايىنداۋ ەسەبىنەن بىرىڭعاي الەۋمەتتىك اتاۋلى كومەكتى تولەۋ جانە وتباسىنىڭ بارلىق مۇشەلەرىنە جاردەماقى تاعايىنداۋ قايتا قارالادى. سونىمەن قاتار, مۇگەدەكتەر مەن كوپ بالالى انالارعا ارنايى مەملەكەتتىك جاردەماقى تاعايىنداۋ جەڭىلدەتىلەتىن بولادى. زاڭدارداعى باسقا دا جاڭالىقتار ءسوز بولدى. ءماجىلىس توراعاسى تاۋەلسىزدىكتىڭ 25 جىلىندا ەلباسىنىڭ ەلىمىزدەگى ىرعاقتى دامۋدىڭ جانە بەيبىت, تاتۋ-ءتاتتى ءومىردىڭ كەپىلى ەكەندىگىن ايتىپ ءوتتى. ن.نىع­ماتۋلين مەديتسينا قىزمەت­كەر­لەرىن تولعاندىرعان الەۋمەتتىك مەدي­تسينالىق مىندەتتى ساقتان­دىرۋ, جاس مامانداردى دايىنداۋ, بىلىكتىلىكتەرىن ارتتىرۋ جانە اۋىلداعى اۋىز سۋ تۋرالى سۇراقتارىنا جاۋاپ بەردى. ول ءوزىنىڭ ساپار ماڭى­زىنا توقتالا كەلە, سايلاۋشىلار­مەن كەزدەسۋلەر ەلدەگى ەكونومي­كالىق جانە الەۋمەتتىك ماسەلە­لەردى انىعىراق بىلۋگە ىقپال ەتەتىندىگىن ايتتى. سايلاۋ­شىلار قويعان سۇراقتار, ماسەلە­لەردىڭ شەشىمى دەپۋتاتتار قابىل­دايتىن زاڭداردان كورىنىس تاباتىن بولادى. ساپار ماقساتى دا وسى. نۇرلان نىعماتۋليننىڭ ساپارىنا وراي, وبلىس اكىمى ارحيمەد مۇحامبەتوۆ ءوڭىر جۇرتشىلىعىنىڭ اتىنان راحمەت ايتىپ, زاڭ شىعارۋشىلىق قىزمەتتە تابىس تىلەدى. ءنازيرا جارىمبەتوۆا, «ەگەمەن قازاقستان» قوستاناي