الماتى وبلىسىنىڭ تجد ءورت ءسوندىرۋ قىزمەتىنە جاڭا باسشى تاعايىندالدى

الماتى وبلىستىق تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنە جاڭا باسشى تاعايىندالدى. دەپارتامەنت باستىعى, ازاماتتىق قورعاۋ پولكوۆنيگى دارىنبەك ەسالى ۇلى بايساريەۆ الماتى وبلىسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ جاڭادان تاعايىندالعان باستىعىن, ازاماتتىق قورعاۋ پودپولكوۆنيگى راميل تاگيروۆيچ ءبوياروۆتى گارنيزوننىڭ جەكە قۇرامىنا ۇسىندى. ازاماتتىق قورعاۋ پودپولكوۆنيگى ر.ت.بوياروۆ بۇرىن الماتى وبلىسى توتەنشە جاعدايلار دەپارتامەنتىنىڭ تالدىقورعان قالاسىنىڭ توتەنشە جاعدايلار باسقارماسىنىڭ باستىعى بولىپ قىزمەت اتقارعان. بوياروۆ راميل تاگيروۆيچ 1977 جىلى 30 مامىردا شىعىس قازاقستان وبلىسى ماقانشى اۋدانى باقتى اۋىلىندا دۇنيەگە كەلگەن. 1999 جىلى قر ءىىم الماتى جوعارى تەحنيكالىق ۋچيليششەسىن «ءورت قاۋىپسىزدىگى» ماماندىعى بويىنشا, 2002 جىلى قر تجا كوكشەتاۋ تەحنيكالىق ينستيتۋتىن «ءورت قاۋىپسىزدىگى» ماماندىقتارى بويىنشا ءبىلىم العان جانە  2013 جىلى تالدىقورعان قالاسىنىڭ ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.