قالاۋلىلار حالىقپەن كەزدەسۋلەر وتكىزدى

وبلىستا جۇمىس ساپارىمەن جۇرگەن پارلامەنتى ءماجىلىسىنىڭ دەپۋتاتتارى ۆلاديمير بوجكو, باقتىقوجا ىزمۇحامبەتوۆ, قۇرالاي قارەكەن, گلەب ششەگەلسكي, اباي تاسبولاتوۆ ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىندە «ەركىن پىكىر» الاڭىندا جاستار ۇيىمدارى وكىلدەرىمەن كەزدەستى. وبلىس اكىمىنىڭ ورىنباسارى اسقار شەريازدانوۆ دەپۋتاتتاردى جەكە-جەكە تانىستىرا كەلىپ, ولاردىڭ وبلىستىڭ بىرقاتار ونەركاسىپ كاسىپورىندارى مەن اۋىل شارۋاشىلىعى قۇرىلىمدارىندا, بىرقاتار اۋدانداردا بولىپ, جۇمىسشى­لار­مەن جانە تۇرعىندارمەن كەزدەسكەنىن جەتكىزدى. جاستارمەن جۇزدەسۋدە ءسوز العان پارلا­مەنت ءماجىلىسى توراعاسىنىڭ ورىن­باسارى ۆلاديمير بوجكو دەپۋتاتتار­دىڭ وبلىس ورتالىعىندا جانە اۋداندار­دا كوپ­تە­گەن كەزدەسۋلەر وتكىزىپ, ەلبا­سى جۇرگىزىپ وتىرعان ساياساتتى, «100 ناقتى قادام» ۇلت جوسپارىندا ايقىندالعان تاپسىرمالاردىڭ ورىندالۋ بارىسىن تۇسىندىرگەنىن تىلگە تيەك ەتتى. كاسىپورىنداردا, ەڭبەك ۇجىمدارىندا جانە وقۋ ورىندارىندا بولعان كەزدەسۋ­لەرگە قاتىسۋشىلاردىڭ كەيبىر ۇتىمدى ۇسىنىستارى پارلامەنتتەگى جۇمىستا باسشىلىققا الىناتىنىن ايتتى. ءماجىلىس دەپۋتاتتارى جاستاردىڭ ازا­مات­تاردى ۋاقىتشا تىركەۋ, جوعارى وقۋ ورىن­دارىندا قازاق تىلىندەگى تەحنيكالىق وقۋلىق­تاردىڭ جەتىسپەۋشىلىگى, از قامتىل­عان وتباسىلارىنان شىققان جانە بەل­سەندى جاستارعا قارجى گرانتتارىن ءبولۋ سەكىلدى ماسەلەلەرگە قاتىستى جانە باسقا ساۋال­دارىنا تولىققاندى جاۋاپ بەردى. ساتىبالدى ءساۋىرباي, «ەگەمەن قازاقستان» اقتوبە وبلىسى *** پارلامەنت سەناتىنىڭ دەپۋتاتتارى قايرات يششانوۆ پەن سارسەنباي ەڭسەگەنوۆ اتىراۋ وبلىسىندا ءوڭىر باسشىسى نۇرلان نوعاەۆپەن كەزدەسىپ, وندا ايماقتىڭ الەۋمەتتىك-ەكونوميكالىق دامۋ كەلەشەگى تالقىلاندى. ق.يششانوۆ بەكىرە تۇقىمداس بالىق ءوسى­رە­تىن زاۋىتتا جانە توقىما ونىمدەرىن شى­عاراتىن «كاسپي لانا اتىراۋ» كاسىپ­ورنىندا بولىپ, ەڭبەك ۇجىمدارىمەن كەزدەستى. ال س.ەڭسەگەنوۆ يساتاي جانە جىلىوي اۋداندارىندا جەرگىلىكتى ءماسليحات دەپۋتاتتارىمەن, اكىمدىك قىزمەتكەرلەرىمەن, قۇقىق قورعاۋ جانە بۇقارالىق اقپارات قۇرالدارىنىڭ وكىلدەرىمەن, شارۋا قوجالىقتارىنىڭ جەتەكشىلەرىمەن جانە جەرگىلىكتى تۇرعىندارمەن كەزدەستى. سەناتورلاردىڭ جۇرتشىلىقپەن ءجۇز­دەسۋ­­ل­ەرىن­دە سەنات قابىلداعان زاڭدار مەن «ءوڭiر» دەپۋ­تاتتىق توبىنىڭ قىزمەتى تۋرالى اي­تىل­دى. سونداي-اق, ەلباسىنىڭ «100 ناقتى قادام» ۇلت جوسپارىن ىسكە اسىرۋ, رەس­پۋب­لي­كا­ل­ىق بيۋدجەتتىڭ اتقا­رىلۋى مەن كاسىپ­كەر­لىك كودەكسىنە قاتىس­تى ماسەلەلەر دە قامتىل­دى. ازامات­تاردى قابىلداۋعا 5 ادام كەلدى. سەناتورلار كەيىنگى كۇندەردە يندەر, ماقات, ماحامبەت جانە قۇرمانعازى اۋداندارىنا دا بارىپ, ەڭبەك ۇجىم­دارى­مەن كەزدەسۋلەر وتكىزدى.  جولداسبەك شوپەعۇل, «ەگەمەن قازاقستان» اتىراۋ وبلىسى *** سەناتور سەرگەي ەرشوۆ قاراعاندى وبلىسىنداعى قارقارالى اۋدانىندا جۇمىس بابىنداعى ساپارمەن بولدى. قارشىعالى اۋىلدىق وكرۋگىندە دەپۋتات جەرگىلىكتى شارۋا قوجالىقتارىنىڭ جەتەكشىلەرى جانە اۋىل شارۋاشىلىعى ونىمدەرىن وندىرۋشىلەرىمەن كەزدەستى. جۇزدەسۋ بارىسىندا پارلامەنت سەنا­تىندا قارالىپ جاتقان «جايىلىم­دار تۋرالى» جانە «قازاقستان رەسپۋب­ليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنىڭ ەرەجەلەرى تالقىلاندى. جەرگىلىكتى تۇرعىندار جەكە ءۇي-جايدى ۇستاۋ ماقساتىنداعى جايىلىم جەرلەردى, سونداي-اق جايىلىمداردى ءتيىمدى پايدالانۋدىڭ وزەكتى ماسەلەلەرىن زاڭنامالىق تۇرعىدا رەتتەۋگە باسا نازار اۋدارىپ وتىر. شارۋا قوجالىقتارىنىڭ جەتەكشىلەرى مەن اۋىل شارۋاشىلىعى ونىمدەرىن ءوندى­رۋ­شىلەر اگرارلىق جانە ۆەتەريناريا سالا­لارىن رەتتەۋگە بايلانىستى بىرقاتار ماسە­لەلەردى كوتەردى. اۋداندىق ءماسليحات دەپۋتاتتارىمەن كەزدەسۋ بارىسىندا س.ەرشوۆ «100 ناقتى قادام» ۇلت جوسپارىن زاڭنامالىق تۇرعى­دا ىسكە اسىرۋ جونىندەگى پارلامەنت­تىڭ زاڭ شىعارۋ جۇمىستارى تۋرالى ايتىپ بەردى. قايرات ءابىلدينوۆ, «ەگەمەن قازاقستان» قاراعاندى وبلىسى *** سەنات دەپۋتاتتارى راشيت اكىموۆ پەن جابال ەرعاليەۆ وڭىرلەرگە ساپارى بارىسىندا اقمولا وبلىسىنىڭ ەرەيمەنتاۋ اۋدانىندا بولىپ, جەرگىلىكتى ءماسليحات دەپۋتاتتارىمەن, اۋداندىق قوعامدىق كەلىسىم مۇشەلەرىمەن جانە اۋدان اكتيۆىمەن كەزدەستى. ءبىلىم بەرۋ سالاسى مەن ءوندىرىس نىسان­دارىن, بوگەنباي باتىر اتىن­داعى­ تاريحي-ولكەتانۋ مۋزەيىن ارالاپ, مۇعالىم­دەرمەن, مادەنيەت قىزمەتكەر­لەرىمەن, جۇمىسشىلارمەن پىكىر الماستى. اۋداندىق اكىمدىكتىڭ ءماجىلىس زالىندا وتكەن كەزدەسۋدى ەرەيمەنتاۋ اۋدانىنىڭ اكىمى ەرمەك نۇعىمانوۆ اشىپ, ءوڭىردىڭ الەۋمەتتىك-ەكونوميكالىق دامۋى جا­ي­ىن­دا حابارلاما جاسادى. اۋدان اكتيۆى الدىندا سەناتورلار ءسوز سويلەپ, قويىلعان سۇراقتارعا جاۋاپ بەردى. پىكىر الماسۋ بارىسىندا ەرەيمەنتاۋ اۋداندىق ءماس­ليحاتىنىڭ دەپۋتاتى, «حامزە» شارۋا قوجالىعىنىڭ باسشىسى ەرجان بيەكەنوۆ «استانا – پاۆلودار» باعىتىنداعى جولعا قاتىستى ويلارىن ورتاعا سالدى. ەرەيمەنتاۋ قالاسىنداعى «№811 اۆتوموبيل جوندەۋ زاۋىتى» اكتسيونەرلىك قوعامىنىڭ كاسىپورنىندا, وتكەن جىلعى جاڭا وقۋ جىلىندا پايدالانۋعا بەرىلگەن ەرەيمەنتاۋ قالاسىنداعى №4 ورتا مەكتەپتە جانە بوگەنباي باتىر اتىنداعى تاريحي-ولكەتانۋ مۋزەيىندە بولعان راشيت اكىموۆ پەن جابال ەرعاليەۆ جۇمىس­شىلارمەن, ينجەنەر-تەحنيك ماماندارمەن, مۇعالىمدەرمەن جانە مادەنيەت قىزمەتكەرلەرىمەن وي ءبولىستى. قازىر نەگىزىنەن قورعانىس  مينيستر­لىگىنىڭ ءوتىنىم­دەرىن ورىنداپ, اسكەري تەحني­كالاردى جوندەپ, قالپىنا كەلتىرۋ­مەن اينالىساتىن اۆتوموبيل جوندەۋ زاۋى­تىنىڭ باس ديرەكتورى ەرجان كارىموۆ وزدەرىندە كەز كەلگەن تاپسىرىستى ورىن­داۋعا تولىق مۇمكىندىكتەر بار ەكەنىن ايتتى. قازىر زاۋىت 200-گە جۋىق ادامدى جۇمىس ورنىمەن قامتاماسىز ەتىپ وتىر. باقبەرگەن امالبەك, «ەگەمەن قازاقستان» اقمولا وبلىسى *** پارلامەنت سەناتىنىڭ دەپۋتاتى قۋانىش ايتاحانوۆ جۇمىس بابىنداعى ساپارمەن وڭتۇستىك قازاقستان وبلىسىنداعى بىرقاتار اۋدانداردا بولدى. دەپۋتات ساپارى بارىسىندا بايدىبەك, وتىرار, تۇلكىباس جانە تۇركىستان اۋداندارىندا جەرگىلىكتى اتقارۋشى بيلىكتىڭ باسشىلىعىمەن, ءماسليحات دەپۋتاتتارىمەن, جۇرتشىلىقپەن, ورتا جانە شاعىن بيزنەستىڭ, ۇكىمەتتىك ەمەس ۇيىمداردىڭ وكىلدەرىمەن, اۋدان جاستارىمەن كەزدەستى. ق.ايتاحانوۆ ايماقتاعى جەرگىلىكتى تۇر­عىن­دارمەن بولعان جۇزدەسۋلەردە ەل­باسى­نىڭ «100 ناقتى قادام» ۇلت جوس­پارى­­نىڭ ايا­سىن­داعى بەس ينستيتۋتتىق رەفور­مانى ىسكە اسىرۋ بارىسى تۋرالى حابار­دار ەتتى. سەنا­تور سونداي-اق مەملەكەت باسشى­سى­­نىڭ قازاق­ستان تاۋەلسىزدىگىنىڭ 25 جىل­دى­عى­نا ارنالعان سالتاناتتى جينالىستا سويلە­گەن سوزىندە ايتىلعان مىندەتتەرگە جان-جاقتى توقتالا كەلىپ, زاڭ شىعارۋ جۇ­مىس­تارى­نىڭ جوسپارى جانە ونى ىسكە اسىرۋ­داعى پارلامەنتشىلەردىڭ قىزمەتى تۋرالى اڭگىمەلەدى. باقتيار تايجان, «ەگەمەن قازاقستان» وڭتۇستىك قازاقستان وبلىسى *** سەنات دەپۋتاتى ماناپ كوبەنوۆ پاۆلودار وبلىسىندا جۇمىس بابىنداعى ساپارىن ودان ءارى جالعاستىردى. سەناتور جەلەزين اۋدانىندا «پاحار» شارۋا قوجالىعىندا بولدى. كاسىپورىن وكىلدەرى ءوندىرىستى ودان ءارى دامىتۋ جوسپارلارى تۋرالى ايتا كەلىپ, ينفراقۇرىلىم جاعدايىمەن تانىستىردى جانە تۇرعىن ءۇي كەشەنى مەن دەمالىس ورتالىعىن كورسەتتى. جەلەزينكا اۋىلىندا م.كوبەنوۆ اۋداندىق ورتالىق اۋرۋحاناسىنىڭ ەڭبەك ۇجىمىمەن كەزدەستى. دەپۋتات پەرزەنتحانادا, حيرۋرگيا بولىمىندە جانە ەمحانادا بولدى, شالا تۋعان سابيلەرگە ارنالعان جابدىقتارمەن تانىستى. جەلەزين جالپى ءبىلىم بەرەتىن №1 ورتا مەكتەپتىڭ مۇعالىمدەرىمەن كەزدەسۋدە ون ەكى جىلدىق ءبىلىم بەرۋگە, شاعىن جابدىقتالعان مەكتەپتەردىڭ جابىلۋى مەن ارنايى پاندەردى اعىلشىن تىلىندە وقىتۋعا بايلانىستى ماسەلەلەر تالقىلاندى. م.كوبەنوۆتىڭ جەلەزين اۋدانىنداعى ارداگەرلەردىڭ باستاۋىش ۇيىمدارى­نىڭ وكىلدەرىمەن كەزدەسۋىندە زەينەتاقى­نىڭ ءوسۋى مەن شاعىن اۋىلدارداعى سۋ قۇبىرىنىڭ قۇرىلىسىنا بايلانىستى الەۋمەتتىك ماسەلەلەر كوتەرىلدى. فاريدا بىقاي, «ەگەمەن قازاقستان» پاۆلودار وبلىسى *** پارلامەنت ءماجىلىسى دەپۋتاتى سەرىك ۇمبەتوۆ الماتى وبلىسىنا ساپارى اياسىندا ىلە جانە قاراساي اۋداندارىن ارالادى. الدىمەن ىلە اۋدانىنداعى «دانون بەركۋت» ءسۇت زاۋىتىنىڭ جۇمىسىمەن تانىستى. «دامۋ» يندۋستريالىق-لوگيستي­كا­لىق ورتالىعىندا ورنالاسقان ءسۇت زاۋىتى­نىڭ جۇمىسى جايلى «دانون» كومپانيا­سىنىڭ ورتالىق ازيا جانە كاۆكاز ەلدەرى بويىنشا باس ديرەكتورى رەنو شامونال باياندادى. ونىڭ ايتۋىنشا, قازىرگى كەزدە كاسىپورىننىڭ ونىمدەرى قازاق­ستان, قىرعىزستان, وزبەكستان, تۇرىكمەنستان, تاجىكستان, ازەربايجان, گرۋزيا, ارمەنيا, موڭعوليا سىندى توعىز ەلگە شىعارىلادى جانە اتالعان مەملەكەتتەردە تۇراتىن 80 ميل­ليوننان استام تۇتىنۋشىنىڭ سۇرانىسى مەن تالابىنا ساي بولىپ وتىر. سونداي-اق, سەرىك ۇمبەتوۆ «دامۋ» يندۋس­ت­ريال­ىق-لوگيستيكالىق ورتالى­عىنىڭ باس كەڭسە­سىنە دە باس سۇعىپ, «Amanat Invest Group» جشس پرەزيدەنتى ءارى قۇرىلتايشىسى ساكەن تويلىباەۆپەن ورتا­لىق جۇمىسىنىڭ بۇگىنى مەن بولا­شاعى جايلى اڭگىمەلەستى. ساپار اياسىندا «مەجدۋرەچەنسك اگرو» مال شارۋاشىلىعى فەرماسىن ارالادى. مۇنان كەيىن دەپۋتات قاراساي اۋدانى­نا ات باسىن بۇرىپ, «شىنى زاۋىتى» جشس ەڭبەك ۇجى­مى­مەن جۇزدەستى. قىتاي مەن قازاقستاننىڭ ءوزارا ءارىپ­تەستىگى ناتيجە­سىندە بوي كوتەرگەن زاۋىت كەشەنىندە ءوندىرىس­تىك عيماراتتارمەن ءبىر­گە, جۇ­مىس­­شى­لارعا ارنالىپ الەۋمەتتىك-تۇر­مىس­­تىق نىساندار سالىنعانىنا نازار اۋداردى. نۇربول الدىباەۆ, «ەگەمەن قازاقستان» الماتى وبلىسى *** سىرىم اۋدانىنا جۇمىس ساپارىمەن پارلامەنت سەناتىنىڭ دەپۋتاتى ەربولات مۇقاەۆ كەلدى. اۋدان ورتالىعىندا الەۋمەتتىك نىسانداردىڭ جۇمىسىمەن تانىسقان سەناتور «نۇر وتان» پارتياسى سىرىم اۋداندىق فيليالىنىڭ ءماجىلىس زالىندا جەرگىلىكتى كاسىپكەرلەرمەن جۇزدەستى. كەزدەسۋدى جۇرگىزگەن سىرىم اۋدانى­نىڭ اكىمى ابات شىنىبەكوۆ ءوزىنىڭ سوزىندە اۋدانداعى كاسىپكەرلىك سالاسىنىڭ بۇگىنگى باعىت­تارى جايلى باياندادى. ال سىرىم اۋدا­نى­­نىڭ كاسىپكەرلەرى دەپۋتاتتىڭ الدى­نا وزدەرى ءۇشىن وزەكتى بولىپ وتىر­عان ماسە­لە­­لەردى قويدى. ونىڭ بىرەۋى – اۋىل­شارۋا­شى­لىق سالاسىنداعى جايىلىمدىق جەر­لەر­دى پايدالانۋ ماسەلەسى. قازىرگى كۇنى جايى­لىم تارىلدى. تارىلۋدىڭ ءبىر سەبەبى, مال باسىنىڭ وسكەنىندە. وسىعان بايلانىستى الداعى تۇرعان ءبىر جۇمىس – ەلدى مەكەندەردىڭ يەلىگىندەگى جەردى كەڭەيتۋ. كەڭەيتۋ كەيبىر شارۋاشىلىقتاردىڭ پايداسىنداعى جەرلەر ارقىلى دا جۇزەگە اسىرىلۋى مۇمكىن. اۋىل شارۋاشىلىعىمەن اينالىساتىن اۋدان شارۋالارى مەملەكەتتىك باعدارلا­ما­لار ارقىلى نەسيە العانى ءۇشىن تولەنە­تىن مەملەكەتتىك سۋبسيديا نەلىكتەن توقتاپ تۇر دەگەن ساۋال قويىلدى. بۇل ساۋال دا سەنا­تور­دىڭ قويىن داپتەرىنىڭ ىشىنە ءتۇر­تىلىپ كەتتى. ناقتى جاۋاپ كەيىن بەرىلەتىن بولادى. قازىرگى كۇنى اۋىل شارۋاشىلى­عىن قارجىلاندىرۋعا ارنالعان مەملەكەت­تىك باعدارلامالاردى جۇزەگە اسىرۋ ورتالىق­تارىن­دا وڭكەي قارجىگەرلەر, زاڭگەرلەر جينال­عان. ال ناقتى شارۋاشىلىقتىڭ جايىن ءبىلىپ, زەردەلەيتىن اگرونوم دا, زووتەحنيك تە جوق. كەزدەسۋدە وسى ماسەلە دە ءسوز بولدى. كەزدەسۋدى اۋدان اكىمى قورىتىندىلادى. تەمىر قۇسايىن, «ەگەمەن قازاقستان» باتىس قازاقستان وبلىسى *** پارلامەنت ءماجىلىسىنىڭ دەپۋتاتتارى مۇحتار ەرمان مەن فاحرەدين قاراتاەۆ جامبىل اۋدانى, بەكتوبە اۋىلىنداعى «بينومسترويدەتال» جشس-ءنىڭ تىنىس-تىرشىلىگىمەن تانىستى. جۇمىسىن 2010 جىلى باستاعان سەرىكتەس­تىك العاشىندا سۋ شارۋاشىلىعىنا ارنال­عان لوتوكتار ءوندىرىپ, ۇيگە قاجەتتى جاب­دىقتار شىعارۋمەن اينالىسىپتى. بۇگىن­دە زاۋىت 125 ادامدى جۇمىسپەن قامتىپ وتىر. جۇمىسشىلاردىڭ ورتا­شا جالاقىسى 80-90 مىڭ تەڭگە. وتكەن جىلى كاسىپورىن 80 پاتەرلىك ءبىر ءۇي, 60 پاتەرلىك ەكى ءۇيدىڭ قۇرىلىسىن تولىق اياقتاپ, قولدانۋعا بەرگەن. نەمىس تەحنو­لوگيا­سىمەن جۇمىس جاسايتىن كاسىپورىن اعىمداعى جىلى اۋدانداردا وزدەرىنىڭ فيليالدارىن اشىپ, 3-5 قاباتتى ۇيلەر سالۋدى جوسپارلاۋدا. – اتقارىلىپ جاتقان جۇمىستار­دىڭ قار­قىنى جاقسى. دەسە دە الداعى ۋاقىت­تا قاناتى­مىزدى كەڭگە جايىپ, قو­سىم­شا فيليالدار اشىپ, جۇمىس ور­نىن كوبەيتسەك دەگەن جوسپارىمىز بار. بۇگىندە «بايتەرەك» حولدينگىمەن كەل­ى­سىم-شارتقا تۇردىق. ۇيلەر­دى جالعا بەرۋ, ساتۋ سىندى جۇمىستارمەن اتالعان سە­رىكتەس­تىك اينالىسادى. وتكەن جىلى ايى­نا 2 مىڭ شارشى مەتر ءۇي سالساق, بيىل بۇل كورسەتكىشتى 3 مىڭعا جەتكىزۋدى ويلاستىرۋدامىز. زاۋىت شىعارعان تاۋاردان بىلتىر 560 ملن تەڭگە قارجى ءتۇستى, – دەيدى «بينومسترويدەتال» جشس ديرەكتورى كەڭەسحان ارالبەكوۆ. پارلامەنت ءماجىلىسىنىڭ دەپۋتاتتارى كەز­دەسۋ بارىسىندا مەملەكەتتىك باعدار­لا­ما اياسىندا جۇزەگە اسىرىلۋى ءتيىس بىرقاتار ماسە­لەلەردى ورتاعا سالدى. سونداي-اق, ەكى كۇنگە جوسپارلانعان ساپارلارى بارى­سىندا ءماجىلىس دەپۋتاتتارى باسقا  دا اۋدان­داردا بولىپ, حالىقپەن كەزدەسىپ, ءىرى كاسىپ­ورىندار مەن ءبىلىم نىساندارىنىڭ جۇمىسىمەن تانىستى.  ورالحان ءداۋىت, «ەگەمەن قازاقستان» جامبىل وبلىسى *** ءماجىلىس دەپۋتاتى امانگەلدى ايدار ۇلى «الماتى ستەكلو» شىنى زاۋىتىنا بارىپ, ءوندىرىس ورنىنىڭ جۇمىسىمەن تانىستى. تاۋەلسىزدىكتىڭ 25 جىلدىعى قارساڭىندا اشىلعان بۇل زاۋىت قازاقستان جانە قىتاي ينۆەستورلارىنىڭ 100 ميلليارد تەڭگە قارجىسىنا سالىنعان. قازىرگى تاڭدا مۇندا ونشاقتى ءتۇرلى, الۋان كولەمدەگى شىنى ىدىس­تار جانە ولارعا ارنالعان ارنايى قاق­پاقتار شىعارىلادى. قىتايدا وندىرىلگەن قۇرىلعىلارمەن جۇمىس ىستەۋ ءۇردىسىن جەر­گىلىكتى جۇمىسكەرلەرگە اسپاناستى ەلىنەن كەلگەن شەبەرلەر ۇيرەتۋدە. بولاشاقتا زاۋىت تولىق ىسكە قوسىلعاندا مۇندا 500-گە جۋىق ادام جۇمىسپەن قامتىلماق. ءازىردىڭ وزىندە ءتورت اۋىسىممەن جۇمىس ىستەيتىن ءوندىرىس ورنىندا 300-دەن اسا ادام ەڭبەك ەتۋدە. ءماجىلىس دەپۋتاتى ەڭ الدىمەن, زاۋىتتىڭ جاس ماماندارى مەن جۇمىسشىلارىنىڭ ءوندى­رىس ورنىنداعى قاۋىپسىزدىگى جانە الەۋ­مەت­تىك جاعدايىمەن تانىستى. ولاردى مازا­لا­عان ساۋالدارعا جاۋاپ بەرىپ, قازىرگى تاڭدا ەلى­مىزدە جاس وتباسىلاردىڭ باسپانا ماسە­لە­سىن شەشۋگە سەپتىگى تيەتىن «نۇرلى جەر» باع­دار­لاماسىنىڭ ەرەكشەلىكتەرىن ءتۇسىندىردى. بۇدان كەيىن امانگەلدى ايدار ۇلى الماتى وبلىسىنىڭ كوكسۋ, ىلە, الاكول,  ءىلياس جانسۇگىروۆ اتىنداعى  اۋداندارىنا بارىپ, «نۇرلى جول» جانە «نۇرلى جەر» مەملەكەتتىك باعدارلامالارىنىڭ ورىندالۋ بارىسىمەن تانىستى. ساپار بارىسىندا سايلاۋشىلار ايتقان ۇسىنىستار مەن ءوتىنىش­تەردى بولاشاقتا ۇكىمەت وتىرىس­تارىن­دا ماسەلە ەتىپ قوياتىنىنا سەندىردى.  تالعات ءسۇيىنباي, «ەگەمەن قازاقستان» الماتى *** قىزىلجار وڭىرىنە جۇمىس ساپارىمەن كەلگەن پارلامەنت ءماجىلىسىنىڭ ءبىر توپ دەپۋتاتى ەلدى مەكەندەردى ارالاپ, جۇرتشىلىقپەن كەزدەستى. سونداي ماعىنالى جۇزدەسۋدىڭ ءبىرى مامليۋت اۋدانىندا ءوتتى. وندا دەپۋتاتتار پەتر شاراپاەۆ, سەرگەي زۆولسكي اۋدان تۇرعىندارىمەن اشىق اڭگىمەلەسىپ, قوردالان­عان پروبلەمالاردى بىرىگىپ شەشۋدىڭ جو­ل­دارىن ورتاعا سالدى. جيىندا زەينەتكەر ەكاتەرينا بوگۋش جاستار اراسىنداعى جۇمىسسىزدىق ماسەلەسىن قوزعادى. ونىڭ ايتۋىنشا, اۋىلدىق جەرلەردە توكار, مەحانيك, كومباينشى, تراكتورشى سەكىلدى ماماندىقتار جەتىسپەيدى. سوندىقتان كاسىپتىك باعدارلاۋ جايىنا ەرەكشە نازار اۋدارۋ كەرەك. پارلامەنت ءماجىلىسىنىڭ دەپۋتاتتارى بۇل باعىت بويىنشا ۇكىمەتتىڭ ارنايى باعدارلاما ازىرلەپ, ناقتى شارالار قابىلداعانىن جەت­كىزدى. ۇستىمىزدەگى جىلدان باستاپ كاسىپتىك ءبىلىم بەرۋ مەملەكەت قارجىسى ەسەبىنەن اتقارىلادى. كوللەدج-ۋچيليششەلەر سالۋ ويلاستىرىلعان. كەزدەسۋدە شەكارالاس ايماقتاردا ورنالاس­قان وبلىس جاستارىنىڭ رەسەيگە وقۋعا كوپتەپ باراتىنى ايتىلىپ, ونىڭ باستى سەبەبىنە قازاقستاندا وقۋ اقىسىنىڭ تىم قىمباتتىعى كولدەنەڭ تارتىلدى. بيىل ون مامليۋتتىك جاس كورشى ەلدىڭ جوعارى وقۋ ورىندارىنا ءتۇسىپتى. جاعداي وسىلاي جالعاسا بەرسە, ديپلومدى ماماندار تاپشىلىعى تۋىندايدى. كەزدەسۋدە الەۋمەتتىك سالالارعا قاتىستى باسقا دا جايتتار, ەلدى مەكەندەردە «اگروبيز­نەس-2020» باعدارلاماسىن, كاسىپكەرلىكتى, اوك-ءتى دامىتۋدىڭ جولدارى تالقىلاندى. ءومىر ەسقالي, «ەگەمەن قازاقستان» سولتۇستىك قازاقستان وبلىسى