قازاقتى تانىتاتىن كىتاپتار

الەمنىڭ سەگىز ەلىنە قويىلدى قۇندىلىق تۋرالى كوز­قاراس­تار ءار كەزەڭدە ءارتۇر­لى سيپاتقا يە بولىپ وتى­­راتىنى بار. الىسقا بار­ماي-اق, 90-جىلداردىڭ باسىنداعى جاعدايدى ەسكە تۇسىرەيىك. اۋىلداعى كىتاپ­حانالار جابىلىپ, ەسكى كىتاپتار ورتەلگەن, ءورت­تەن امان قالعاندارىن قى­زى­عۋ­شى­لىق تانىت­قان­دارعا ءشۇ­لەن ۇلەستىرگەندەي عىپ تا­رات­قان ءبىر ناۋقان وتكەن ەدى. ەلىمىز بويىنشا قانشا كىتاپ­حانا جابىلعانىن تاپ باسىپ قازىر ايتىپ بەرە المايمىز, سونداي-اق, قانشا كىتاپتىڭ جوق بولعانىن دا ساناۋ مۇمكىن ەمەس. ەسەسىنە سول تۇستارداعى وسى ءبىر ول­قى­لىقتىڭ ورنى جاڭاشا ءبىر جاق­سىلىقتارمەن, جاڭا­لىق­تارمەن تولىعۋ ۇستىندە. ءبىزدىڭ ومىرىمىزدەگى ادەبيەتتىڭ ورنىن, كىتاپتىڭ ورنىن ەشقانداي دا قارا كۇش باسىپ الا المايتىنىن سوندايدا ءبىر تۇيسىنەسىڭ. «التىندى توت باسپايتىنى», «الماس قىلىشتىڭ قىن ءتۇبىن­دە جاتپايتىنى» سياقتى كەز كەلگەن قۇندىلىقتىڭ ءوز دەڭ­گەيىندە اسپەتتەلەتىن مەجەلى ۋاقىتتىڭ بولاتىنىن ءومىر ءوزى دالەلدەپ كەلەدى. وتكەن جىل دا جاقسى كىتاپتاردىڭ, قۇن­دى كىتاپتاردىڭ جانە ماڭىز­دى كىتاپتاردىڭ ادىمى ۇزارۋى­مەن, وقىلۋ جاعراپياسى كەڭەيۋى­مەن ەستە قالدى. كىتاپ ار­قى­لى ەلىمىزدى, حالقىمىزدى تانىتۋ­دىڭ مۇمكىندىكتەرى تۋدى. ەلىمىز تاۋەلسىزدىگىنىڭ شيرەك عاسىرلىق مەرەكەسىنە تارتۋ رەتىندە الەم­نىڭ سەگىز ەلىنىڭ ۇلتتىق كىتاپ­حانا­لارىندا «قازاق ادەبيەتىنىڭ ورتالىعى» اشىلدى. قازاق حالقى تۋرالى, ونىڭ ادە­بيەتى مەن مادەنيەتىنەن, سالت-داستۇرىنەن حاباردار ەتەتىن بۇل ماڭىزدى جوبانىڭ اۆتورى – استاناداعى ۇلتتىق اكادەميالىق كىتاپحانا. كورەيا, قىرعىز­ستان, ماجارستان, تۇركيا, رەسەي, فينليانديا, ارمەنيا, قىتاي ەل­دەرىنىڭ كەز كەلگەن ءبىلىم قۋعان جاستارى ەلىمىزدىڭ تاريحىمەن, ادەبيەتىمەن, ونەرىمەن جانە وسى ۋاقىتقا دەيىن جەتكەن جەتىس­تىكتەرىمەن تانىستى. مۇن­داي اقپاراتتارمەن ينتەرنەتتە تانى­سۋدىڭ ءجونى ءبىر بولەك تە, كىتاپ­تى ۇستاپ كورىپ, ونى قىزى­عۋ­شىلىقپەن وقىپ تانىسۋدىڭ ءجونى ءبىر بولەك قوي. جوعارىدا اتالعان ەلدەردىڭ ماڭدايالدى كىتاپحانالارىن­داعى «قازاق ادەبيەتىنىڭ ورتالىعى­نا» قازاقستان رەسپۋبليكاسى­نىڭ پرەزيدەنتى ن.نازارباەۆتىڭ «قازاقستاندىق جول», «تاريح تولقىنىندا», «G-Global – ءححى عاسىردىڭ الەمى» اتتى كىتاپتارى, قازاق حالقىنىڭ مادەني مۇراسى بولىپ تابىلاتىن «قازاقتىڭ ءداستۇرلى 1000 كۇيى», «قازاق حالقىنىڭ ولەڭدەرى», «قازاقتىڭ باتىرلىق ەپوستارى» جازىلعان CD-ديسكىلەر, باسقا دا بىرقاتار ادەبي كىتاپتار قويىلدى. «قازاق ادەبيەتىنىڭ ورتا­لىعى» ەڭ الدىمەن, سەۋل قالا­سىنداعى ۇلتتىق كىتاپحانادا اشىلعان بولسا, قىرعىزستان­داعى ورتالىق تمد ەلدەرىنىڭ عىلىمي جانە شىعارماشىلىق ينتەلليگەنتسياسىنىڭ ءحى فورۋ­مى اياسىندا بىشكەك قالاسىندا اشىل­دى, – دەيدى ۇلتتىق اكادە­ميالىق كىتاپحانانىڭ باسشى­سى, پەداگوگيكا عىلىم­دارىنىڭ دوكتورى ءۇمىتحان مۇڭالباەۆا. ءدال وسى بىشكەك قالاسىنداعى ۇلتتىق كىتاپحانادا اشىلعان «قازاق ادەبيەتىنىڭ ورتالىعىندا» ءۇ.مۇڭالباەۆانىڭ «كىتاپحانا پەداگوگيكاسى» كىتابىنىڭ تۇساۋى كەسىلگەن. تمد-نىڭ 25 جىل­دىعى, قازاقستان رەسپۋبليكا­سى تاۋەلسىزدىگىنىڭ 25 جىلدىعى, تمد ەلدەرىندەگى ءبىلىم مەرەكەلەرى تۇسىندا قازاقستان مەن رەسەي­دىڭ مادەني قارىم-قاتىناسى جانە دوستىعىنىڭ نىعايا ءتۇسۋى ءۇشىن رەسەي مەملەكەتتىك كىتاپ­حانا­سىندا اشىلعان «قازاق ادە­بيەتىنىڭ ورتالىعى» دا ەلىمىز ءۇشىن ماڭىزدى ءبىر وقيعا. جالپى, ماجارستاندا, فينليانديادا, ءتۇر­كيادا, ارمەنيا مەن قىتايدا اشىلعان ورتالىقتار دا قازاق­ستان اتتى ىرگەلى ەلدىڭ بار ەكەنى­نەن, ونىڭ ادەبيەتى مەن مادە­نيەتىنەن, سالت-داستۇرىنەن حابار بەرىپ, قىزىعۋشىلاردى وزىنە تارتا تۇسەرى ءسوزسىز. ايگۇل سەيىلوۆا, «ەگەمەن قازاقستان»