استانادا تەگىن باسكەتبول اكادەمياسى اشىلدى

نازارباەۆ ۋنيۆەرسيتەتىنىڭ سپورت ورتالىعى بازاسىندا بالالارعا ارنالعان تەگىن باسكەتبول اكادەمياسى اشىلدى, دەپ حابارلايدى قازاقپارات. اكادەميا 8-14 جاس ارالىعىنداعى قىزدار مەن ۇلداردى جاتتىقتىرا الادى. باس جاتتىقتىرۋشى - دەيان پارەجانين, سەربيا ازاماتى. «راسىمەن, اكادەميا اشىلا قالعان وسى كەزەڭگە ءبىز سەربيادان مامان شاقىرتتىق. بۇل كىسى بالالار باسكەتبولىن عانا ەمەس, ەرلەر اراسىنداعى باسكەتبولدىڭ قىر-سىرىن جاقسى بىلەتىن ادام. ۇيرەنسىن دەپ ءوزىمىزدىڭ ەكى جاتتىقتىرۋشىنى قوستىق. جالپى, نەگىزگى ماقساتىمىز - شەتەلدەن مامان شاقىرۋ ەمەس, باستى ماقساتىمىز - بالالار باسكەتبولىن دامىتۋ», - دەيدى وليمپيادا چەمپيونى, «استانا» باسكەتبول كلۋبىنىڭ باس ديرەكتورى ۆالەري تيحونەنكو. ونىڭ ايتۋىنشا, استانانىڭ اۋا-رايى باسكەتبولدى دامىتۋ ءۇشىن مۇلدە كەدەرگى كەلتىرمەيدى. الماتىداعى باسكەتبولدىڭ دامۋى دا اۋا-رايىنا ەمەس, بۇل سپورتقا قانشالىقتى كوڭىل بولىنەتىنىنە بايلانىستى جانە باسكەتبول تەك الماتىدا دامىسىن دەگەن زاڭ جوق ەكەندىگىن ايتتى ۆ.تيحونەنكو. اكادەمياعا قازىردىڭ وزىندە 60 بالا جازىلعان. اقپان ايىنان باستاپ «استانا» باسكەتبول كلۋبى قالاداعى مەكتەپتەردە شەبەرلىك ساباقتارىن وتكىزىپ, بالالاردى قىزىقتىرا تۇسپەك.