التى جىلدا – التى شىعارما

بۇگىنگى قازاق قوعامىندا وزىندىك ورنى بار, سان الۋان پىكىر مەن وي دوداسىنىڭ قايناعان ورتاسىندا شارشاماي جۇرگەن زاكىر اساباەۆ اعامىزدىڭ قازاق جۋرناليستيكاسىنا سىڭىرگەن ەلەۋلى ەڭبەگىنە توقتاماي ءوتۋ مۇمكىن ەمەس. ۇزاق جىلدار «مادەنيەت جانە تۇر­مىس» جۋرنالىنىڭ جا­ۋاپ­تى حات­شىسى قىزمەتىن اتقاردى. قازاق­ستانداعى بۇل باسىلىمنىڭ قازاق وقىرمانىنا 520 مىڭ (!) دانامەن تارالعان جىلدارى وسى زاكەڭ اعامىزدىڭ جۋرنالدىڭ «باس شتابىن» باسقارعان كەزىمەن تۇسپا-تۇس كەلىپ تۇرۋىنىڭ ءوزى دە كوپ جايتتى اڭعارتسا كەرەك. الپىس جىل بويى اق پاراققا شۇقشيىپ, ءسوز مارجانىن تەرگەن كوسەمسوزشى, پروزاشى اعامىزدىڭ بۇگىنگى تاڭداعى قالامگەرلىك-ەڭبەكقورلىعى قاسيەتى ەمەي نەمەنە – سوڭعى التى جىلدا ايتارى مول التى كىتاپ شىعارىپ تا تاستاپتى. ادەبيەت مايتالمانىن ادە­بيەت­شىلەردىڭ الماتىداعى اقور­داسىندا قۇرمەتتەۋ سالتاناتى دا ايرىقشا ىزەتپەن ءوتتى. رەسمي بايانداما جاسالىنعان جوق. قازاقستان جازۋشىلار وداعى باسقارماسىنىڭ اتىنان  باسقارما باستىعىنىڭ ورىنباسارى جا­نار­بەك ءاشىمجان قۇتتىقتاپ, قالامگەرگە لايىقتى سىي-سياپات جاسادى. بەلگىلى عالىمدارىمىز زەينوللا ءايتىموۆ, نۇريددين بالقياەۆ  زاكەڭنىڭ كوپكە, اسىرەسە جاس بۋىنعا ۇلاعات بولار  بولمىسى مەن تابيعاتى تۋرالى, شى­عار­مالارىنىڭ قوعامدىق سيپاتى تۋرالى اڭگىمە شەرتتى. تانىمال جازۋشىلار بەكسۇلتان نۇرجەكە, احمەتجان ءاشىري, ساتىبالدى نارىمبەتوۆ, جا­قاۋ داۋرەنبەكوۆ, ماعيرا قوجاحمەتوۆا  قالامگەر-قاي­راتكەر زاكىر اساباەۆتىڭ شى­عار­ماشىلىعى, ومىردەگى شىنايى بولمىسى تۋرالى جاراسىمدى دا جاعىمدى پىكىرلەرىن ورتاعا سالدى. «ءداستۇر» باسپاسىنان –  «ەشكىم بىلمەيتىن ايلا», «ءبىلىم» باسپاسىنان – «ءومىر ورنەكتەرى», «انا ءتىلى» باسپاسىنان – «ماەسترو», گەرولد بەلگەر اۋدارمالارىن قازاقشا اۋدارعان, مەملەكەتتىك تاپسىرىس­پەن جارىق كورگەن كىتاپتارىنىڭ قاي-قايسىسى  دا وقىرماننىڭ جۇرەگىنەن ورىن الارى ءسوزسىز دەگەن تۇجىرىم جاسالدى. سالتانات ۇستىندە شيىرىپ ءسوز سويلەگەن قۇرمەت يەسى كۇن­دەلىكتى ومىردە تىلەكتەس, نيەت­تەس جۇرگەن دوستارى مەن قالام­داس ىنىلەرى امانتاي قا­جى مەن ءورىس­بەك شومانوۆقا, جاقسىباي قاسىمبەكوۆ پەن وڭعار يساەۆقا, اقىن, دراماتۋرگ, سازگەر مىرزاحان اح­مە­توۆكە  جانە باسقالارىنا شىن كو­ڭىلدەن العىسىن ءبىلدىردى. كاسىپكەر ارىستان جۇماعۇلوۆ پەن اقىن ءىنىسى قاسىمحان بەگمانوۆقا ءىلتيپاتىنىڭ ەرەكشە ەكەنى تۋرالى ايتىپ ءوتتى. تالعات ءسۇيىنباي, «ەگەمەن قازاقستان» الماتى