قانات يسلام اۋىر ايقاستا جەڭىسكە جەتتى

قازىر عانا "الماتى-ارەنادا" بوكس كەشىنىڭ باستى كەزدەسۋى اياقتالدى. ءبىرىنشى ورتا سالماقتا WBA Fedelatin جانە WBO interسontinental تۇجىرىمى بويىنشا چەمپيوندىق تيتۋل ءۇشىن گانالىق پاتريك اللوتەيمەن جەكپە-جەككە شىققان قازاق بوكسشىسى قانات يسلام ۇپاي سانىمەن جەڭىسكە جەتتى. بۇل 32 جاستاعى قاناتتىڭ 22-ءشى جەڭىسى. ءبىرىنشى راۋند قارسىلاستار ءبىر-ءبىرىن بارلاۋمەن وتكىزدى. ەكىنشى راۋندتا جەرلەسىمىز شابۋىلعا كوشىپ, بىرنەشە سوققىسىن ءدال تيگىزدى. اللوتەي كوبىنە قورعانۋمەن ءجۇردى. ءۇشىنشى راۋندتا قانات يسلام قارسىلاسىن بىرنەشە رەت بۇرىشقا قاماپ, سول قولىمەن باستان جانە باۋىر تۇستان ايتارلىقتاي سالماقتى سوققىلار بەردى. اللوتەيدىڭ قارسى شابۋىلىنان جاقسى قورعانعانىمەن, ءبىر جاقىن ۇرىستا قانات ءبىر-ەكى مارتە سوققى وتكىزىپ الدى. الايدا, وسى راۋندتا قانات ەركىن, سەنىمدى قيمىلعا كوشتى. ءتورتىنشى راۋند جالپىلاي قاناتتىڭ باسىمدىعىمەن ءوتتى. اللوتوەي تاعى دا وڭ جاقتان بىرنەشە سوققى جەدى. قاناتتىڭ قارسىلاستان كاسىبي دەڭگەيى ايتارلىقتاي جوعارى ەكەنى بايقالدى. بەسىنشى راۋند شامامەن تەڭ ءوتتى. ءبارىبىر ءدال تيگەن سوققىلار جونىنەن قانات الدا تۇردى دەۋگە بولادى. بىراق وسى راۋندتىڭ سوڭىنا قاراي كەي ساتتەردە ول ءسال شارشاعانداي كورىندى. التىنشى راۋندتا اللوتەي اياقپەن جاقسى قيمىلداپ, قاشىقتىقتى ساقتاي ءبىلدى. ەكى-ءۇش سوققىسى قاناتقا ءدال ءتيدى. جەتىنشى راۋندتاعى باسىمدىقتى پاتريككە بەرۋگە بولادى. ول قاناتتىڭ سوققىلارىنان جاقسى قاشىپ, ءوزى بىرنەشە رەت الىستان جىلدام سوققى جاساي ءبىلدى. سەگىزىنشى راۋندتىڭ باسىندا اللوتەي سەرگەك قيمىلداپ, ەكى-ءۇش دجەبىن ءدال وتكىزدى. راۋندتىڭ ورتاسىنا تامان قانات قاشىقتىقتى قىسقارتىپ بىرنەشە ءدال سوققى جاسادى. پاتريك كلينچكە كوشتى. توعىزىنشىدا باسىمدىق قاناتتا بولدى. راۋند ورتاسىندا اللوتەيدىڭ 2-3 حۋگى ءوتتى. الايدا راۋند سوڭىنا قاراي قانات قارسىلاسىن بۇرىشقا تاقاپ ناتيجەلى شابۋىل جاسادى. پاتريككە سوققىلاردىڭ اۋىر تيگەنى وسى ساتتەردە انىق ءبىلىندى. ونىنشى جانە ون ءبىرىنشى راۋندتار قويان-قولتىق ۇرىسپەن تەڭ دارەجەدە ءوتتى. قاشىقتىق ۇستاعان اللوتەي ءبىرشاما تىڭ كورىندى. سوڭعى راۋند وتە تارتىستى ءوتتى. قانات يسلام العا ۇمتىلدى. اللوتەي قاشا قيمىلدادى, ءسال سەرگەك كورىندى. بىراق ءدال سوققىلار جونىنەن جەرلەسىمىز ازداپ باسىم بولدى. تورەشىلەر ۇپاي سانىمەن جەڭىستى ءبىر اۋىزدان قانات يسلامعا بەردى. جەكپە-جەكتەن كەيىن سويلەگەن قانات يسلام ون ەكى راۋندتىق ايقاستىڭ ءوزى ءۇشىن وڭاي بولماعانىن, اللوتەيدىڭ جاقسى بوكستاسقانىن, ءوزىنىڭ بۇل جەڭىسپەن توقتامايتىنىن ايتتى.