اۆستريادا قازاقستاننىڭ قۇرمەتتى كونسۋلدىعى اشىلدى

اۆسترياداعى فورارلبەرگ فەدەرالدى جەرىنىڭ اكىمشىلىك ورتالىعى برەگەنتس قالاسىندا قازاقستان رەسپۋبليكاسى قۇرمەتتى كونسۋلدىعىنىڭ سالتاناتتى اشىلۋ ءراسىمى ءوتتى, دەپ حابارلايدى egemen.kz سىرتقى ىستەر مينيسترلىگىنە سىلتەمە جاساپ. ءىس-شارا قازاقستان رەسپۋبليكاسى تاۋەلسىزدىگىنىڭ 25 جىلدىعىن تويلاۋ اياسىندا جانە قازاقستان-اۆستريا ديپلوماتيالىق قارىم-قاتىناستارىنىڭ ورناتىلۋىنا 25 جىل تولۋ قارساڭىندا وتكىزىلدى. قازاقستاننىڭ اۆستريا رەسپۋبليكاسىنداعى ەلشىسى قايرات سارىباي قۇرمەتتى كونسۋلدىقتىڭ قۇرىلۋى ەكىجاقتى بايلانىستاردىڭ ودان ءارى نىعايۋىنا ىقپال ەتەتىنىن اتاپ ءوتتى. ديپلومات قازاقستاندىق تاراپتىڭ فورارلبەرگپەن ىنتىماقتاستىقتى تەرەڭدەتۋدەگى قىزىعۋشىلىعىن جەتكىزدى. اتاپ ايتقاندا, ول وسى ءوڭىردىڭ مەتالل وڭدەۋ, ماشينا جاساۋ, ەلەكترونيكا, توقىما جانە تاماق ونەركاسىبى سالالارىنداعى ءوزىنىڭ دامىعان يننوۆاتسيالىق جانە ەكسپورتقا باعدارلانعان يندۋسترياسىمەن بەلگىلى ەكەنىن ايتتى. فورارلبەرگ جەر ۇكىمەتى توراعاسىنىڭ ورىنباسارى كارلحاينتس ريۋديسسەر ءوز كەزەگىندە فەدەرالدى جەر مەن قازاقستان اراسىنداعى ساۋدا اينالىمىنىڭ ەداۋىر وسكەنىن اتاپ ءوتتى. قازاقستان رەسپۋبليكاسىنىڭ قۇرمەتتى كونسۋلى حاننو ۋلمەر وسى وڭىردە قازاقستاننىڭ مۇددەلەرىن تانىتۋعا جوعارى سەنىم ءۇشىن العىس ءبىلدىردى جانە ەكى مەملەكەت پەن حالىقتاردىڭ يگىلىگى ءۇشىن بار ءبىلىمى مەن تاجىريبەسىن جۇمسايتىنىن ايتتى. قۇرمەتتى كونسۋلدىقتىڭ اشىلۋى اياسىندا برەگەنتس قالاسىنىڭ «Festspielhaus» مادەنيەت ورتالىعىندا اۆستريا مەن ەۋروپادا قازاقستاندىق مادەنيەتتى ودان ءارى تانىمال ەتۋ ماقساتىندا, قازاقستان تاۋەلسىزدىگىنىڭ 25 جىلدىعىنا ارنالعان «قازاقستان قازىناسى – ۇلى دالا اۋەندەرى» جوباسىنىڭ كونتسەرتى ءوتتى. قوناقتاردىڭ الدىندا «Young Eurasian Soloists Orchestra» كامەرالىق وركەسترى ونەر كورسەتتى. ونىڭ نەگىزىن قالاۋشى جانە جەتەكشىسى حالىقارالىق بايقاۋلاردىڭ لاۋرەاتى – شەرنياز مۇساحان. كوپشىلىك نازارىنا الەمدىك كلاسسيكالىق مۋزىكا مەن بەلگىلى قازاق كومپوزيتورلارىنىڭ تۋىندىلارى ۇسىنىلدى.