جاعداي جاساعان ءجون

جۋرناليستەردىڭ كوتەرگەن ماسەلەسى وتە ورىندى. قازاقستاننىڭ ەڭبەك سىڭىرگەن قايراتكەرى, قازاق راديوسىنىڭ «التىن قور» ءبولىمىنىڭ جەتەكشىسى التىن يمانباەۆانىڭ قاراشاش توقسانبايعا بەرگەن «التىن قوردىڭ» احۋالى الاڭداتادى» دەگەن سۇحباتىنان وسى قوردىڭ مۇشكىل حالىنە قانىق بولدىم. شىندىعىندا دا, جەتپىس جىل بويى تىرنەكتەپ جيناعان مول بايلىقتى كۇتىپ-باپتاپ, تولىق ساقتاپ قالۋ بۇگىنگى كۇننىڭ ۇلكەن ءبىر تالابى ەكەنى امبەگە ايان. تەڭدەسى جوق رۋحاني ازىقتىڭ كوپ جىل بويى راديودان بەرىلمەگەنى دە راس. وسى ۋاقىتقا دەيىن جاعداي جاسالماي, تىستەگەننىڭ اۋزىندا, ۇستاعاننىڭ ۋىسىندا كەلگەن قوردى ءبىر جۇيەگە كەلتىرىپ, تەحنيكالىق سۇرانىستارىن قاناعاتتاندىراتىنداي ۋاقىت جەتىپتى. اسىلدارىمىز بەن ارىستارىمىزدىڭ داۋىسىن, ايتقان اڭگىمەلەرى مەن ورىنداعان تاماشا تۋىندىلارىن ساقتاپ وتىرعان «التىن قوردى» قازاق راديوسىنىڭ عيماراتىنداعى ءوز ورنىنان قوزعاماۋ كەرەك. باعا جەتپەس التىن داۋىستار ءبىزدىڭ كەلەشەك ۇرپاعىمىز ءۇشىن تاپتىرمايتىن رۋحاني بايلىق. وتكەنىمىزدى كەلەشەككە كيە ەتۋ – جەر باسىپ جۇرگەن ادامداردىڭ اسىل بورىشى. سوندىقتان, كوپ جىل بويى جيناقتالعان التىن قوردى شاشاۋ شىعارماي كوشىرىپ, حالىق يگىلىگىنە جاراتۋ نەگىزگى باعدارشام بولعانىن قالايمىن. «التىن قوردىڭ» ستراتەگيالىق ءمانى بار ەكەنىن ۇعۋىمىز قاجەت. قازاق حالقىنىڭ رۋحاني بەتكەۇستار قايراتكەرلەرى بولىپ, «التىن قوردىڭ» وركەندەۋىنە, فونوماتەريالدارى­نىڭ كوبەيۋىنە, ءىسىنىڭ العا باسۋىنا ات سالىسايىق. ماعيرا قوجاحمەتوۆا, «بالبۇلاق», «دەرتكە داۋا» باسىلىمدارىنىڭ باس رەداكتورى, قازاقستاننىڭ ەڭبەك سىڭىرگەن قايراتكەرى