قازاقستان پرەمەر-ءمينيسترىنىڭ ورىنباسارى, 28-ءشى بۇكىلالەمدىك قىسقى ۋنيۆەرسيادا-2017 ۇيىمداستىرۋ كوميتەتىنىڭ توراعاسى يمانعالي تاسماعامبەتوۆ الداعى حالىقارالىق ستۋدەنتتىك سايىستاردىڭ وتكىزىلۋىنە الماتى قالاسى مەن الماتى وبلىسىنداعى نىسانداردىڭ ازىرلىگىن تەكسەردى, دەپ حابارلايدى egemen.kz primeminister.kz - كە سىلتەمە جاساپ.
كوشپەلى كەڭەس بارىسىندا ي. تاسماعامبەتوۆ الماتىداعى مەدەۋ اۋدانىندا ورنالاسقان 3 مىڭ ورىندىق «حالىق ارەنا» سپورت كەشەنىنە, ۋنيۆەرسيادا وتەتىن اتلەتيكالىق قالاشىققا, «الماتى ارەنا» مۇز ايدىنى سارايىنا, «سۇڭقار» حشتك, «مەدەۋ» مۇز ايدىنىنا جانە «شىمبۇلاق» تاۋ شاڭعى كۋرورتىنا باردى. سونىمەن قاتار, «تاباعان» سپورت-ساۋىقتىرۋ كەشەنى مەن «الاتاۋ» شاڭعى بياتلون كەشەنىنىڭ دايىندىق بارىسىمەن تانىستى.
ۆيتسە-پرەمەر سپورتتىق سايىستارعا وبەكتىلەردىڭ دايىندىق قارقىنىنا كوڭىلى تولاتىندىعىن ءبىلدىرىپ, بىرقاتار ناقتى تاپسىرمالار بەردى. ي. تاسماعامبەتوۆ ءىس-شارانى وتكىزۋ جانە سايىس قاتىسۋشىلارىن قابىلداۋ اياسىندا قالا ينفراقۇرىلىمىنىڭ ازىرلىگىن قامتاماسىز ەتۋ قاجەتتىگىنە توقتالدى. سونداي-اق, ۋنيۆەرسيادا قوناقتارىنىڭ قاۋىپسىز جانە جايلى ورنالاسۋىنا بارلىق جاعدايدى جاساۋ قاجەتتىگىنە باسا نازار اۋداردى.
«ۋنيۆەرسيادانىڭ باستالۋىنا از عانا ۋاقىت قالدى. بارلىق كەزەڭدەگى جۇمىستار جوعارى دەڭگەيدە ءجۇرىپ جاتىر. ينفراقۇرىلىم, قاتىسۋشىلاردى جانە قوناقتاردى قابىلداۋعا بايلانىستى ۇيىمداستىرۋ ماسەلەلەرىنە باسا نازار اۋدارۋ قاجەت. سونىمەن قاتار, قاۋىپسىزدىك, ەنەرگەتيكالىق جەتكىلىكتىلىك پەن كولىك جۇكتەمەسىن قوسا ەسەپتەگەندە, حالىقارالىق ءىس-شارانىڭ كەدەرگىسىز ءوتۋىن قامتاماسىز ەتۋگە قالالىق قىزمەتتەردىڭ تولىق ءازىر بولۋى وتە ماڭىزدى. ەڭ باستىسى, الماتىعا اعىلاتىن قوناقتاردىڭ كوپتىگىن جانە سپورتشىلاردىڭ, جاتتىقتىرۋشىلار شتابى مەن تىلشىلەردىڭ سايىس وتەتىن ورىنعا جانە قوناقجايلارعا بارىپ-كەلۋىن ەسەپكە العاندا, بۇل قالا تۇرعىندارى ءۇشىن قولايسىزدىق تۋعىزباۋى ءتيىس», - دەپ اتاپ ءوتتى ي. تاسماعامبەتوۆ.
