تەتىگىن تاپقاندار قوقىستان دا قۋات وندىرەدى

بۇگىنگى تاڭدا ەل اۋماعىنداعى قوقىس پوليگوندارىندا 100 ميلليون توننادان استام قاتتى قالدىقتار كومىلىپتى. وعان جىل سايىن 6 ميلليون توننا قوسىلىپ وتىراتىنىن ەسكەرسەك, كوپ ۇزاماي بۇل كورسەتكىش ەسەلەنىپ ءوسىپ كەتەرى انىق. ياعني, مامانداردىڭ قالدىقتاردان تاۋ تۇرعىزۋعا بولاتىنىن ايتىپ دابىل قاعىپ جاتقانى بەكەر ەمەس سىڭايلى. ەلوردادا جاڭعىرمالى ەنەرگيا جانە قالدىقتاردى قايتا وڭدەۋ ماسەلەلەرىنە ارنالعان القالى جيىن وتۋدە. ەكسپو-2017 حالىقارالىق كورمەسىنىڭ قارساڭىندا «Green Energy & Waste Recycling Forum-2016» دەگەن اتپەن ءوتىپ جاتقان بيزنەس-فورۋمدى ۇيىمداستىرۋعا «استانا ەكسپو-2017» ۇلتتىق كومپانياسى, ەنەرگەتيكا مينيس­تر­لىگى جانە «اتامەكەن» ۇلتتىق كا­سىپ­كەر­لەر پالاتاسى مۇرىندىق بولىپتى. وسى بيزنەس-فورۋمدا ماماندار قوقىس­­تى وڭدەۋگە قاتىستى قازاقستاندا قول­د­ا­نىلىپ كەلە جاتقان تاجىريبەنى ودان ءارى جەتىلدىرۋدىڭ جولدارىن قاراس­تىردى. ەنەرگەتيكا مينيسترلىگى قالدىق­تاردى باسقارۋ دەپارتامەنتىنىڭ ديرەكتورى جان نۇربەكوۆ اتاپ وتكەندەي, ەلىمىزدە جاڭعىرمالى ەنەرگيانى دامىتۋ, جاڭا ەنەرگيا كوزدەرىنە قول جەتكىزۋ, قال­دىقتاردى ەنەرگيا وندىرۋگە پايدالانۋ بيزنەستىڭ دە دامۋىنا ىقپال ەتەتىن ماڭ­ىزدى باعىتتاردىڭ ءبىرى بولىپ تابىلادى. ەكولوگيالىق جاعىنان تازالىعىن ەسكەرسەك, ونىڭ ماڭىزدىلىعى دا ارتا تۇسەتىنى تۇسىنىكتى. تاعى ءبىر ايتا كەتەرلىگى, بيىلعى جىلدىڭ ەكىنشى جارتىسىندا قورشاعان ورتانى قورعاۋ تۋرالى زاڭنامالارعا ەنگىزىلگەن وزگەرىستەر كۇشىنە ەنگەن بولاتىن.  «قازاقستاننىڭ تۇراقتى دامۋىنا كومەكتەسۋ» ورتالىعىنىڭ ديرەكتورى ۆەرا مۇستافينانىڭ ايتۋىنشا, بۇل وزگەرىستەن كوپشىلىك بەيحابار. – زاڭعا ەنگىزىلگەن وزگەرىستەردە كەي­بىر قالدىق تۇرلەرى, اتاپ ايتقاندا ەلەكتروندى قۇرىلعىلار, ۋلى زاتتار سىندى قىلدىقتاردى قالاي قولدانۋ كەرەكتىگى كورسەتىلگەن. وكىنىشكە قاراي, ول تۋرالى قاراپايىم ازاماتتار دا, وندىرىستىك كاسىپورىندار دا بىلە بەرمەيدى. بۇگىنگى جيىنعا كوپتەگەن كاسىپورىنداردىڭ وكىلدەرى قاتىسىپ جاتقانىن ەسكەرىپ, زاڭدا كورسەتىلگەن جاڭا ەرەجەلەر, تالاپتار تۋرالى ايتىلۋعا ءتيىس, – دەيدى ول. ەكى كۇنگە سوزىلاتىن بيزنەس-فورۋمدا الەمدە جانە تمد ەلدەرىندە, قازاقستاندا جاڭعىرمالى ەنەرگيانىڭ دامۋ بارىسى, قاتتى تۇرمىستىق قالدىقتاردى جيناۋ, سۇرىپتاۋ جانە كادەگە جاراتۋ جۇمىستارى, وندىرىستىك قالدىقتاردى وڭدەۋ جانە باسقا دا تاقىرىپتار بويىنشا سەمينارلار مەن دوڭگەلەك ۇستەلدەر وتكىزىلەدى. سونداي-اق, قالدىقتاردان ەنەرگيا ءوندىرۋ بو­يىنشا ءتۇرلى جوبالار تانىستىرىلادى. ارنۇر اسقار, «ەگەمەن قازاقستان»