ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ ۇلتتىق برەندىن انىقتاۋ جونىندەگى بايقاۋدىڭ ارالىق ناتيجەلەرىنە جانە ءوتۋ بارىسىنا ارنالعان بريفينگ ءوتتى. وعان اقپارات جانە كوممۋنيكاتسيالار ءمينيسترى داۋرەن اباەۆ جانە سىرتقى ىستەر ءمينيسترىنىڭ ورىنباسارى رومان ۆاسيلەنكو قاتىستى.
بايقاۋدى ۇيىمداستىرۋشىلار اشىق بايقاۋ ارقىلى ەلىمىزدىڭ ۇلتتىق برەندىن قالىپتاستىرۋ بويىنشا ەڭ ۇزدىك ۇسىنىستى انىقتاۋدى كوزدەپ وتىر. وسى ماقساتتا 2016 جىلدىڭ 31 تامىزىنان 15 قازانعا دەيىن وتىنىشتەر قابىلداندى. بۇگىنگە دەيىن 966 ءوتىنىم كەلىپ ءتۇستى. سولاردىڭ 794-ءى ەكىنشى كەزەڭگە جىبەرىلەدى. ال 172 جۇمىس ەرەجە تالاپتارىنا ساي بولماعاندىقتان, كەلەسى كەزەڭگە وتكەن جوق.
«قازىرگى تاڭدا كەز كەلگەن مەملەكەت ەلدىڭ يميدجىنە نازار اۋدارادى. ويتكەنى, بۇل ينۆەستيتسيا جانە تۋريستەر تارتۋدىڭ بىردەن-ءبىر جولى. ارينە, ۇلتتىق برەندكە ەڭ الدىمەن, سول مەملەكەتتىڭ شىنايى جەتىستىكتەرى نەگىز بولۋى كەرەك ەكەنىن جاقسى تۇسىنەمىز. ول حالىقتىڭ ءبىلىم دەڭگەيى, ەكونوميكالىق دامۋى, مادەني-رۋحاني سالاداعى كورسەتكىشتەر, سونىمەن قاتار, ەلدىڭ ءيميدجىن ىلگەرىلەتۋ ءۇشىن ءبىر كورگەننەن ەستە قالاتىن ايرىقشا سيمۆوليكا قاجەت. قازاقستاننىڭ ۇلتتىق برەندىن جاريالاۋداعى باستى ماقسات – وسى. ەڭ باستى تالاپ – لوگوتيپ قازاقستاننىڭ بارلىق ەرەكشەلىگىن قامتيتىن, جەڭىل قابىلداناتىن ءارى تارتىمدى بولۋى كەرەك. ۇلتتىق برەند دەگەنىمىز – تۇتاس ەلدىڭ بەينەسى» دەدى داۋرەن اباەۆ. ونىڭ ايتۋىنشا, بايقاۋ بارىنشا اشىق ءجۇرىپ جاتىر. وسىعان سايكەس, وعان كەز كەلگەن ادام ماماندىعىنا, زاڭدى مارتەبەسىنە, جاسى مەن ازاماتتىعىنا قاراماستان قاتىسا الادى.
سىرتقى ىستەر ءمينيسترىنىڭ ورىنباسارى رومان ۆاسيلەنكو ۇلتتىق برەندتى انىقتاۋعا ارنالعان بايقاۋعا كوپتەگەن ۇسىنىس كەلىپ تۇسكەنىن اتاپ ءوتتى. بۇل اقپاراتتاندىرۋدىڭ جوعارى دەڭگەيدە ۇيىمداستىرىلعانىن جانە ازاماتتاردىڭ ايرىقشا قىزىعۋشىلىعىن بايقاتادى. ارينە, لوگوتيپ دايىنداۋ بارلىق ماسەلەنى شەشپەيدى. سەبەبى, ۇلتتىق برەندتى قالىپتاستىرۋ - كۇن تارتىبىندەگى وزەكتى ماسەلەلەردىڭ ءبىرى. سىرت كوزگە ءوزىمىز تۋرالى جاعىمدى ءارى جاقسى پىكىر قالىپتاستىرۋ, ونى ورنىقتىرۋ – بارلىق قازاقستاندىقتىڭ مىندەتى. سوندىقتان, ەل تۇرعىندارى ءوزى قىزمەت ەتىپ جۇرگەن سالادا ايانباي ەڭبەك ەتۋلەرى كەرەك. ءبىزدىڭ ارقايسىمىزدى قازاقستاننىڭ ازاماتى رەتىندە قابىلدايتىنى بەلگىلى. ال بۇل بىزدەن اشىقتىقتى ەڭبەكقورلىقتى, شىنايىلىقتى تالاپ ەتەدى. جولىمىز, ءونىمىمىز, قىزمەت كورسەتۋىمىز, ينفراقۇرىلىمدارامىزدىڭ ساپاسى, تارتىمدىلىعى – بۇلاردىڭ بارلىعى ەل ءيميدجىن قالىپتاستىرۋشى تەتىكتەر. ەگەر, مەملەكەتىمىز الەمگە پايدالى بولاتىن باستامالار كوتەرىپ, ولاردى جۇزەگە اسىرسا, وندا ءبىزدىڭ شەتەلدەگى ءيميدجىمىز دە تارتىمدى بولا تۇسپەك»,– دەدى رومان ۆاسيلەنكو.
ونىڭ ايتۋىنشا, بۇل باعىتتا اۋقىمدى جۇمىستار جۇرگىزىلگەن. بۇل رەتتە ول اۋعانستاندى مىسالعا كەلتىردى. «قازاقستان ونداعان جىلدار بويى كۇردەلى كەزەڭدى باسىنان وتكەرىپ وتىرعان اۋعانستانعا قولداۋ-كومەك كورسەتىپ كەلەدى. جالپى, ورتالىق ازيانىڭ تۇراقتى دامۋى جولىنداعى يگى ىستەر – ءاردايىم نازارىمىزدا. مەملەكەت باسشىسى تۇركيا مەن رەسەي اراسىنداعى جاعدايدى قالپىنا كەلتىرۋگە دە ۇلەس قوستى. ەلىمىز يادرولىق قارۋسىزدانۋ سالاسىندا كوشباسشىلىق تانىتۋدا. مىنە, ءبىزدىڭ وسىنداي ءىس-ارەكتتەرىمىز ءسوزسىز, حالىقارالىق قاۋىمداستىق تاراپىنان باعالانادى», – دەدى سىرتقى ىستەر ءمينيسترىنىڭ ورىنباسارى.
سونىمەني قاتار, ول ءاربىر مەملەكەتتىڭ الدىندا ۇلتتىق برەند ماسەلەسى وتە وتكىر تۇراتىنىن اتاپ ءوتتى. «ول قانشا جاعىنان تانىمال بولسا دا. سەبەبى, ينۆەستيتسيالىق, تۋريستىك تارتىمدىلىق جونىنەن ەلدەر اراسىندا باسەكە تۋاتىنى ءسوزسىز. بۇگىندە ءار ەل بۇل ماسەلەنى ءارتۇرلى جولمەن شەشۋگە تىرىسۋدا. بىرەۋ ءوز ەلىنىڭ جالپى «تابيعاتىن» ايقىندايتىن لوگوتيپ ويلاپ تاۋىپ جاتادى. ەندى ءبىر ەل تۋريستىك برەندكە ايرىقشا ءمان بەرەدى. ارينە, بۇل جۇمىستاردى باعالاۋ وڭايعا تۇسپەيدى. الايدا, جاڭا زامان اعىمىنا ىلەسۋ ءۇشىن بۇل ماقساتتاعى جۇمىستاردى جالعاستىرا بەرۋ كەرەك»– دەدى ۆيتسە-مينيستر.
بريفينگ بارىسىندا بايقاۋعا جۇمسالاتىن قارجى قورىنىڭ شامامەن 8 ميلليوننىڭ مولشەرىندە بولاتىنى ايتىلدى. ونىڭ 5 ميلليونى جەڭىمپازعا بەرىلەدى, بايقاۋدىڭ ەكىنشى كەزەڭىنە وتكەن قاتىسۋشىلار 200 مىڭ تەڭگە مولشەرىندەگى اقشالاي سىياقىمەن ىنتالاندىرىلادى. قاراجاتتىڭ قالعان بولىگى ۇيىمداستىرۋشىلىق شارالارعا بولىنەدى. بايقاۋدى قارجىمەن قامتاماسىز ەتۋدى ۇيىمداستىرۋشى رەتىندە «كازكونتەنت» اق ءوز موينىنا العان.
ەگەر, لوگوتيپ وتە ەرەكشە ءارى تارتىمدى بولسا, الداعى ۋاقىتتا ونى قازاقستاندا وندىرىلەتىن تاۋارلارعا دا قولدانۋ كوزدەلىپ وتىر.
ءلايلا ەدىلقىزى
سۋرەتتى تۇسىرگەن ورىنباي بالمۇرات
