«ديپلوممەن اۋىلعا» 46 مىڭنان استام مامان تارتىلدى

«ديپلوممەن اۋىلعا» جوباسى ىسكە قوسىلعاننان بەرى اۋىلدىق جەرلەرگە جالپى سوماسى 9,3 ملرد تەڭگە كوتەرمە جاردەماقى العان 46 631 مامان تارتىلسا, ونىڭ 19 263-ىنە تۇرعىن ءۇي ساتىپ الۋ ءۇشىن 43,6 ملرد تەڭگە بيۋدجەتتىك نەسيە بەرىلگەن. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ۇلتتىق ەكونوميكا مينيسترلىگىنىڭ ەكونوميكانىڭ ينفراقۇرىلىمدارىن دامىتۋ دەپارتامەنتىنىڭ ديرەكتورى ۇلان جازىلبەك مالىمدەدى. دەپارتامەنت ديرەكتورىنىڭ دەرەكتەرىنە سۇيەنسەك, اعىمداعى جىلى جوبا شەڭبەرىندە رەسپۋبليكا بويىنشا 5 850 ماماندى اۋىلعا تارتۋ ءۇشىن كوتەرمە جاردەماقى ۇسىنۋعا 2,1 ملرد تەڭگە جانە 2 725 مامانعا تۇرعىن ءۇي ساتىپ الۋ ءۇشىن 8,6 ملرد تەڭگە بيۋدجەتتىك نەسيە ۇسىنۋ قاراستىرىلعان. 2017 جىلى 3 232 مامانعا تۇرعىن ءۇي ساتىپ الۋعا 11,0 ملرد تەڭگە ءبولۋ جوسپارلانعان. بۇل جوبا مەملەكەت باسشىسىنىڭ تاپسىرماسىمەن 2009 جىلى باستالعان بولاتىن. ول جاس مامانداردى جۇمىسپەن قامتي وتىرىپ, الەۋمەتتىك قولداۋ شارالارىن كورسەتۋدى كوزدەيدى. ماماندار اتالعان جوبانى ىسكە اسىرۋ بۇگىندە بىرقاتار وڭ ناتيجەلەرگە قول جەتكىزۋگە مۇمكىندىك بەرىپ وتىرعانىن اتاپ ءوتتى. اسىرەسە وتكەن جىلدارمەن سالىستىرعاندا اۋىلدىق جەرلەرگە كادرلار كەلۋىنىڭ ارتقاندىعى بايقالۋدا. جالپى «ديپلوممەن اۋىلعا» كەلۋشى ماماندار سانى ءار سالادا ءارتۇرلى. ماسەلەن, ءبىلىم بەرۋ سالاسىنا – 33 400, دەنساۋلىق ساقتاۋعا – 9 813, مادەنيەتكە – 1 289, سپورتقا – 616, الەۋمەتتىك قامسىزداندىرۋعا 403 جانە اگروونەركاسىپ كەشەنىنە 1 110 ادام تارتىلعان. دەپارتامەنت ديرەكتورى اتاپ وتكەندەي, جوبانىڭ ءتيىمدى شارتتارىنا قاراماستان, ونى جۇزەگە اسىرۋ بارىسىندا پروبلەمالىق ماسەلەلەر دە جوق ەمەس. كەيبىر مامانداردىڭ ءۇش جىلدان كەم ەمەس ۋاقىت جۇمىس ىستەۋ مىندەتتەمەسىن ورىنداماۋ جاعدايلارى كەزدەسەدى. بۇل رەتتە مامان وزىنە ۇسىنىلعان الەۋمەتتىك قولداۋ شارالارىن تولىق كولەمدە قايتارۋعا مىندەتتى. دينارا بىتىكوۆا