جەكەشەلەندىرۋ اياسىندا 314 نىسان ساتىلدى

جەكەشەلەندىرۋدىڭ ەكىنشى كەزەڭىنىڭ ارالىق قورىتىندىسى بويىنشا 314 نىسان ساتىلدى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ايتىلدى. وعان قارجى مينيسترلىگىنىڭ مەملەكەتتىك م ۇلىك جانە جەكەشەلەندىرۋ كوميتەتى توراعاسى ەدۋارد وتەپوۆ, رەسپۋبليكالىق مەنشىك وبەكتىلەرىن ساتۋ جانە جەكەشەلەندىرۋدەن كەيىنگى باقىلاۋ باسقارماسى باسشىسى داۋلەتباي شاعىروۆ, «اقپاراتتىق-ەسەپتەۋ ورتالىعى» اق باسقارما توراعاسى جاناسىل وسپانوۆ قاتىستى. ولار جەكەشەلەندىرۋ جۇمىستارىنىڭ وسى كەزەڭگە دەيىنگى ناتيجەلەرىمەن ءبولىسىپ, ساتىلعان نىساندار تۋرالى اقپارات ايتتى. 2014-2016 جىلدارعا ارنالعان ساتۋ كەستەسىنە سايكەس, ساتۋعا 622 نىسان جوسپارلانعان ەكەن. تامىزعا دەيىنگى كەزەڭدە 523 نىسان جەكەشەلەندىرۋگە جوسپارلانعان. ال 26 قىركۇيەكتەگى جاعداي بويىنشا ءىس جۇزىندە ساۋداعا 509 نىسان شىعارىلىپتى, ونىڭ 314-ءى ساتىلدى. «ونىڭ ىشىندە رەسپۋبليكالىق مەنشىك بويىنشا – 19, كوممۋنالدىق مەنشىك بويىنشا – 157, الەۋمەتتىك كاسىپكەرلىك كورپوراتسيالار بويىنشا – 81, حولدينگتەر بويىنشا – 57 نىسان بار. بۇل رەتتە, ساتۋدان تۇسكەن قاراجاتتىڭ 7 ملرد تەڭگەسى رەسپۋبليكالىق بيۋدجەتكە, 5,1 ملرد تەڭگەسى وبلىستىق بيۋدجەتتەرگە, 68,1 ملرد تەڭگەسى حولدينگتەرگە, 6,4 ملرد تەڭگەسى الەۋمەتتىك كاسىپكەرلىك كورپوراتسيالارعا باعىتتالعان», دەدى ە.وتەپوۆ. رەسپۋبليكالىق مەنشىك بويىنشا 2014 جىلدىڭ ماۋسىمىنان 2016 جىلدىڭ قىركۇيەگىنە دەيىنگى كەزەڭدە ساتۋعا 27 نىسان جوسپارلانعان. بيىلعى جىلدىڭ 28 قىركۇيەكتەگى جاعدايى بويىنشا ساۋدا-ساتتىققا 27 نىسان شىعارىلىپ, ونىڭ 19-ى ساتىلعان. ال كوممۋنالدىق مەنشىك بويىنشا 273 نىسان جەكەشەلەندىرۋگە جاتادى. ءىس جۇزىندە 28 قىركۇيەكتەگى جاعداي بويىنشا 254 نىسان ساۋداعا شىعارىلىپ, ونىڭ 157-ءسى ساتىلعان. الەۋمەتتىك-كاسىپكەرلىك كورپاراتسيالار بويىنشا 105 نىسان جەكەشەلەندىرۋگە جاتادى. بۇل رەتتە 104 نىسان ساتۋعا قويىلىپ, ونىڭ 81-ءى ساتىلىپ كەتكەن. ۇلتتىق كومپانيالار مەن حولدينگتەر بويىنشا 28 قىركۇيەكتەگى جاعدايعا سايكەس ساتۋعا جوسپارلانعان 136 نىساننىڭ 124-ءى ساۋدا-ساتتىققا شىعارىلىپ, ونىڭ 57-ءسى ساتىلعان. دينارا بىتىكوۆا