كاسىپقوي بوكسشىنىڭ كەشەنى

كەلەر جىلى پايدالانۋعا بەرىلەدى ايگىلى بوكسشى گەننادي گولوۆكين قاراعان­دىنىڭ ىرگەسىندەگى مايقۇدىق ەلدى مەكەنىندە سالىنىپ جاتقان دەنە شىنىقتىرۋ-ساۋىقتىرۋ كەشەنىنىڭ قۇرىلىسىمەن تانىستى. ءساتىن سالىپ, جاڭا سپورتتىق نىسان تولىعىمەن سالىنىپ بىتكەندە, ول چەمپيوننىڭ ەسىمىمەن اتالاتىن بولادى. قۇرىلىسى اياقتالۋعا تاياعان عيمارات ءىشىن ارالاپ كورگەن الەم چەمپيونى اتقارىلعان جۇمىستارعا ريزا ەكەندىگىن ءبىلدىردى. بوكس زالىن كورگەن گولوۆكين ونىڭ كەڭدىگىن اتاپ ءوتىپ, ەگەر دە جاقسىلاپ جابدىقتاسا, بۇل جەردەن بولاشاقتا مىقتى بوكسشىلاردىڭ سانداعان بۋىنىن ءوسىرىپ شىعارۋعا بولاتىنىن ايتتى. «بوكس دامىپ كەلەدى. قازىر زالدا رينگ قانا بولۋ كەرەك دەگەن تۇسىنىك جوق. شۆەد قابىرعاسىن, پنەۆماتيكا, زاماناۋي قۇرال-سايمان, قابىرعالارعا جاستىقشالار, كەرگىش قويۋ كەرەك. بوكس دەگەن رينگكە شىعىپ الىپ قۇر سەكىرۋ ەمەس. بۇل دەگەنىڭىز – ەۆوليۋتسيالىق جولمەن ۇنەمى دامۋ. سپورتتىق قۇرال-سايمان جىلدامدىق پەن كۇش-قايراتتى ارتتىرۋعا قاجەت», – دەدى چەمپيون. گولوۆكين سونداي-اق,بالالاردى كوشەنىڭ ىقپالىنان امان ساقتاپ, سپورت زالدارىنا تارتۋ ىسىنە ءمان بەرۋ كەرەكتىگىن تىلگە تيەك ەتتى. جاڭا سپورت كەشەنى پايدالانۋعا بەرىلگەندە, بالالار وعان تەگىن كىرىپ, اقىسىز جاتتىعۋعا مۇمكىندىك السا دەگەن تىلەك ايتتى چەمپيون. «كەزىندە ءبىز جاتتىعۋعا بارۋ ءۇشىن قالانىڭ انا شەتىنەن مىنا شەتىنە دەيىن اۆتوبۋسپەن ساعاتتاپ جۇرەتىنبىز, – دەپ جاستىق شاعىن ەسكە الدى گولوۆكين. – جاتتىعۋدان كەشكە شىققاندا, اۆتوبۋستارعا سىيماي قالاتىن كەزدەرىمىز دە بولاتىن. ال مىنە قالساڭ, كولىكتىڭ ءىشى ازىناپ تۇرۋشى ەدى. ەندى مايقۇدىقتىڭ بالاقايلارى ءبىز باستان كەشكەن قيىندىقتاردى كورمەيتىن بولادى. بۇل – مايقۇدىق ءۇشىن ۇلكەن جەتىستىك». گولوۆكينمەن بىرگە جاڭا عيمارات قۇرىلى­سىندا بولعان وبلىس اكىمىنىڭ ءبىرىنشى ورىنباسارى اسىلبەك دۇيسەباەۆ كەشەن سالىنىپ بىتكەن سوڭ ونىڭ ەسىگى بالالار ءۇشىن قاشاندا اشىق جانە كىرۋ تەگىن بولاتىنىنا سەندىردى. «بۇل مايقۇدىقتا كوپتەن بەرى سالىنعان العاشقى نىسان. كەشەن كەلەسى جىلى پايدالانۋعا بەرىلەدى. بۇل جەردە بالالارعا قاجەتتى جاعدايدىڭ ءبارى جاسالادى. ەڭ باستىسى, ءبىز ساپاعا ءمان بەرەتىن بولامىز», – دەدى اسىلبەك دۇيسەباەۆ. قازىرگى تاڭدا كەشەن ىشىندەگى 25 مەترلىك باسسەيننىڭ قۇرىلىسى تولىقتاي اياقتالعان. ىشكى ارلەۋ-وڭدەۋ جۇمىستارى جوسپارعا ساي, ىركىلىسسىز جۇرگىزىلىپ جاتىر. قايرات ءابىلدينوۆ, «ەگەمەن قازاقستان» قاراعاندى