ۆيتالي حۋدياكوۆ – ازيانىڭ ەكى دۇركىن چەمپيونى

قازىرگى كۇندەرى ۆەتنامنىڭ دانانگا قالاسىندا ءوتىپ جاتقان V ازيا جاعاجاي ويىندارىندا قازاقستاندىق سۋدا ءجۇزۋشى ۆيتالي حۋدياكوۆ ەكى دۇركىن چەمپيون اتانىپ ۇلگەردى. ءبىزدىڭ جەرلەسىمىز ويىندارداعى ءبىرىنشى التىن مەدالىن جارىستىڭ ءۇشىنشى كۇنى, 23 قىركۇيەكتە اشىق تەڭىزدە 10 شاقىرىمدىق قاشىقتىققا جۇزۋدە جەڭىپ الدى. بۇل ءۇشىن ول 2:02:07.2 ناتيجە كورسەتتى. ەكىنشى ورىن­عا قىتايلىق ۆانگ ۆەنحاو (2:04:55.9) كوتەرىلسە, ءۇشىنشى ورىنعا سيريا­لىق موحامماد سالەح (2:06:20.4) جاي­عاس­تى. وسى قاشىقتىقتا سىنعا تۇسكەن قازاقستاندىق كەلەسى سپورتشى – كەنە­سارى كەنەنباەۆ 2:24:56.0 كورسەتكىشىمەن مارەگە 10-شى بولىپ كەلدى. – بۇگىن اۋا رايى ءبىزدى ونشالىقتى قۋاندىرا قويماسا دا, تەڭىزدىڭ بەتى بارىنشا تىنشىپ جاتىپ, ءبارى ءساتتى اياقتالدى. البەتتە, مەن ەلىم ءۇشىن التىن مەدال جەڭىپ العانىما وتە قۋانىشتىمىن. بۇل جارىستا مۇنداي جۇلدەلەردىڭ كوپ بولاتىنىنا سەنگىم كەلەدى, – دەدى سۋ جاڭا چەمپيون ءجۇزىپ كەلگەننەن كەيىن. قازاقستاندىق ساڭلاق ەكىنشى التىن مەدالىنە جەكسەنبى, 25 قىركۇيەك كۇنى قول جەتكىزدى. بۇل جولى ول 5 شاقىرىمعا ءجۇزىپ جارىسۋدا 58:03.3 ناتيجەسىمەن الدىنا جان سالمادى. ەكىنشى ورىنعا موحاممەد سالەح ورنالاسسا, ءۇشىنشى ورىن ۆەتنامدىق تران تانعا بۇيىردى. ءبىزدىڭ كەنەسارى كەنەنباەۆ بەسىنشى ورىنعا تابان تىرەدى. وسى كۇنى قازاقستاندىق 18 جاسار سپورتشى كسەنيا رومانچۋك اشىق تەڭىز­دە 10 شاقىرىمدىق قاشىقتىققا جۇزۋدە 2:14:20.0 كورسەتكىشىمەن قولا مەدالدىڭ يەگەرى اتاندى. ال العاشقى ەكى ورىندى قىتايلىقتار شين شين (2:14:01.6) مەن يانگ داندان (+13.2) جەڭىپ الدى. قازاقستان ۇلتتىق وليمپيالىق كوميتەتىنىڭ پرەزيدەنتى تيمۋر ق ۇلى­باەۆ ەكى سپورتشىنى دا وسىناۋ ايتۋلى جەڭىستەرىمەن قۇتتىقتادى. «ءسىزدىڭ 5 جانە 10 شاقىرىمدىق قاشىق­تىقتاردا ەشكىمگە دەس بەرمەي, جەڭىس تۇعىرىنان كورىنۋىڭىز – جىلدار بويعى جاتتىعۋلار مەن ماقساتقا جەتۋدەگى تاباندىلىعىڭىزدىڭ ايقىن كورىنىسى», – دەپ اتاپ كورسەتتى ول ۆيتالي حۋدياكوۆقا جولداعان جەدەلحاتىندا. ال كسەنيا رومانچۋككە باسەكەلەستىكتىڭ وتە جوعارى بولعانىنا قاراماستان, سول سىناقتىڭ جۇگىن قايىسپاي كوتەرىپ شىققانىنا العىس بىلدىرىلەدى.  دامير قوجامقۇل