پرەزيدەنت گونكونگ ارنايى اكىمشىلىك اۋدانىنىڭ قارجى مينيسترىمەن كەزدەستى

مەملەكەت باسشىسى گونكونگ ارنايى اكىمشىلىك اۋدانىنىڭ قارجى ءمينيسترى دجون تسانگپەن كەزدەستى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان ەگەمەن-اقپارت حابارلادى. كەزدەسۋدە «استانا» حالىقارالىق قارجى ورتالىعىن قۇرۋ بارىسىنداعى ءوزارا ءىس-قيمىل ماسەلەلەرى جان-جاقتى تالقىلاندى. ەلباسى ساپاردىڭ جوعارى ماڭىزدىلىعىن, سونداي-اق گونكونگتىڭ قارجى, يننوۆاتسيا جانە تەحنولوگيا سالالارىنداعى تاجىريبەسىنىڭ قۇندىلىعىن اتاپ ءوتتى. – گونكونگ الەمدىك جەتەكشى قارجى ورتالىقتارىنىڭ ءبىرى بولعاندىقتان, سىزدەردىڭ تاجىريبەلەرىڭىز بىزگە اسا قاجەت. قازىرگى ۋاقىتتا ءبىز قالىپتاسۋ كەزەڭىن باستان وتكەرۋدەمىز. جالپى, ءوزارا ءىس-قيمىلىمىز قازاقستان مەن قىتاي اراسىنداعى دوستىق قارىم-قاتىناستىڭ اياسىندا ىلگەرىلەپ كەلەدى, – دەدى قازاقستان پرەزيدەنتى. د.تسانگ نۇرسۇلتان نازارباەۆقا كورسەتكەن قوناقجايلىعى ءۇشىن العىس ايتىپ, بۇعان دەيىنگى وتكەن كەلىسسوزدەردىڭ تابىستى بولعانىن اتاپ ءوتتى. – قازاقستان مەن قىتاي اراسىنداعى بەرىك سەرىكتەستىك بايلانىستار ىنتىماقتاستىعىمىزدىڭ نەگىزى بولىپ سانالادى. دەلەگاتسيامىزدىڭ قۇرامىندا 20-عا جۋىق ىسكەر توپ وكىلى بار. ءبىز قازاقستان تاراپىمەن جەمىستى كەلىسسوزدەر جۇرگىزىپ, ونىڭ بارىسىندا تالقىلانعان كۇن تارتىبىندەگى بارلىق ماسەلەلەر جونىندە ءوزارا تۇسىنىستىككە قول جەتكىزە بىلدىك, – دەدى د.تسانگ. بۇدان بولەك, گونكونگتىڭ قارجى ءمينيسترى نازارباەۆ ۋنيۆەرسيتەتىنىڭ ستۋدەنتتەرىمەن اڭگىمەلەسۋدەن زور اسەر العانىن اتاپ ءوتتى. سوڭىندا ەلباسى نۇرسۇلتان نازارباەۆ پەن د.تسانگ قازاقستان مەن گونكونگتىڭ ودان ءارى ىنتىماقتاستىعى تابىستى بولاتىنىنا سەنىم ءبىلدىردى. ەگەمەن-اقپارات