مۇگەدەك ارباسىندا وتىرىپ بيلەۋدەن الەم كۋبوگى سانكت-پەتەربۋرگتە ءوتتى. وعان رەسەيدىڭ وزىنەن 200-دەن اسا سپورتشى قاتىستى, سونىمەن قاتار, تالاپكەرلەر قازاقستان, اۆستريا, بەلگيا, گونگكونگ, يتاليا, فيليانديا جانە جاپونيا ەلدەرىنەن كەلدى.
قازاقستان قۇراما كومانداسى الەم كۋبوگىنە قوستانايلىق ماليكە مۇقتاروۆانى, تارازدان نارعىز احمەتوۆانى جانە قاراعاندىدان ايگۇل بالماعامبەتوۆانى ۇسىنعان. وسى جارىستا ماليكە قولا جۇلدەمەن ورالدى.
جارىس ءبيدىڭ انسامبل, كومبي, كومبي ستاندارت, كومبي لاتينا, كومبي فريستايل, دۋو, دۋولاتينا, دۋو فريستايل, سينگل, سينگل فريستايل دەگەن ون اتالىمى بويىنشا ءوتتى. ال ماليكە فريستايل اتالىمىندا قولا جۇلدەگەر اتاندى جانە جارىستىڭ «چەمپيوندار شوۋى» اتتى فينالىنا قاتىسۋ قۇرمەتىنە يە بولدى.
«ماليكە ءاندى جاقسى ايتادى. ونى ءبىز وسىدان التى جىل بۇرىن بيگە شاقىرعان ەدىك, ول جاتتىعۋلارعا قالماي كەلىپ ءجۇردى. رەسپۋبليكادا وتكەن جارىستارعا ەرتىپ باردىق. ەندى , مىنە ءۇمىتتىڭ ءبارىن اقتاپ, الەم كۋبوگىندە قولا جۇلدەگە قول جەتكىزدى», – دەيدى كولياسكاداعى ءبيدىڭ قوستانايدا نەگىزىن سالۋشى جانە «ءۇمىت-نادەجدا» قوعامدىق بىرلەستىگى توراعاسىنىڭ ورىنباسارى ارۋنا جاقسىعۇلوۆا. قازىر ماليكە وبلىس ورتالىعىنداعى №9 مەكتەپتىڭ 10 سىنىبىندا وقيدى.
«مۇنداي ۇلكەن جارىستاردا جەڭىسكە جەتۋ وڭاي ەمەس. شەتەلدەردەن كەلگەن بيشىلەردىڭ اربالارى بىزدەگىگە قاراعاندا وتە جەتىلدىرىلگەن, ول سپورتشى مۇمكىندىگىن ۇستەمەلەي تۇسەدى», – دەيدى ماليكە مۇقتاروۆا.
بيىل قاراشا ايىندا قىتايدا ازيا چەمپيوناتى وتەدى. ماليكەنىڭ جولداماسى دايار بولعانىمەن وعان قارجى تابىلسا عانا بارادى.
ءنازيرا جارىمبەتوۆا
قوستاناي
