الماتىدا بالاندين مەن شاكىموۆا ماراپاتتالدى

وليمپيادانىڭ التىن مەدالىن يەلەنگەن «قازاق فەلپسى» جۇزگىش دميتري بالاندين مەن قىز-كەلىنشەكتەر اراسىندا بوكستان وليمپيادانىڭ قولا جۇلدەسىن جەڭىپ العان داريعا شاكىموۆاعا لايىقتى سىي-سياپات كورسەتىلدى.  داريعانىڭ بيىلعى وليمپيادا كەزىندە شەبەرلىگى ءۇشىن ۆەل باركەر كۋبوگىن يەلەنگەن امەريكالىق بوكسشى, ەكى مارتە وليمپيادا چەمپيونى كلارەسسا شيلدسكە قايمىقپاي قارسى تۇرعانىن ەسكە العان جينالعان قاۋىم قايسار قىزعا ەرەكشە قۇرمەت كورسەتىپ, قول سوقتى. ۇكىمەتتتىڭ ارناي شەشىمى بويىنشا وليمپيادادا ءبىرىنشى ورىن العان سپورتشى قارجىلىق سىياقىدان تىس (250 مىڭ اقش دوللارى) 3 بولمەلى, ءۇشىنشى ورىن العان سپورتشى (50 مىڭ اقش دوللار) ءبىر بولمەلى پاتەردىڭ كىلتىن قولىنا الۋى ءتيىس. بۇگىن الماتىدا سول شەشىمگە ساي تالاپتار جۇزەگە استى. سالتانات ۇستىندە ءسوز سويلەگەن قالا اكىمى باۋىرجان بايبەك: – قۇرمەتتى سپورتشىلار, سىزدەر قازاقستان تاۋەلسىزدىگىنىڭ 25 جىلدىعىنا تۇسپا-تۇس كەلگەن كەلگەن ريو وليمپياداسىندا ەل نامىسىن قورعاپ, ەلىمىزدىڭ كوك تۋىن كوككە كوتەردىڭىزدەر,– دەدى. – الماتى­لىقتار جانە بارشا قازاقستاندىق جانكۇيەرلەر ءدۇبىرلى كۇندەرى سىزدەرگە ءار ءسات قولداۋ كورسەتتى. اۋەجايدا زور قۋانىشپەن قارسى الدى. كۇنى كەشە ەلباسى نۇرسۇلتان نازارباەۆ بارلىق جۇلدەگەردى استانادا قابىلداپ, مەملەكەتتىك ناگرادالارمەن ماراپاتتادى. سىزدەردى تاربيەلەگەن اتا-انالارىڭىزعا, سىزدەردى ۇلكەن سپورتقا دايىنداعان جاتتىقتىرۋ­شىلارىڭىزعا ۇلكەن راحمەت! ديمانىڭ اناسى وسىندا قاتىسىپ وتىر, ال داريعانىڭ اناسى – پەتروپاۆلدا. ەلباسى ايتقانداي, باقىتتىڭ ءۇش كىلتى (كاسىپتىڭ كىلتى, ءۇيدىڭ كىلتى, كولىكتىڭ كىلتى) بولسا, بۇگىن سىزدەر سول ءۇش كىلتكە دە يە بولىپ وتىرسىزدار. الدا جاڭا بيىكتەرگە جەتە بەرۋلەرىڭىزگە تىلەكتەسپىن! جۇزگىش ديما مەن بوكسشى داريعانىڭ باپكەرلەرى دە قالا اكىمدىگىندە وتكەن سالتاناتتتان قۇر قول قايتپادى. باۋىرجان بايبەك ولارعا 3 ملن جانە 2 ملن تەڭگە كولەمىندە سىياقى تابىستادى. قالا اكىمدىگىنىڭ الدىندا قىزىل لەنتا بايلانعان جول تالعامايتىن قوس كولىكتىڭ كىلتى – دميتري بالاندين («تويوتا لاند كرۋزەر-200») مەن داريعا شاكىموۆاعا («تويوتا لاند كرۋزەر پرادو-150») جينالعان قاۋىمنىڭ دۋ قول شاپالاعىنىڭ استىندا بەرىلدى. ءوز كەزەگىندە ءسوز العان داريعا شاكىموۆا مەن دميتري بالاندين ەلباسى نۇرسۇلتان نازارباەۆقا, قولداۋ كورسەتكەن بارشا قازاقستاندىق جانكۇيەرگە جانە بۇگىنگى كورسەتىلگەن سىي-سياپات ءۇشىن شىن جۇرەكتەن العىس ايتتى. تالعات ءسۇيىنباي الماتى