نەمىس ساياساتكەرى: وباما پۋتينگە بۇلاي دەمەۋى كەرەك ەدى

باتىس ساياساتكەرلەرى رەسەي پرەزيدەنتى ۆلاديمير پۋتينمەن قارىم-قاتىناستا ايتارلىقتاي ۇلكەن قاتەلىكتەرگە جول بەرىپ قويدى. ەندى سونىڭ جەمىسىن وزدەرى تەرىپ, جەپ جاتىر. گەرمانيا بۋندەستاگىندەگى سولشىلدار پارتياسىنىڭ بۇرىنعى باسشىسى, نەمىستىڭ بەلگىلى ساياساتكەرى گرەگور گيزي وسىلاي دەپ ەسەپتەيدى. بۇل رەتتە ول ەڭ الدىمەن اقش پرەزيدەنتى باراك وبامانىڭ رەسەيدى ايماقتىق دەرجاۆا دەپ كەمسىتە اتاۋىنىڭ بەكەر بولعانىنا نازار اۋدارتادى. «پۋتين -  جولبارىستىڭ قايراتى بار كۇرەسكەرلەر تەگىنەن, مۇنداي ادامعا ونداي نارسەلەردى ايتۋعا بولمايدى. ونىڭ ۇستىنە, پۋتين مەن وبامانىڭ جەكە قارىم-قاتىناستارى دا باسىنان جاقسى بولىپ قالىپتاسا قويمادى. قالاي بولعاندا دا, پۋتين امەريكالىقتارعا سيرياداعى سوعىستا رەسەيدىڭ الەمدىك دەڭگەيدەگى دەرجاۆا ەكەنىن تولىق تانىتىپ بەردى», - دەدى گيزي ءوزىنىڭ Die Welt گازەتىنە بەرگەن سۇحباتىندا. ول باتىستىڭ قاتەلىكتەرى قاتارىنا سونداي-اق يۋگوسلاۆيانى بومبالاۋدى, رەسەيدىڭ شىعىس ەۋروپاداعى شەكاراسى بويىنا راكەتاعا قارسى قورعانىس جۇيەلەرىن ورنالاستىرۋدى, ۋكراينانى باتىس اليانسىنا تارتپاق بولعان ارەكەتتى جاتقىزدى. گرەگور گيزي بۇدان بولەك, باتىستىڭ كەزىندە كوسوۆونىڭ ءبولىنىپ شىعۋىندا قانداي ءرول ويناعانىن العا تارتا وتىرىپ, قىرىم ءۇشىن رەسەيگە قارسى سانكتسيا ەنگىزۋدىڭ تۇك كەرەگى بولماعانىن اتاپ ءوتتى. ساياساتكەر ەندى ماسكەۋ باتىستى السىرەتۋ ءۇشىن كەز كەلگەن باتىل قيمىلعا بارادى دەپ سانايدى. ول سول ماقساتتا تۇركيامەن قارىم-قاتىناستى قالپىنا كەلتىرىپ الادى. ول وسىعان بايلانىستى باتىس ليدەرلەرى شەشىمدەرىنىڭ ويلانباستان جاسالعان ارەكەت رەتىندە اتاپ كورسەتەدى. مۇرات ايتقوجا