تەلەارنالار گەننادي گولوۆكيننىڭ جەكپە-جەگىن كورسەتەدى

قىركۇيەكتىڭ 10-نان 11-نە قاراعان ءتۇنى, ساعات 23:00-دە «قازاقستان» مەن KazSport تەلەارنالارى تىكەلەي ەفيردە گەننادي گولوۆكين مەن بريتانيالىق كەللي برۋك اراسىنداعى جەكپە-جەكتى كورسەتەدى. بۇل تۋرالى  «قازاقستان» رترك» اق ءباسپاسوز قىزمەتى حابارلادى. سونداي-اق, kaztrk.kz جانە kazsport.kz. سايتتارىندا كەزدەسۋدىڭ ونلاين-كورسەتىلىمى جۇرگىزىلەدى. جەكپە-جەك لوندونداعى 20 مىڭ ادامعا ارنالعان «و2» سپورت كەشەنىندە وتەدى. وسى كەزدەسۋگە دەيىن گولوۆكين كاسىپقوي بوكسشى رەتىندە شارشى الاڭعا 35 رەت شىعىپ, سونىڭ بارىندە جەڭىسكە جەتكەن. ول 33 جەكپە-جەكتە قارسىلاسىن نوكاۋتقا جىبەرگەن.  ال ونىڭ قارسىلاسى برۋك تە ەشقاشا  جەڭىلمەگەن. برۋك گولوۆكيننەن ءبىر كەزدەسۋ ارتىق وتكىزگەن. دەمەك,  36 رەت رينگكە شىعىپ, سونىڭ ءبارىن تازا جەڭىسپەن اياقتاعان. مۇنىڭ ىشىندە 25 ايقاستا نوكاۋتپەن جەڭگەن. ونىڭ جاسى 30-دا بولسا, گولوۆكين بيىل 34-كە كەلدى. گەننادي گولوۆكين – اۋەسقوي بوكستا 350 كەزدەسۋ وتكىزىپ, 345 جەكپە-جەكتە جەڭىسكە جەتكەن. 2006 جىلدان بەرى كاسىپقوي بوكسپەن اينالىسىپ كەلەدى. ول ورتا سالماق دارەجەسىندە WBA (Super), IBO, WBC (Interim)  جانە IBF تۇجىرىمدارى بويىنشا الەم چەمپيونى. ال بريتانيالىق كەلل برۋك - IBF تۇجىرىمى بويىنشا جارتىلاي ورتا سالماقتاعى الەم چەمپيونى اتاعىن جەڭىپ العان بوكسشى. داستان كەنجالين فوتو: «قازاقستان» رترك» اق ءباسپاسوز قىزمەتى