الماتىدا «ەۋرازيا بارىسى» ءتۋرنيرى وتەدى

2 قازان كۇنى الماتىدا قازاق كۇرەسىنەن «ەۋرازيا بارىسى» ءتۋرنيرى وتەدى. بۇل تۋرالى ۋنيۆەرسيادانى دايىنداۋ مەن وتكىزۋ جونىندەگى ۇيىمداستىرۋ كوميتەتى حابارلادى. بيىلعى ءتۋرنيردى الماتىدا جاڭادان سالىنعان «الماتى ارەنا» سپورت كەشەنىندە وتكىزۋ جوسپارلانىپ وتىر. تۋرنير ەلىمىز تاۋەلسىزدىگىنىڭ 25 جىلدىعى مەن قالانىڭ 1000 جىلدىعىنا ارنالادى. وعان 8 ەلدەن 130 بالۋان قاتىسادى. ول تىكەلەي ترانسلياتسيادا KاzSport جانە «بوەتس» ارنالارىنان كورسەتىلەدى. «8 ەلدىڭ ەڭ مىقتى بالۋاندارى «ەۋرازيا بارىسى» اتانۋ ءۇشىن سايىسقا تۇسەدى. الماتى قالاسىنىڭ ءوزىنىڭ 1000 جىلدىق تويىندا وسىنداي مارتەبەلى جارىستى وتكىزەتىنىنە قۋانىشتىمىز. بۇل «الماتى ارەنادا» وتەتىن ەڭ ءبىرىنشى حالىقارالىق تۋرنير بولادى», دەدى قالالىق قازاق كۇرەسى فەدەراتسياسىنىڭ ۆيتسە-پرەزيدەنتى ماقسات قيقىموۆ. «ەۋرازيا بارىسىن» اتالعان سپورت كەشەنىنىڭ الەۋەتىن بايقاپ كورۋ ءۇشىن دە وتكىزىلەدى. ويتكەنى, وندا 2017 جىلدىڭ قاڭتار مەن اقپان ايلارىندا قىسقى ۋنيۆەرسيادا ويىندارىنىڭ اشىلۋ جانە جابىلۋ سالتاناتى مەن مانەرلەپ سىرعاناۋ جانە كەرلينگتەن سايىستار وتەدى. سونداي-اق, قىركۇيەك ايىنان باستاپ, «الماتى ارەنادا» قازاق كۇرەسىمەن اينالىسۋعا ارنالعان زال اشىلادى دەپ جوسپارلانعان. وندا كۇن سايىن, كۇرەستەن كۇندىزگى جانە كەشكى جاتتىعۋلار وتكىزىلەدى. «ەۋرازيا بارىسى» ءتۋرنيرى وتەتىن «الماتى ارەنا» سپورت كەشەنى 12 مىڭ ادامعا ارنالعان. داستان كەنجالين