ۇلت نامىسىن ۇيادا شىڭداعان

دانيار ەلەۋسىنوۆ – جاراتىلىسىن قۇداي مولىنان بەرە سالعان جىگىت. ريو وليمپياداسىنان كەيىن قازاق ءباسپاسوز ورتالىعىندا چەمپيوندار مەن جۇلدەگەرلەردىڭ جۋرناليستەرمەن كەزدەسۋى ءوتىپ, جارىستان سوڭ اتتىڭ جالى, تۇيەنىڭ قومىندا ءجۇرىپ ايتىلماي قالعان اڭگىمەلەرگە وسىندا كەزەك بەرىلدى. شارشى الاڭدا قارسىلاستارىنا ەسە بەرمەي, بارلىعىن كۇمانسىز جەڭگەن دانيار –  وتباسىنىڭ كەنجەسى. ۇيلەنگەن, ايرانداي ۇيىپ وتىرعان وتباسى بار. جۋرناليستەر اينالىپ كەلىپ, سپورت تۋرالى سۇراي بەرەمىز. بىراق بوكستان دا بولەك ءومىر بار. دانياردان وسى جاعىن بىلگىمىز كەلگەن. اكەسى مارات – ءوزىنىڭ جەكە باپكەرى, بالاسى ءۇشىن جانىن بەرۋگە بەيىل. دانيار جارتىلاي فينالدا قاباعىن جارىپ العاندا, اكەسى جانىن قويارعا جەر تابا الماي قابارىپ كەتتى. سىڭايىنان ۇلىنىڭ ورنىنا ءوزى شارشى الاڭعا قارعىپ شىعىپ, ايقاس سالۋعا بارلىعى اڭعارىلادى. بۇگىندە كوپ بالالار بولىپ تولىپ العان سوڭ ءوزىن ايالاپ وسىرگەن اتا-اناسىن ۇمىتىپ كەتەدى, ياكي بولماسا «جولى وسى ەكەن» دەپ, كۇتۋشى جالداپ, قارت باققاننىڭ قيىندىعىنان قاشىپ, وزدەرى بولەك تۇرادى. اتا-اناسىنىڭ قارنى تويعانىن ەمەس, بالا-شاعاسىنان وزدەرىنە دەگەن قۇرمەت پەن مەيىرىم ىزدەيتىنىن ۇمىتادى. كوپتەگەن جۇرتتا بۇرىننان بار وسى مىنەز قازاق جاستارىنىڭ بويىنان دا تابىلا باستاعانى بۇگىندەرى ۇلكەن پروبلەماعا اينالىپ كەلەدى. ۇلت زيالىلارى دا وسى ماسەلەگە وراي دابىل كوتەرىپ كەلەدى. – اعا, ماعان ءومىر سىيلاعان اۋەلى اللا ­تا­عالاعا جانە اتا-اناما قۇرمەتىم شەكسىز, – دەيدى جەڭىمپاز. – جاس كەزىمىزدە ايالاپ ءوسىردى. بالامىز عوي, كەيبىر بالالاردىڭ جاقسى كيىنگەنىن, جاقسى زاتتار ۇستاپ جۇرگەنىن كورىپ, ماعان دا كەرەك دەسەم, اكەم مىندەتتى تۇردە الىپ بەرەتىن. ءوزى جاتتىقتىرۋشى بولىپ جۇمىس جاسايدى, ارتىق اقشاسى جوق بولۋى دا مۇمكىن عوي. بىراق بالامنىڭ كوڭىلى باسىلىپ قالماسىن, وزگەلەردەن كەم بولماسىن دەپ ويلايتىنىن ەسەيگەن سوڭ بايقاپ كەلەمىز. ءبىزدىڭ وتباسىمىزدا ولاردان ارتىق اسقار تاۋ جوق. مەن ءۇيدىڭ كەنجەسىمىن. وزگە باۋىرلارىم اتا-اناممەن بىرگە تۇرعىسى كەلۋى مۇمكىن, بىراق قارا شاڭىراق يەسى مەنمىن. سوندىقتان ءومىرىنىڭ اقىرىنا دەيىن مەنىڭ قولىمدا بولادى. جۇبايىمىز ەكەۋمىز بەتتەرىنە جەل بولىپ تيمەيمىز. اكە-شەشەم كوڭىلى نەنى قالاسا, سونى الىپ بەرەمىن. ويتكەنى, ولار ۇرپاعىنىڭ الدىندا اتا-انالىق بورىشىن ادال ورىندادى. بىزدەردىڭ سانالى , ءبىلىمدى بولىپ وسۋىمىزگە كەرەك بارلىق جاعدايدى جاسادى. ەندى ولاردىڭ بارلىق جاعدايىن جاساۋ – ءبىزدىڭ پەرزەنتتىك مىندەتىمىز». «اينالايىن-اي» دەدىك ىشتەي ءسۇيسىنىپ. بۇكىل الاش «التىن بالامىز» دەپ ساعان ارقاسىن سۇيەپ, مارقايىپ وتىر. بوكستىڭ ۇرداجىق توبەلەس ەمەس, ۇلى ونەر ەكەندىگىن دالەلدەگەن دارابوزدى دۇنيەجۇزىندەگى بارلىق بوكس ماماندارى تاڭدايىن قاعىپ ماقتاپ وتىر. وسىنداي القالاعان اعايىنعا سەن ءوزىڭنىڭ اقىل پاراساتىڭمەن تاعى دا بيىكتەپ كەتتىڭ. وتان دەگەن ۇلى ۇعىم ەڭ الدىمەن وتباسى قۇندىلىعىنان باستالادى. ءبىز بۇرىن مىقتى بوكسشى دانيار ەلەۋسىنوۆتى عانا بىلەتىن ەدىك. جان سارايىنا ۇڭىلە بەرمەيدى ەكەنبىز. جەر شارىنىڭ ءبىر قيىرىندا ءجۇرىپ, اتا-اناسىنىڭ جانە ۇلتىنىڭ ساداعاسى بولعان باۋىرىم-اي, بۇگىنگى جاستار ۇلگى العىسى كەلسە كەۋدەسىن باستىرماس الاتاۋداي قاسقايىپ سەن تۇر ەكەنسىڭ. ۇلتتىڭ باتىرى سەنەن ۇلگى السا, الاش بالاسى جاھاندانۋدىڭ وزىنەن باسقانى ۇمىتاتىن جىلىمىنا تۇسە قويماس. باقتيار ت ايجان, «ەگەمەن قازاقستان»