«مەن ءۇشىن ول – چەمپيون»

بوكسشى ادىلبەك نيازىمبەتوۆ ريو تورىندە كۇمىس جۇلدەنى ولجالاعان سوڭ ءارى قۇتتى بولسىن ايتۋ, ءارى گازەت ءۇشىن از-كەم تىلدەسۋ ماقساتىندا ونىڭ اكەسى ءسابيت نيازىمبەتوۆپەن حابارلاسقان ەدىك. – ۇلىڭىزدىڭ جۇلدەسى قۇتتى بولسىن, ءسابيت اعا! – راحمەت, بۇل ادىلبەكتىڭ نەمەسە تەك ءبىزدىڭ وتباسىمىزدىڭ عانا ەمەس, بۇكىل ەلىمىزدىڭ, قا­زاقتىڭ جۇلدەسى عوي. ەل-جۇرت­قا مەن دە قۇتتى بولسىن ايتامىن. – ەل ءىشى قازىر «ادىلبەكتىڭ جۇلدەسى التىن بولۋى كەرەك ەدى» دەپ باعا بەرىپ جاتىر. ۇلىڭىزدىڭ جۇدىرىقتاسۋىنا قانداي باعا بەرەر ەدىڭىز؟ – مەنىڭ ۇلىم ەكىنشى ورىن, ياعني كۇمىس جۇلدە السا دا ول مەن ءۇشىن – چەمپيون. حالىقتان اسقان سىنشى جوق, ونى حالىق تا ايتىپ جاتىر, راحمەت. ادىلبەكتىڭ قارسىلاسى وڭاي شاعىلاتىن جاڭعاق ەمەس, ول – الەمنىڭ ءۇش دۇركىن چەمپيونى, مۇنى دا مو­يىن­داۋ كەرەك. دەمەك, ونىمەن  جۇدىرىقتاسۋ نەمەسە نوكاۋتقا جىبەرىپ سۇلا­تىپ سالۋ وڭاي بولماعان شىعار. دەسەك تە مەن كۋبالىق بوكسشىنى التىن جۇلدەسىمەن قۇتتىق­تايمىن. بۇيىرعانى وسى, كۇمىسكە دە قاناعات ەتۋ كەرەك. ۇلىم الەم چەمپيوناتىنىڭ جانە وليم­پيالىق ويىنداردىڭ ەكى دۇركىن كۇمىس جۇلدەگەرى اتانىپ وتىر. مۇنىڭ ءوزى – ۇلكەن جەتىستىك. «اكە بالاعا – سىنشى» دەگەندەي, اكەسى رەتىندە ادىلبەگىمنىڭ جۇدى­رىقتاسۋىنا كوڭىلىم تولدى. كەزىندە قولىنان جەتەكتەپ, بوكس زالىنا الىپ بارعان ەڭبەگىم دە, ءۇمىتىم دە, سەنىمىم دە اقتالدى. – كەرەمەت! – مەن وتباسىمنىڭ اتىنان قولداۋ كورسەتكەن بارشا قازاقستان حالقىنا, ماڭ­عىستاۋ جۇرتشىلىعىنا  العىس ايتامىن. اقتاۋدا تەڭىز جا­عالاۋىندا تىكەلەي كورسەتىلىم ۇيىمداستىرىلدى. حالىق كوپ جينالدى, بارلىعى كەلىپ مەنى قۇتتىقتاپ جاتتى, اكەگە ودان ارتىق نە كەرەك؟ ارينە, تەك العىس­تان باسقا ايتارىم جوق. بىراق, شىنىن ايتايىن, بالامنىڭ ەكى كوزىنە ەرىك بەرگەنى جانىما باتتى. ول ءوزىنىڭ جەڭىلمەگەنىن جاقسى تۇسىنەدى, بىراق بۇل – سپورت. «التىن مەدال المادىڭ» دەپ ەشكىمدى ەشكىمنىڭ كىنالاۋعا, كۇ­ستانالاۋعا حاقى جوق. مەن ۇلىمنىڭ  جەكە باپكەرى مارات جاكيەۆكە ەرەكشە العىسىمدى ايتقىم كەلەدى. ءساتىن سالسا, ءادىل­بەككە قاراپ, وليمپ بيىگىن باعىن­دىراتىن بىلعارى قولعاپ شەبەرلەرىنىڭ قاتارى كوبەيە بەرسىن. قازاقتىڭ كوك بايراعىن كوك­كە جەلبىرەتەتىن جاس بۋىن ءوسىپ-جەتىلسىن دەپ تىلەيمىن. اڭگىمەلەسكەن گۇلايىم شىنتەمىرقىزى, «ەگەمەن قازاقستان» اقتاۋ