جاسوتاندىقتار ارداگەرلەرگە قۇرمەت كورسەتتى

ەل تاۋەلسىزدىگىڭ 25 جىلدىعىنا وراي, «نۇر وتان» پارتياسى جانىنداعى «جاس وتان» جاستار قاناتىنىڭ ۇيىمداستىرۋىمەن «ارداگەرلەردى ارداقتايىق» اتتى مەرەكەلىك ءىس-شارا ەسىل وزەنىنىڭ جاعالاۋىندا ءوتتى. «قارتى بار ەلدىڭ قازىناسى بار» دەگەن ۇلاعاتتى ءسوزدى ۇلىقتاي بىلگەن قازاق جۇرتى قاشاندا اقجاۋلىقتى انالارىمىز بەن اقساقالدى قاريالارىمىزدى ايالاي, ارداقتاي بىلگەن. شاراعا استانا قالاسىندا تۇراتىن 60-قا جۋىق ەڭبەك ارداگەرى قاتىستى. ءىس-شارا ەلى ءۇشىن ەڭبەك ەتىپ, تەر توككەن ارداقتىلارعا كوتەرىڭكى كوڭىل كۇي عانا سىيلاپ قويماي, ءار ادامنىڭ بويىندا ۇلتتىق ءپاتريوتيزمدى وياتۋ, جاس ۇرپاقتىڭ اعا بۋىن وكىلدەرىنە قۇرمەتپەن قاراۋىن قالىپتاستىرۋعا باعىتتالىپ وتىر. يگىلىكتى ءىستى ۇيىمداستىرىپ وتىرعان «جاس وتان» جاستار قاناتىنىڭ مۇشەسى باقداۋلەت جاندىلداەۆ: «ءبىزدىڭ ۇيىم – قالامىزدىڭ قارتتارىنا ۇنەمى كومەك كورسەتىپ, ءاربىر مەرەكە كۇندەرى كونتسەرتتەر ۇيىمداستىرۋدى جاقسى داستۇرگە اينالدىرعانىن ايتا كەتسەك دەيمىن. بۇگىن مىنە, قالا كوركىن اتا-انالارىمىز تاماشالاسىن دەپ كەمەمەن سەرۋەندەۋدى ۇيىمداستىرىپ وتىرمىز. بۇل كىشىنىڭ ۇلكەنگە دەگەن قۇرمەتى دەپ ويلايمىز. ەكى اپتادان كەيىن قارتتار ۇيىندە تۇرىپ جاتقان كوڭىلى جارىم قاريالاردى سەرۋەنگە الىپ شىقساق دەگەن نيەتتەمىز», – دەدى. ەڭبەك ارداگەرى مەيرام شاعالتاەۆتى اڭگىمەگە تارتقانىمىزدا ول: – قاسيەتتى تاۋەلسىزدىگىمىزدىڭ 25 جىلدىعى قۇتتى بولسىن, قاراقتارىم! ەسىل وزەنىندەگى سەرۋەندەۋ كوڭىلىمىزدى كوككە كوتەردى. جاستارىمىز ءوسىپ وركەندەي بەرسىن, ەلىمىز امان, جۇرتىمىز تىنىش, بەيبىت كۇندە بەرەكەلى ءومىر سۇرە بەرەيىك! – دەپ, جاسوتاندىقتارعا العىس ايتتى. قارتتاردى قادىر تۇتاتىن مۇنداي مەرەكەلەردى جىل سايىن وتكىزىپ تۇرۋ جونىندەگى باستاما كىمگە دە بولسا ۇلگى. وزگە وڭىرلەر بۇل ءۇردىستى جالعاستىرسا, نۇر ۇستىنە نۇر. ايمان مۇقىشەۆا