اۋلەتتىڭ ەڭبەك ءوتىلى – 440 جىل

شاڭىراقتا 27 نەمەرە, 40 شوبەرە وركەندەپ ءوسىپ كەلەدى جەڭىمپازداردى ماراپاتتاۋ راسىمىندە وبلىس اكىمىنىڭ ورىنباسارى جاندوس ابىشەۆ بيىلعى جىلعى بايقاۋدا باق سىناۋعا وڭىردەگى 255 وتباسىنىڭ نيەت ءبىلدىرىپ, ءوتىنىم تۇسىرگەنىن ايتتى. ولاردىڭ اراسىندا ءتۇرلى ۇلتتىڭ وكىلدەرى, كوپ-بالالى وتباسىلار مەن كەشە عانا شاڭىراق كوتەرگەن جاستار, نەشە ءتۇرلى ماماندىق يەلەرى بولعان. جالپى, جەڭىمپازداردى انىق­تاۋ بارىسىندا كونكۋرستىڭ قالا­لىق جانە اۋداندىق كوميسسيالارى وتباسىلىق ءداستۇر, رۋحاني-ادامگەرشىلىك قۇندىلىقتار, وتباسى مۇشەلەرىنىڭ تالانتى مەن قول جەتكىزگەن تابىستارى, سونىمەن قاتار, شاڭىراقتىڭ قوعامداعى ابىروي-بەدەلى سىندى ماڭىزدى كورسەتكىشتەرگە باسا ءمان بەرگەن. ۇلتتىق كونكۋرستىڭ وڭىرلىك كەزەڭىنىڭ قورىتىندىسى بويىن­شا جۇلدەلى ءۇشىنشى ورىندى نۇ­را اۋدانى اتىنان باق سىناعان قاپاروۆتاردىڭ كوپبالالى وتباسى مەن ساران قالاسىنان قاتىسقان جاياۋباەۆتار وتباسى ءوزارا ءبولىستى. ەكىنشى جۇلدەگە قارقارالى اۋدانىندا تۇراتىن سىزدىقوۆتار وتباسى لايىقتى دەپ سانالدى. بۇل شاڭىراقتىڭ مۇشەلەرى شەتىنەن مۋزىكانت, ءبىلىم بەرۋ سالاسىنىڭ ۇزدىكتەرى ەكەن. ەكىنشى جانە ءۇشىنشى جۇلدەگە يە بولعان وتباسىلاردى بايقاۋدى ۇيىمداستىرۋشىلار ارنايى ديپلومدارمەن ماراپاتتاپ, سىيلىققا تەلەديدارلار تابىس ەتتى. ۇلتتىق بايقاۋدىڭ ءبىرىنشى جۇلدەسىن راكوۆتاردىڭ سپورتشىلار وتباسى جەڭىپ الدى. بۇل شاڭىراقتا دزيۋدو كۇرەسى بويىنشا قازاقستان جانە الەم چەمپيوندارى بار. وسى وتباسىنان شىققان الەم چەمپيونى ماكسيم راكوۆ قازىرگى ۋاقىتتا ريو-دە-جانەيرو قالاسىندا وتەتىن جازعى وليمپيادا ويىندارىنا قىزۋ دايىندالىپ جاتىر. ال وبلىستىق «مەرەيلى وتباسى» سىنىنىڭ باس جۇلدەسى جەز­قازعان قالاسىنىڭ جۇلدىزى جانعان شاڭىراعى – مەيراموۆتار اۋلەتىنە بۇيىردى. مەيراموۆتار ءۇش بۋىنىندا مەتاللۋرگ ماماندىعىنا قاتىسى بار اۋلەت ەكەن. ولاردىڭ جال­پى ەڭبەك ءوتىلى 440 جىلدى قۇراي­دى! شاڭىراقتىڭ تىرەگى مەن نەگىزىن قالاۋشى ورازالى مەيرام ۇلى – كسرو-نىڭ قۇرمەتتى مەتاللۋرگى, قازاق كسر مەملەكەتتىك سىيلى­عىنىڭ لاۋرەاتى, لەنين جانە ەڭبەك قىزىل تۋ وردەندەرىنىڭ يەگەرى, جەزقازعان قالاسىنىڭ قۇرمەتتى ازاماتى. وتاعاسى ءوزىنىڭ ەڭبەك جولىن قارساقباي كەنىشىندە باستاعان ەكەن. ودان كەيىن جەزقازعانعا اۋى­سىپ, مىس قۇيۋ زاۋىتىنىڭ دومنا پەشىندە 36 جىل, زەينەت دەمالىسىنا شىققانعا دەيىن ۇزدىكسىز ەڭبەك ەتكەن. قازىرگى تاڭدا اقساقالدىڭ جاسى 80-نەن اسقان. ءالى تىڭ, قالالىق ءىس شارالارعا قاتىسىپ, مەكتەپتەردە ءوتىپ تۇراتىن كەزدەسۋلەردىڭ قۇرمەتتى قوناعى بولىپ تۇرادى. اقساقالدىڭ زايىبى ەسەنكۇل يبراگيمقىزى بولسا, «التىن القا» توسبەلگىسىنىڭ يەگەرى, توعىز بالانى  تاربيەلەپ وسىرگەن ارداقتى انا. بۇل كىسى دە مەتاللۋرگيا سالاسىندا, كۇكىرت-قىشقىل تسەحىندا 30 جىلدان استام جۇمىس ىستەپتى. بۇگىنگى تاڭدا بۇل وتباسىنىڭ ەرەسەك مۇشەلەرىنىڭ تۇگەلگە دەرلىگى مەتاللۋرگيا سالاسىندا ەڭبەك ەتىپ ءجۇر. باق قونىپ, بەرەكە-بىرلىگى جاراسقان شاڭىراقتا 27 نەمەرە, 40 شوبەرە ءوسىپ جاتىر ەكەن. بايقاۋدى ۇيىمداستىرۋشىلار جەڭىمپاز وتباسىن «جارتاس» شيپاجايىندا جايماشۋاق دەمالۋعا مۇمكىندىك بەرەتىن جولدامامەن ماراپاتتادى. ەندى مەتاللۋرگتەر اۋلەتى مەي­راموۆتار «مەرەيلى وتباسى» ۇلت­تىق كونكۋرسىنىڭ رەسپۋبلي­كالى­ق كەزەڭىندە قاراعاندى وبلى­سىنىڭ نامىسىن قورعايتىن بولادى. قايرات ءابىلدينوۆ, «ەگەمەن قازاقستان» قاراعاندى