انتاليا. التىنجاي. اقشۋاق

تۇركيا ساپارىنان تۇيگەن ويلار جاقىندا جۋرناليست قالامگەرلەردىڭ ءبىر توبى جەرورتا تەڭىزىنىڭ تولقىندارى وپكەن ايگىلى انتاليا عاجاپتارىنا قانىعىپ قايتقان ەدىك. قىتىمىر قىسى جوق, ءۇش ماۋسىمى شۋاقتى كوكتەم, ءبىر ماۋسىمى جايدارى جاز بولىپ كەلەتىن تاماشا ساقي تابيعاتتى ءتاڭىرىم تارتۋ ەتكەن وسى پروۆينتسيانىڭ تۋريستىك سالاسى مەن اگرارلىق سەكتورىنىڭ جاي-كۇيىمەن ءھام كەلەشەگىمەن مولىنان جىرعاپ تانىسۋ مۇمكىندىگىن, البەتتە, قالت جىبەرگەن جوقپىز. بۇلاي بولۋىن وسى ساپاردى انتاليا ايماقتىق مادەنيەت جانە تۋريزم باسقارماسىنىڭ قولداۋىمەن ۇيىمداستىرعان وسى ەلدەگى قازاقستان ەلشىلىگى قالاپ قۇپ كورگەن ەكەن.   وسىندا بولعان كۇندەردە قا­را­پايىم, قاتارداعى تۇركيا­لىق­تاردىڭ دا قازاقستاندى, قازاق­تار­دى ءبىرشاما ءتاۋىر بىلەتىنىن اڭعارعاندايمىز. سوعان قاراعان­دا ءبىر كەزدەگى تۇرىك كوش­باسشىسى تۇر­عىت ءوزالدىڭ: «بۇل كۇندە مەنى قوسىپ ساناعاندا ءتۇر­كيادا 65 ميلليون قازاق بارمىز» دەگەن ءسوزى دە اقيقاتتان اسا الىس ەمەس-اۋ دەپ ءبىر ءتۇيىپ قويدىق. ايت­سا ايتقانداي, قازىرگى قارىم-قاتىناس قازانداي قايناپ جاتىر. قانشا دەگەنمەن, التاي بەسىگىن­دە بىرگە تەربەتىلگەن باۋىر ەمەس پە, قازاق بالاسى تۇركيادا ءوزىن ەركىن سەزىنەدى. تۇرىكتەردىڭ قازاق مادەنيەتىنە, جال­پى قازاق ەلىنە دەگەن ىقىلاسى ەرەكشە. تۇركيا نەسىمەن ەرەكشە دە­گەن­دە, البەتتە, جەرورتا تەڭىزىنىڭ كۇن سۇيگەن جاقۇتتى جاعالاۋلارى, جىل ون ەكى اي دەرلىك قۇمىرسقانىڭ يلەۋىن­دەي قۇجىناعان كۋرورتتى دەمالىس ورىندارى اۋىزعا الدىمەن ءىلى­نەدى. مۇنىڭ سىرتىندا, جانى ءجانناتتا بولعىر پرەزيدەنت تۇرعىت ءوزال باستاپ جاساتقان مىڭداعان «ءتۇتىنسىز فابريكالاردى» – بۇكىل وسى تۋريزم يندۋسترياسىن نەشە ءتۇرلى جەمىس-جيدەگىمەن, كوكونىسىمەن, ازىق-ت ۇلىگىمەن, باسقاداي دا كە­رەك-جاراعىمەن قامتاماسىز ەت­ىپ تۇرعان اۋىلشارۋاشىلىق سالاسى دا تۋىسقان ەلدىڭ وزىق دامىعان, ۇيرەنەرلىك ۇردىستەرى كوپ ماقتاۋلى برەندى سانالادى. وسى ورايدا, ءاسى­رەسە, تۇركيانىڭ ءىنجۋ-مارجانى, التىنجاي, اقشۋاق انتاليا جۇلدى­زى – ىشكى ايماقتار اراسىندا دا, الەم بو­يىنشا دا ماڭداي الدىندا جارقىرايدى دەسەك, استە ارتىق ايتقاندىق ەمەس. وسى انتاليانىڭ كوز جەتەر جەر­دەگى اتشاپتىرىم اتىرابىن تۋرا الاقانعا سالىپ قويعانداي قاز-قالپىندا تاقتالى تاۋدىڭ 2365 مەترلىك بيىگى – وليمپوستىڭ باسىنان تاماشالاۋ دا ءبىر عاجاپ ەكەن. جۇزدەگەن بەس جۇلدىزدى وتەل­دەرمەن ورنەكتەلگەن, جەمىس-جيدەك, تسيترۋس ماۋەلەرى, كوكونىس القاپتارىمەن كومكەرىلگەن انتا­ليا­نىڭ كۋرورتتى وازيس جازيراسى ءبىر-بىرىمەن قاپتالداسا, كەڭ قانات جايىپ جاتقانىن بۇلت قاسىنداعى بيىكتەن شولعاندا وزگەشە اسەرگە ءبو­لەنگەنىمىز دە راس. ءتۇپ تامىرىن التاي مەن وتىكەننەن تارتقان تۋىس جۇرتتىڭ مىنا جەر جۇماعىنداي جەرۇيىق مەكەندە ەل شاڭىراعىن اس­پانداتىپ كوتەرگەنىنە اسىرەسە ءبىزدىڭ قازاقتىڭ مەرەيلەنەرى دە شىندىق. وسىعان وراي قازاقستانعا دەگەن انتاليا وكىمەت ورىن­دا­رى­­نىڭ ىنتا-ىقىلاسى دا ەرەكشە. قا­زاقستان­نىڭ ءتۇر­كيا­داعى ەلشىسى جانسەيىت ءتۇي­­مەباەۆ پەن قازاقستاندىق ءبىر توپ جۋرناليستەردىڭ انتاليا پروۆينتسياسىنىڭ ءۋاليى الااددين يۋكسەلمەن جانە تۋريستىك بيزنەس وكىلدەرىمەن كەزدەسۋى بارىسىندا دا ەكى ەل اراسىنداعى بارىس-كەلىس, بايلانىس دانەكەرلەرىن شيراتا ءتۇسۋ جايى كوبىرەك قاۋزالدى. تاراپتار قوس مەملەكەت كوش­باسشىلارى دەن قويۋىنىڭ ارقاسىندا ەكى ەل اراسىنداعى قا­رىم-قاتىناستاردىڭ كەڭ اۋقىمدا دامىپ وتىرعاندىعىنا توقتالا كە­لە, وسى رەتتە ايرىقشا تۋريزم سالاسىن اتاپ ءوتتى. جاقىندا عانا تۋريزم تاجىريبەسىن ۇيرەنۋ ءۇشىن انتالياعا قازاق­ستاننان 60 ادامدىق ۇلكەن توپ كەلىپ كەتىپتى. البەتتە, بۇل جاقسى نىشان. مۇنىڭ سىرتىندا, قازىرگى قارجى قىسپاعىنا قاراماس­تان قازاقستاندىقتاردىڭ جالپى ءتۇر­كيا, سونىڭ ىشىندە ان­تا­ليا كۋرورتتارى مەن دەمالىس ايماقتارىنا قىزىعۋشىلىعى ەش باسەڭدەر ەمەس. جەرورتا تەڭىزىنىڭ تۇرىككە تيەسىلى جاعالاۋلارىندا جىل سايىن 200 مىڭنان استام وتانداسىمىز ءوز دەمالىستارىن وتكىزۋگە ىنتالانىپ تۇرادى. ءدال بۇگىنگى تاڭدا بۇل ەلدىڭ تۋريستىك سالاسى دا قازاقستاننان كەلەتىن دەمالۋشىلارعا اسا بە­يىلدى. مۇقتاج دەسەك تە بولادى. ان­تاليا ءۋاليى الااددين يۋكسەل بۇل جايدى اشىق ايتىپ وتىر. ساياسي, سونداي-اق, ەكو­نو­­ميكالىق سەبەپتەرگە بايلانىستى, اسىرەسە, رەسەيدەن جانە ەۋروپانىڭ ءبىر­قاتار ەلدەرىنەن كەلەتىن تۋريستەر سانىنىڭ كەمۋى بايقالعانى دا بارشاعا ءمالىم. (وسىدان از ۋاقىت وتكەندە ەلباسىنىڭ ارالاسۋىمەن تۇركيا-رەسەي باسشىلىعى تۇسىنىستىك تاۋىپ, تۋريستىك ارنا قايتا اشىلا باستاعانىن ەسكە سالامىز – ق.ا.) ءۋاليدىڭ ايتۋىنا قاراعاندا, بيىل ءوڭىردىڭ دەمالىس ايماقتارى 800 مىڭ شاماسىندا ادام قابىلداي الادى. جۇمىس ىستەپ تۇرعان 500 قوناق ءۇيدىڭ 400-دەن استامىنىڭ بەسجۇلدىزدى مارتەبەسى بار. سونىمەن قاتار, سوڭعى ۋاقىت­تاردا انتاليادا ەمدىك تۋريزم دە ايتارلىقتاي دامىپ كەلە جات­قان كورىنەدى. مەيلى قانداي جاعدايدا بولسىن, دەمالۋشىنىڭ دەنساۋلىعىن ساۋىقتىرۋعا, ولاردى ساپالى مەديتسينالىق قىزمەتپەن قامتاماسىز ەتۋگە باسىمدىق بەرى­لەدى. ونىڭ ۇستىنە, بۇل جۇمىستىڭ اياسىنا مەملەكەتتىك مەكەمەلەرمەن قاتار جەكەمەنشىك مەديتسينالىق كاسىپورىندار دا تارتىلعان. حالىق­ارالىق Remed Assistance سەرۆيستىك مەديتسينالىق كومپانيا وكىلى دوكتور نۋري ءازيزدىڭ سوزىنە جۇگىنسەك, كومپانيا بارلىق قاجەتتى قىزمەتتەردى تاۋلىك بويى ءۇزىلىسسىز رەجىمدە الۋعا كومەكتەسەدى, ءاربىر جاع­داي­دىڭ جەكە ەرەكشەلىگىنە ساي شەشىم تابادى. – ءبىز ەمدەۋدى ۇيىمداستىرۋعا ماماندانعانبىز, – دەيدى دوكتور نۋري ازيز, – مىسالى, قا­را تەڭىزدەگى كەمەدەن تەلەفون سوعىپ, شۇعىل مەديتسينالىق كو­مەك كورسەتۋدى سۇراۋى مۇمكىن. ونداي كومەكتى ۇيىمداستىرعاندا ءبىز كاتەرلەردى, تىكۇشاقتاردى, ۇشاقتاردى پايدالانىپ, ناۋقاس­تاردى تىكەلەي ەمدەۋ ورنىنا جەدەل جەتكىزەمىز. انتاليا جاعالاۋلارىن الەم­دەگى ەڭ تازا تەڭىز سۋى شايىپ جاتىر. اۋا رايىنىڭ قولايلىلىعى سونداي, سۋعا ءتۇسۋ ماۋسىمى مۇن­دا ەرتە كوكتەمنەن قارا كۇزگە دەيىن سوزىلادى. سوڭعى جىلدارى ءتۋريزمنىڭ اڭشىلىق, قىسقى سپورت تۇرلەرى, گولف, جاياۋ سەرۋەن, الپينيزم, مەديتسينالىق جانە ىسكەرلىك تۋريزم سياقتى سالالارى قارقىندى دامۋ ۇستىندە. ىسكەرلىك تۋريزم دەگەندە, تولىپ جاتقان ءتۇرلى كونفەرەنتسيالار مەن فورۋمداردى ۇيىمداستىرۋشىلار التىنجاي دا اقشۋاق انتاليانى قالايدى ەكەن. ايتقانداي, ءوت­كەن جىلدىڭ قاراشاسىندا G20 ءسامميتى دە وسىناۋ ەلدەردىڭ ءبىرىن­شى باسشىلارىنىڭ قاتىسۋى­مەن ناق وسىندا وتكەن بولاتىن. جوعارىدا اتالعان تۋريستىك باعىت­تاردىڭ ءبارى جىل بويى توقتاۋ­سىز جۇرەدى. جەرورتا تەڭىزى جاعالاۋىنىڭ جۇمساق كليماتى مەن بۇكىل وڭىردەگى ءتۋريزمنىڭ جوعارى دەڭگەيى وسىعان يگى ىق­پالىن تيگىزۋدە. جازدىڭ ىستىق ماۋسىمىندا كۇنگە كۇيىپ, سۋعا شومىلۋدى سۇيەتىن جاعاجاي جانكۇيەرلەرى جىل قۇستارىنداي جىرتىلىپ ايىرىلسا, قىس ايلارىندا مۇنداعى ەكى مىڭداي لاگەردەگى فۋتبول الاڭدارىن ەۋروپا مەن تمد ەلدەرىنىڭ, سونىڭ ىشىندە قازاقستاننىڭ دا فۋتبول كلۋبتارى وزدەرىنىڭ سۇيىكتى جاتتىعۋ ورنىنا اينالدىرعان. ال سوڭعى جىلدارى گولف-كلۋب­تاردىڭ تۇتاس جۇيەسى اشىلۋىنا بايلانىستى مۇندا كاسىپقوي گولفشىلەر مەن وسىناۋ سپورت ءتۇرىنىڭ كوپتەگەن اۋەسقويلارى اتباسىن تىرەۋدى ادەت ەتكەن. ءوڭىر ءومىرى جالعىز تۋريزممەن تۇيىقتالادى دەسەك قاتەلەسەمىز. سەبەبى, انتاليانىڭ ىشكى الەۋەتى وتە جوعارى. كاسىپ جۇرگىزۋگە دە, ءومىر سۇرۋگە دە قولايلى. 80 مىڭ شەتەلدىكتىڭ وسى قۇت مەكەندە قونىستانىپ, تولايىم تىرلىك كەشىپ جاتقاندىعى وسىنى ايعاقتاسا كەرەك. ال سول انتاليادان باق-بەرەكە تاپقانداردىڭ تەڭ جارىمى ورىس­تار, قالعانى نەمىستەر, سكانديناۆتار, اعىلشىندار دەسەك, وعان دا مىنا جاھاندانۋ زامانىندا استە تاڭ قالۋعا بولماس. اتىراپتىڭ تابيعاتى مەن جاعىراپيالىق جاعدايى مۇندا اۋىل شارۋاشىلىعىن تابىس­تى وركەندەتۋگە جول اشقان. انتاليا بۇگىنگى تاڭدا ساپالى ءارى ەكولوگيالىق تۇرعىدان تازا اۋىلشارۋاشىلىق ونىمدەرىن ءوندىرۋدىڭ ماڭىزدى ورتالىعى بولىپ تابىلادى. پرو­ۆينتسيا باسشىسىنىڭ ايتۋىنشا, ءوڭىر ەكونوميكاسى ءۇشىن اگرارلىق سەكتوردىڭ ماڭىزى تۋريزمنەن ءبىر كەم ەمەس. ويتكەنى, ءوڭىر اۋماعىنىڭ 20 پايىزىن, ءبىز تاقتالى تاۋدىڭ باسىنان شولىپ كورگەنىمىزدەي, اۋىلشارۋاشىلىق ماقساتىنداعى جەرلەر – شابىندىقتار, قۇنارلى القاپتار, ورماندار, جايىلىمدار الىپ جاتىر. كوپتەن-كوپ جىلىجايلار ءونىمدى جىل ون ەكى اي بويى ءوسىرىپ جيناۋعا مۇمكىندىك بەرەدى. ءسويتىپ, وسى ارا­دان ماۋەلى جەمىستەر مەن كوكونىستەر تۇركيانىڭ باسقا اۋداندارىنا تىنىمسىز جونەلتىلىپ جاتادى, سونداي-اق, ەكسپورتقا شىعارىلادى. ءوڭىردىڭ ءبىر ءوزى عانا ءىس جۇزىندە بۇكىل تۇركيانى كوكونىس-جەمىسپەن, ايتالىق, اپەل­سينمەن قامتاماسىز ەتىپ قانا قويماي, مۇنىڭ سىرتىندا 500 ملن. دوللار كولەمىندە باسقا ەلدەرگە, سونىڭ ىشىندە قازاقستانعا دا ەكسپورتتاۋى بۇل سالانىڭ الەۋەتىن ايقىن تانىتقانداي. تۋريزممەن جانە اگرارلىق سەكتورمەن قاتار ونەركاسىپ تە دامۋ ۇستىندە. بۇگىندە انتاليادا 200-گە جۋىق ءىرى ونەركاسىپ ورىندارى تىركەلگەن. ولاردان باسقا, شاعىن كومپانيالاردىڭ باسىن قوسىپ شوعىرلاندىرعان 11 ونەركاسىپ ايماعى جۇمىس ىستەيدى. مىسالى, سوڭعى جىلدارى ءومىر تالابى مەن سۇرانىسقا ساي ونەركاسىپتىڭ كەلەشەگى كەڭ جاڭا سالاسى – ياحتا جاساۋ وزىندىك ورنەكپەن دامي باس­تادى. قازىر انتاليادا باعاسى ميلليون دوللارلىق جانە ودان دا جوعارى, ەليتا كلاستى تاماشا ياحتالاردىڭ تامساندىرىپ تاڭداي قاقتىرارلىق نەشەمە ءتۇرى جاسالۋدا. ونى ءبىز تەڭىز جاعاسىنداعى ايلاق-مارينالاردا كوزبەن كورىپ, قولمەن ۇستاپ, شىن كوڭىلدەن سۇيىندىك. تەڭىز ايدىنىندا ءجۇزىپ جۇرەتىن قوناقۇي دەگەنگە دە سىيىمدى.  بۇل ياحتالار باس­قالارمەن سالىستىرعاندا ءارى ارزان, ءارى ءىنجۋ-مارجان بولعاندىقتان, ەۋروپا نارىعىنا دا ءوتىمدى كورىنەدى. سوڭعى كەزدە وسى سالانىڭ قارقىن الىپ دامي تۇسۋىنە تۇركياداعى ياحتالىق سەر­ۋەن­نىڭ تانىمالدىعى عانا ەمەس, قولايلى سالىق رەجىمى, ارزان جۇ­مىس كۇشى جانە وسى ورايداعى مامانداردىڭ جوعارى بىلىكتىلىگى سياقتى تولىپ جاتقان باسقا فاكتورلار دا از اسەر ەتىپ وتىرعان جوق. ونەركاسىپتىڭ وسى جانە باسقا سالالارىن كەلەشەكتە ءورىسىن اشىپ دامىتۋعا جانە شەتەل بيزنەسمەندەرىن تارتۋعا سەپتەسەتىن ەركىن ساۋدانىڭ ەرەكشە ايماعى جۇمىس ىستەيدى. بىرقاتار كاسىپورىنداردا, مە­كەمەلەردە, جەرورتا تەڭىزى جاعا­لاۋىنداعى الەمگە تانىمال قوناق ۇيلەردە بولعاندا وسى جايلارعا قانىعىپ, سەنىمىمىز بەكي ءتۇستى. انتاليا كۋرورت-قالا­سىنىڭ دا كوزدى ارباپ, كوڭىلدى سۇيىندىرگەن قىزىقتارى ءوز الدىنا. بۇل دەگەنىڭىز تەك كوك تەڭىزبەن قولتىقتاسقان حاۋىزدى قوناق ۇيلەر, ويىن-ساۋىققا تولى كوڭىلدى جاعاجايلار, ءار ەلدەردەن كەلگەن مىڭ سان دەمالۋشىلار عانا ەمەس, انتاليا – تاريح, انتاليا – تانىم. وسىندا ەجەلگى گرەك مادە­نيەتىنىڭ ايشىقتى تاڭبالارى مەن ريم يمپەرياسى ءداۋىرىنىڭ بەلگى-ىزدەرىن ساقتاعان كونە جادىگەر, ساۋلەت ەسكەرتكىشتەرى جاقىنداپ بارساڭىز نەبىر شەجىرە سىرلاردى شەرتە جونەلگەندەي. قالانىڭ قاق ورتاسىنداعى ەسكى شاھاردىڭ بۇرالاڭداعان تار كوشە­لەرىمەن كەلە جاتىرمىز. ادەمى دۇكەندەر, اعاش ۇيلەر, توزىعى جەتكەن مەشىت­تەر. تەڭىز جاعاسىن وراي تۇرعىزىلعان قامال-قالانىڭ بيىك قورعانى. كونە مەن جاڭا قابىسىپ قاتار تۇر. كوكىرەك كوزى اشىق, زەردەلى تۋريستەردى اشىق اسپان استىنداعى وسىناۋ تاريحي جادىگەرلەر ەرەكشە قىزىقتىرادى. بۇلاردىڭ ءبىرسىپىراسى مىڭ جىلدىڭ ارىسىندا بوي تۇزەپ داۋىرلەگەن, ال ءبىر بولىگى ءحىىى عاسىردا سەلجۇق سۇلتانى الاددين كەيقۋات باسىپ العاننان كەيىن پايدا بولعان. مىنە, قازىر وسى ارا قىج-قىج قايناعان ءومىر, تۋريستىك مارشرۋتتىڭ العى شەبى. كونە قورعانداردىڭ ەتەگىندە كۇن ساۋلەسى قۇيىلعان, قۇمىنان شيپا بۇيىرعان سابات جاعاجاي. جاعادان قول سوزىم ايدىندا نەشە ءتۇرلى قايىق, كاتەرلەر, جەلكەندى ءجۇزۋ قۇرالدارى دۋمانداتا ءجۇزىپ ءوتىپ بارا جاتادى. جالپى, قالادا تۋريس­تەر مەن تىنىعۋشىلارعا قىز­مەت كورسەتەتىن مۇنداي ايلاق­تار كوپ-اق. انتاليا ەرەكشەلىگىن تانىتار تاعى ءبىر دەرەكتەرگە زەر سال­ساق, بۇل وڭىردەگى جاعاجايلار 640 شاقىرىمعا سوزىلا قانات جايىپ جاتىر. حالقىنىڭ سانى 2 ميلليون 300 مىڭ شاماسىندا. ال ەندى وسىنداي عانا جەردەگى 500 مەيمانحانانىڭ 21-ءى الەمدەگى ەڭ ۇزدىك 100 وتەل­دىڭ ىشىندە. انتالياداعى بۇكىل مەي­مانحانالارعا ءبىر تۇندە 650 مىڭ ادامنىڭ قونىپ شىعۋىنا جاعداي جاسالعان. ءار كۇن سايىن كۋرورتتى قالاعا 180 مىڭ ادام جۇزدەگەن ۇشاقتارمەن كەلىپ قونىپ جايعاسىپ جاتادى. 170 مىڭداي ادام ۇشىپ كەتەدى. كۇنىنە 1000 ۇشاق ۇشىپ كەلەدى, ۇشىپ كەتەدى. بۇكىل ازيا, ەۋروپا, افريكانىڭ 58 ەلىنەن 302 قالامەن تىكەلەي اۋە قاتىناسى ورناعان. قاشىقتىقتى ۇشاق جىلدامدىعىمەن ەسەپتەسەك, 2-4 ساعاتتىق ارالىقتاعى ءتۇر­كيانى قورشاپ جاتقان ايماقتا 2 ميللياردتان استام ادام تۇرادى ەكەن. سونىڭ ءاربىرى تۇرىك كارداشتار ءۇشىن ىقتيمال تۋريستەر. ولاي بولسا, مۇندا دەم­الۋعا فرانتسيا, گەرمانيا, انگليا سياقتى ەلدەردەن كوبىرەك كەلەدى. فرانتسۋزداردىڭ ءبىر بولەك, اعىلشىنداردىڭ ءبىر بولەك دەم­الىسىن وتكىزۋدى ۇناتاتىن اي­ماقتارى بار. تۇرىكتەر سوڭعى كەزدە تۋريزم نارىعىنا ءۇندىستان, اراب ەلدەرىن قوسۋ جولىندا جۇمىس­تار جۇرگىزۋدە. ونداعىلار قالتالى, ساپالى تۋريستەر. سونى­مەن بىرگە, رەسەي تۋريس­تەرىنىڭ قايتادان كەلە باستاۋى دا كوڭىلگە توق, شۇكىر دەگىز­گەندەي. بۇل انتا­ليانىڭ الەمدىك دەڭگەيدەگى تۋريستىك الەۋەتىن پاش ەتپەي مە. تۇركيادا سوڭعى جىلداردا دەن­­ساۋلىق ساقتاۋ سالاسىنداعى ءتۋريزمنىڭ دامۋىنا قاتتى ءمان بەرىلىپ جاتقاندىعىن وقىرماندار قاپەرىنە سالساق دەيمىز. جەرورتا تەڭىزى جاعالاۋىنداعى ءتۋريزمدى دامىتۋ اگەنتتىگىنىڭ باسشىسى وسمان بەي مىرزا وسى جايدى قاداپ ايتتى. ويتكەنى, بۇگىندە جالپى تۇركيانىڭ, ونىڭ ىشىندە, اسىرەسە, انتاليانىڭ دەنساۋلىق ساقتاۋ مەكەمەلەرى الەمدەگى ەڭ وزىق, ەڭ ۇزدىك اپپاراتۋرامەن, مەديتسينالىق قۇرال-جابدىق تەحنيكاسىمەن, سونداي-اق ەمدەۋ تەحنولوگياسىمەن ابدەن جەتە جاراقتانعان. وزدەرىندەگى ىزدەنىمدىك جۇمىس­تارى مول. ءارى مۇنداعى دياگنوس­تيكالىق شارالار جانە ەمدەۋ ەۋروپاداعىعا قاراعاندا ەكى-ءۇش ەسە ارزانعا تۇسەدى, سونىمەن بىرگە ساپالى. انتاليانىڭ ءبىر وزىندە عانا 44 اۋرۋحانا بار. وسى اۋرۋحانالاردان 125 مىڭ شەتەلدىك ەم العان كورىنەدى. سونىڭ 5146-سى ەمدەلگەن, قالعاندارى تەكسەرىلگەن. ءبىز ارالاپ كورگەن اق تەڭىز ۋنيۆەرسيتەتىنىڭ اۋرۋحاناسى, انتاليانىڭ عىلىمي-زەرتتەۋ مەديتسينالىق كەشەنى الەمدە العاش رەت جۇرەك پەن باۋىردى اۋىستىرعان تانىمال مەكەمەلەر. ولاردىڭ الماتىداعى اسفەندياروۆ اتىنداعى مەديتسينا ۋنيۆەرسيتەتىمەن كەلىسىمگە قول قويىپ, تىعىز بايلانىس ورناتۋى دا قۇپتارلىق. سونىمەن قاتار, وسىنداعى وڭ تاجىريبەنى ۇيرەنۋگە قازاقستاننان ونكو­لوگ, ۋرولوگ دارىگەرلەر, ايەل اۋرۋ­لارىنىڭ ماماندارى 10 كۇن, ەكى اپتاعا توپ-توبىمەن كەلىپ جات­قاندىعىن دا جاقسى نىشانعا بالادىق. ءبىر عاجابى, بۇل يگى ءىس, ۇيرەنۋ مۇمكىنشىلىگى تۇرىك تاراپىنان قارجىلاندىرىلىپ تەگىن ۇيىمداستىرىلۋدا. ال جالپى بۇل ۇيرەتۋ, تانىسۋ, قازاقستانمەن ىنتىماقتاستىق ءۇردىسىن اتالمىش اگەنتتىك 3 باعىتتا – دەنساۋلىق ساقتاۋ, تۋريزم جانە اۋىل شارۋا­شىلىعى باعىتتارىندا ىلكىمدى جۇرگىزۋدە. ولاردىڭ الماتى, قا­راعاندى, شىمكەنت سياقتى ءىرى وبلىس, ورتالىقتارىمەن ارىپتەس­تىك بايلانىستى جانداندىرا تۇسكەنى دە قۇلاققا جاعىمدى ەستىلدى. البەتتە, وسىندا 23 ساۋىردەن بەرى ءوتىپ جاتقان, وسى جىلدىڭ 30 قازانىنا دەيىن سوزىلاتىن «گۇلدەر مەن بالالار» اتتى «ەكسپو-2016» تۋرالى ايتپاساق, «انتاليا ساپارى جايىنداعى اڭگىمەمىز تولىق بولماس ەدى. 112 گەكتار جەردى الىپ جاتقان ەكسپو الاڭىن ارالاعاندا ۇلكەن اسەرگە بولەندىك. انتاليا جازيراسىنىڭ وسىمدىكتەر الەمىنىڭ بايلىعىنا ءتانتى بولعاندايمىز. ونىڭ «بولا­شاق ۇرپاقتار ءۇشىن جاسىل ءومىر» سىيلاۋدى مۇرات تۇتقان فيلوسوفياسى ءبىزدىڭ دە جانىمىزعا جاقىن ەكەنىن ۇعىندىق. بۇل دەگەنىڭىز ەكولوگيا مەن ادامزات دامۋىنىڭ ساباقتاس ەكەنىن اڭعارتقانداي. وسىنداعى پاش ەتىلگەن قازاقستان پاۆيلونىن كورىپ جانە مەرەيلەنىپ تۇرمىز. اسىعا كۇتكەن الداعى جىلعى استانا ەكسپو-سىنىڭ دا باستى ۇرانى «بولاشاقتىڭ ەنەرگياسى» دەپ ورنەكتەلىپ, ەكەۋىنىڭ دە ءبىر ىزگى ماقسات كوزدەگەنى ايقىندالا ءتۇستى. انتاليا مەن استانانىڭ ءتۇبى بىرگە تۋىستىعى دا, وي-ارمانىنىڭ ۇقساستىعى دا وسىدان كورىنىس تاپ­قانى قانداي عاجاپ. قورعانبەك امانجول, «ەگەمەن قازاقستان» استانا – ىستانبۇل – انتاليا – استانا