امانبايدىڭ ءۇيى امان قالدى

    قوستاناي-قارابۇتاق تاس جولى وڭىردەگى ەڭ ۇزىن ءارى قوزعالىسى كوپ جول. سوندىقتان مۇندا كۇن دەمەي, ءتۇن دەمەي جول-پاترۋلدىك پوليتسيا قىزمەتكەرلەرى كەزەكشىلىك اتقارادى. قىس ايلارىندا وسى جولدىڭ بويىندا دوڭعالاعى جارىلىپ نەمەسە قارعا كەپتەلىپ قالعان كولىكتەردىڭ جولاۋشىلارىن پوليتسەيلەر تالاي رەت امان الىپ قالىپ ءجۇر. وبلىستاعى جول-پاترۋل پوليتسەيلەرى يۋري جاقىپوۆ پەن ەرمەك جۋانىشباەۆ قازان ايىنىڭ باس كەزىندە تاڭعى ساعات 04.00-دە قوستاناي – قارا­بۇتاق تاس جولىنىڭ تاران اۋدانى ايماعىنا ءوتىپ بارا جاتقان. كەنەت وسى جولدىڭ بويىنان 3 شاقىرىمداي جەردە جاتقان نابەرەجنوە سەلوسىنان شىققان جالىندى بايقاپ قالادى. تاڭ قاراڭعىسىندا وتتىڭ جالىنى جالاڭداپ جاتىر. ەكى پوليتسەي دەرەۋ وت شىعىپ جاتقان ۇيگە جەتىپ كەلدى. مال قورانىڭ ارتىنا جيعان ءشوپ ورتەنىپ جاتىر ەكەن. ەرمەك مال قورانىڭ ەسىگىن بۇزا باستادى, ال يۋري ءۇيدىڭ ەسىگىن قاعىپ, ادامداردى وياتۋعا كىرىستى. قورادا 7-8 سيىر, ونشاقتى قوي, ءبىراز تاۋىق بار ەكەن. جالىن سارايعا يەك ارتا باستاعان. ەرمەك بايلانعان سيىرلاردىڭ باس ءجىبىن تەزدەتىپ شەشىپ, بارلىعىن دالاعا ايداپ شىقتى. ال يۋري ەسىكتى قاتتى-قاتتى ۇرىپ, ودان ءۇي­دى اينالىپ جۇگىرىپ, تەرەزەنى دە قاق­تى. تاڭعى ءتاتتى ۇيقى عوي, ۇيدەگى ادامداردىڭ وياناتىن ءتۇرى جوق. ەكى پوليتسەي دە ايقايدى سالدى, ولاردىڭ داۋسىنان كورشىلەردىڭ اراسىنداعى قۇس ۇيقىلى جاندار ويانىپ كەتىپتى. وسى كەزدە ءۇي يەسى امانباي دا دالاعا اتىپ شىقتى. ۇيقىسىراپ قالعانداي ما, نە بولعانىن تۇسىنبەي اڭ-تاڭ بولىپ تۇر. ودان ايەلى, بالالارى شىقتى, ءورت بولىپ جاتقانىن ەستىسىمەن ازان-قازان بولىپ بالا-شاعاسى شۋلاپ جىلاپ قويا بەردى. بالا-شاعاسىنىڭ ناپاقاسىن ءوزىنىڭ قوراسىنداعى مالىمەن تاۋىپ وتىرعان ەڭبەكقور, وزبەكستاننان كەلگەن ورالمان اعايىن ەكەن. تىرنەكتەپ جيعان مالدىڭ, وزدەرىنىڭ امان قالعانىن ويلاعاندا ءۇي يەلەرىنىڭ دە كوزىنە جاس كەلدى. تاڭعى تىنىشتىق بول­عانىمەن, كۇزدىڭ ەپتەپ ىزعى­رىق جەلى ەسەدى. جەل بولسا ءتىلسىز جاۋدىڭ دا جىنى قوزا تۇسەتىن ادەتى. كەپتىرىلىپ جينالعان ءشوپ لاۋلاعاندا جالىنى اسپانمەن تالاسقانداي بولدى. يۋري بۇل كەزدە تاران اۋدانىنداعى ءورت سوندىرۋشىلەرگە حابارلاسىپ, شاقىرىپ قويدى. بىراق ولار كەلگەنشە كورشىلەر شەلەكپەن سۋ تاسىپ, توپىراق شاشىپ, ايتەۋىر اۋپىرىممەن وتتى اۋىزدىقتاپ العان ەدى. امانبايدىڭ مال قوراسى, وعان ىرگەلەس ءۇيى مەن گاراجى, ماشيناسى – ءبارى وتتان امان قالدى. جارتى ساعات بولماي جەتىپ كەلگەن ءورت سوندىرۋشىلەر وتتى سوڭىنا دەيىن زالالسىزداندىردى. وسى ءورت وقيعاسىنان ءبىر-ەكى كۇننەن كەيىن پوليتسيا ستارشيناسى يۋري جاقىپوۆ پەن سەرجانت ەرمەك جۋانىشباەۆ كەزەكشىلىگىندە نابەرەجنوە سەلوسىنداعى امان­باي سەرىكباەۆتىڭ وتباسىنا ارنايى سوعىپ, حال-جاعدايلارىن بىلە كەتتى. امانباي مەن ايەلى تورە­كۇل جىگىتتەرگە العىسىن جاۋ­دى­رىپ, تاعى دا كوزىن ءبىر شىلاپ الدى. «سەندەر سول ءتۇنى ءبىزدىڭ ۇيگە كەلگەن قىدىر شىعارسىڭدار. ايتپەسە, قىزىل وت تاڭعى ۇيقىدا جاتقان بالا-شاعامىز بەن ءبىزدى دە جالمايتىن ەدى. «مال – جاننىڭ ساداقاسى» دەسەك تە, بالالاردى اسىراپ وتىرعان كۇنكورىسىمىز عوي, ونىڭ اماندىعىنا دا قۋاندىق. وركەندەرىڭ ءوسسىن!» دەدى امانباي. ءورت بولعان ءتۇنى سەرىكباەۆتاردىڭ ۇيىندە وزدەرىنىڭ ءتورت بالاسىن جانە تۋىستارىن قوسقاندا بار­لى­عى 12 ادام بولعان كورىنەدى. ءنازيرا جارىمبەتوۆا, «ەگەمەن قازاقستان»  قوستاناي سۋرەتتە: پوليتسەيلەر وزدەرى ورتتەن قۇتقارعان سەرىكباەۆتار وتباسىمەن بىرگە