ستانيمير ستويلوۆ: «سەلتيكتى» جەڭۋگە بولادى»

بۇگىن فۋتبولدان «استانا» كلۋبىنىڭ باس جاتتىقتىرۋشىسى ستانيمير ستويلوۆ شوتلانديانىڭ «سەلتيك» كومانداسىمەن وتەتىن ويىن جايلى ءوز ويلارىمەن ءبولىستى. كوماندانىڭ باس جاتتىقتىرۋشىسى ەرتەڭگى ماتچقا ويىنشىلاردىڭ دايىن ەكەندىگىن, «سەلتيكپەن» كەزدەسۋدە «استانا» جەڭىسكە جەتۋگە بار كۇشىن سالاتىنىن ايتىپ ءوتتى. سونىمەن بىرگە ول ماتچتىڭ وڭاي بولمايتىنىن, بۇعان دەيىن ليتۆانىڭ «جالگيريس» كلۋبىمەن وتكەن ويىندا كوماندا كوپ كۇش جۇمساعانىن ايتتى. «ءبىز ءۇشىن ەرتەڭگى ويىن ماڭىزدى. ەگەر «استانا» ءبىرىنشى بولىپ دوپ سوقسا, جەڭىسكە جەتۋگە مۇمكىندىگى بولادى. كەزدەسۋدە تاڭات نوسەرباەۆ وينامايدى. ازات نۇرعاليەۆ وينايدى. ءبىز «سەلتيكتىڭ» ويىندارىن قاراپ, زەرتتەدىك. شوتلانديانىڭ كومانداسى بىزگە تاڭسىق ەمەس. بۇل ۇجىمدى جەڭۋگە بولادى», دەدى ول. س.ستويلوۆ «سەلتيكتىڭ» جاقسى وينايتىنىن جەتكىزدى. «شوتلانديانىڭ كلۋبى جاقسى كوماندا. ول كەزدەسۋدىڭ ءفاۆوريتى بولادى»,  دەدى ول. دەگەنمەن, «استانانىڭ» باس جاتتىقتىرۋشىسى جەڭىسكە جەتۋ ءۇشىن كوماندانى نامىسىن قايراپ, الاڭعا تەك جەڭىس ءۇشىن شىعاراتىنىن مالىمدەدى. داستان كەنجالين