ازەرتادج
كەشە ازەربايجاننىڭ بەلارۋستەگى ەلشىلىگىندە گەيدار اليەۆ قورىنىڭ ۆيتسە-پرەزيدەنتى لەيلا اليەۆانىڭ بەلورۋس تىلىندە شىققان ولەڭدەر جيناعىنىڭ تۇساۋكەسەرى بولدى. ەلشىلىكتەن حابارلانعانداي, اتالمىش كىتاپ باسىلىپ شىققانعا دەيىن لەيلا اليەۆانىڭ بەلورۋس تىلىنە اۋدارىلعان جىرلارى رەسپۋبليكاداعى «7 دنەي», «لiتاراتۋرا i ماستاتستۆا» («ليتەراتۋرا ي يسكۋسستۆو»), «كۋلتۋرا», «پولىميا» سياقتى باسىلىمداردا جاريالانعان. ازەربايجان پرەزيدەنتى يلحام اليەۆتىڭ قىزى لەيلا اليەۆانىڭ ولەڭدەرىن ورىس تىلىنەن بەلورۋس تىلىنە بەلورۋستىڭ جاس اقىن قىزى, اۋدارماشى, بەلارۋس جازۋشىلار وداعىنىڭ مۇشەسى تاتيانا سيۆەچ اۋدارعان. وسى اۋدارمادان كەيىن بەلورۋس قاۋىمداستىعى لەيلا اليەۆانىڭ ولەڭدەرىن وقىپ, جاقسى كورىپ كەتكەن. مىنە, وسى قىزىعۋشىلىق ولەڭدەردى جەكە كىتاپ ەتىپ باستىرىپ شىعۋعا سەبەپشى بولعان. ەلشىلىكتە «ليست» دەپ اتالاتىن بۇل كىتاپتى تانىستىرۋعا ارنالعان شاراعا بەلارۋس ديپلوماتيالىق كورپۋسىنا تىركەلگەن مادەنيەت قايراتكەرلەرى, ادەبي قاۋىمداستىق وكىلدەرى, ازەربايجان دياسپوراسىنىڭ بەلسەندىلەرى قاتىستى. ونىڭ بارىسىندا ستۋدەنتتەر كىتاپتاعى ولەڭدەردى جاتقا وقىدى. تۇساۋكەسەردە ءسوز العان ەلشى يسفانديار ۆاگابزادە ازەربايجان مەن بەلارۋس اراسىنداعى گۋمانيتاردىق سالاداعى قارىم-قاتىناس جايىنا توقتالىپ ءوتتى. تالعات رايىمبەك.
