مۋزەي – ەكسپوناتتار قويماسى ەمەس, ۇلتتىق مۇرا

قازاقستانعا ەڭ العاش كەلگەن سانالى شەتەلدىكتەر ساپار بارىسىن مۇمكىندىگىنشە مۋزەيدەن باس­تايدى. قازاق دەگەن قانداي حالىق, شىعۋ تەگى, اتا-بابالارى, مادەنيەتى, سالت-ءداستۇرى, رۋحاني مۇرالارىنىڭ باستاۋلارى... قازاقستان ەكونوميكاسىنا ينۆەستيتسيا سالعىسى كەلگەن شەتەلدىك الپاۋىتقا وسىنىڭ ءبارى كەرەك. سوندىقتان, بىرەۋلەر ويلايتىنداي, مۋزەي – ەكسپوناتتار ساقتايتىن قويما ەمەس, ەلدىڭ بولاشاعىن كور­كەم ەتەتىن ينۆەستيتسيالىق مۇمكىن­دىكتەرگە دە قىزمەت جاسايدى. قازاقستان رەسپۋبليكاسى ۇلت­تىق مۋزەيىنىڭ شىمكەنتتەگى ش.قال­داياقوۆ اتىنداعى وبلىستىق فيلارمونياسىندا وتكەن «ۇلتتىق مۋزەيگە سىي تارتۋ» رەسپۋبليكالىق اكتسياسىندا وسىنداي دا ويلار ايتىلدى. «ۇلتتىق مۋزەيگە سىي تارتۋ» اكتسياسىنا ءشامشى قالداياقوۆ, فاي­زۋللا ءۇرمىزوۆ, گەنەرال اسقا­روۆ, سابىر راقىموۆ, ءاسىلحان وس­پان ۇلى, كەرىمبەك سىزدىقوۆ, بەكزات ساتتارحانوۆ سىندى ۇلتى­مىزدىڭ ءبىرتۋار پەرزەنتتەرىنىڭ ۇرپاقتارى مەن تۋعان-تۋىستارى قاتى­سىپ, ولار قولدانعان زاتتار مەن بۇيىم­داردى تابىس ەتتى. سونىمەن قاتار, وبلىستىڭ نۇرلان شيلىباەۆ, بولاتبەك بەيس­بەكوۆ, كۇلاش ايداربەكوۆا, اينابەك وسپانوۆ, باتۋحان باي­مەنوۆ, ابدۋاحات مۇراتباەۆ, سۇل­تان يلياەۆ, ارايلىم بەيىسبەك, ءمادي­نا احمەتوۆا سەكىلدى تالانتتى ونەر سۋرەتشى-مۇسىنشىلەرىنىڭ شىعار­ماشىلىق جۇمىستارى دا ۇلتتىق مۋزەيگە تابىستالدى. ەلباسىنىڭ تىكەلەي ۇيىتقى بولۋىمەن اشىلعان ۇلتتىق مۋزەي بۇگىندە ەرميتاج, مەتروپوليتەن سياقتى الەمدىك قۇندىلىقتارمەن ۇزەڭگى قاعىسۋعا جاراپ قالدى. جيىندا ءسوز العان ۇلتتىق مۋزەي ديرەكتورى دارحان مىڭباي قازاق تاريحىنا قاتىسى بار ءار جادىگەردىڭ ورنى بولەك ەكەندىگىنە توقتالدى. ماسەلەن, ۇلى كومپوزيتور ءشامشى قالداياقوۆتىڭ پيانينوسى الدەبىر ساياجايدا جاتقانىن ەستىپ, مۋزەيگە الدىرتقان. بۇگىندە رەستاۆراتسيادان ءوتىپ جاتقان سول پيانينودا بالكىم, ءشامشى اعامىز بۇكىل قازاق رۋحىن كوتەرگەن «مەنىڭ قازاقستانىم» ءانۇرا­نىن العاش ورىنداۋى دا مۇمكىن عوي. – وڭتۇستىك – قۇت قونعان جەر, تاريحي تابيعي بولمىسى وزىنە جاراساتىن ەل, – دەپ ءسوزىن ساباقتاعان دارحان قامزابەك ۇلى ۇلتتىق مۇرا­لارىمىزدىڭ قاينار كوزى نەگىزىنەن وسى قۇنارلى توپىراقتا ەكەندىگىنە ارنايى توقتالدى. وسى وڭتۇستىكتىڭ عاجايىپ ۇلدا­رىنىڭ ءبىرى, مەملەكەت قايراتكەرى وزبەكالى جانىبەكوۆتىڭ باستاماسىمەن دۇنيەگە كەلگەن قازاق ۇلت اسپاپتارى مۋزەيىنىڭ الەمدە ءباسى بولەكتىگىنە توقتالدى. تاريحي جادىگەرلەر ول تەك ءبىر وتباسىنىڭ كوز قۋانىشى بولىپ قانا قويماي, تۇتاس ەل تاريحىنا, بولاشاعىنا قىزمەت ەتۋ كەرەك. «ۇلتتىق مۋزەيگە سىي تارتۋ» اكتسياسىنىڭ ءمانىن مىسالدارمەن دايەكتەگەن دارحان مىڭبايدىڭ ءسوزىن ساحناعا شىققان زيالىلار دا قوشتادى. قاسيەتتى وتىرار ولكەسىندە كوزى تىرىسىندە-اق «مۋزەي ادام» اتانعان اسانتاي ءالىموۆ دەگەن اقساقال ءومىر سۇرگەن. سول اعامىزدىڭ سوڭىنا ەرگەن ءىنىسى, بار عۇمىرىن وتىرار جادىگەرلەرىن جيناۋعا جۇمساعان ابدۋللا جۇماشەۆ اعامىز باۋىر­جان مومىش ۇلىنىڭ ساعاتىن, دوسى يسلامقۇلعا جازعان حاتتارى مەن سيرەك قولجازبالارىن ۇلتتىق مۋزەيگە سىيعا تارتتى. ساپار بارىسىندا قازاقستان رەسپۋبليكاسىنىڭ ۇلتتىق مۋزەيى وڭتۇستىك جەرىنەن 300-گە تارتا قۇندى جادىگەر الىپ قايتتى. باقتيار تايجان, «ەگەمەن قازاقستان» وڭتۇستىك قازاقستان وبلىسى