الاش ارىستارىنىڭ افوريزمدەرى

استاناداعى ۇلتتىق اكادەميالىق كىتاپحانادا «امانات» ينتەللەكتۋالدىق پىكىرسايىس كلۋبىنىڭ ۇيىم­داستىرۋىمەن «الاش ايت­قان اسىل ءسوز» اتتى كى­تاپتىڭ بەتاشار ءراسىمى بولدى. قازاقستان تاۋەلسىزدىگىنىڭ – 25, الاشوردا ۇكىمەتىنىڭ 150 جىلدىعىنا ارنالعان ايتۋلى جوبانىڭ اۆتورى, مەملەكەتتىك «دارىن» سىيلىعىنىڭ لاۋرەاتى بەرىك ءۋالي رۋحاني شاراعا جينالعان زيالى قاۋىم وكىلدەرىنە ءوزىنىڭ ريزاشىلىعىن ءبىلدىرىپ, جۋرناليست سەرىك جولداسباي تاريحشى ەركىن ەرلان ۇلى سەكىلدى ۇلتجاندى سەرىكتەرىمەن بىرلەسىپ  اتقارعان ىرگەلى ىستەرىنىڭ بارىسىن بايانداپ بەردى. – الاش قايراتكەرلەرىنىڭ ارتىندا قالعان اسىل سوزدەردى جيناقتاۋدى ارنايى قولعا الدىق. ارينە, ولاردىڭ اۋزىنان شىق­قان اقىل-ناقىلداردىڭ ءبارىن بىردەي كوزىنەن ءتىزىپ, كوگەندەي الماعانىمىز انىق. ايتسە دە قولدا بار قوردى قايتا ءبىر قاراپ, تۇعىرى بيىك تۇلعالارىمىزدىڭ ەلدىك ماسەلەلەردى ەكشەگەن مايەكتى پىكىرلەرىن ۇسىنۋعا تىرىستىق, – دەدى ول وتىرعاندارعا وي تاستاپ. العاشقىلاردىڭ ءبىرى بولىپ ءسوز العان جازۋشى-عالىم تۇرسىن جۇرتباي ءبىزدىڭ كەيبىر اتقامىنەر ازاماتتارىمىز ۇلكەن مىنبەلەردەن سويلەگەندە دايەكسوزدەردى كوبىنەسە شەتەلدىك ساياسات سەركەلەرىنىڭ ەڭبەكتەرىنەن كەلتىرەتىنىن, ال ۇلتتى ۇيىتار ۇلى ويلار كەشەگى الاش كەمەڭگەرلەرىنىڭ شىعارمالارىندا تۇنىپ تۇرعانىن ەستەرىنە الا بە­ر­مەيتىندەرىنە قىنجىلاتىنىن ايتتى. فيلولوگيا عىلىمدارىنىڭ دوكتورى نامازالى وماشەۆ بولسا, ءاليحان بوكەيحان ۇلى, احمەت بايتۇرسىن ۇلى, مىرجاقىپ دۋلات­ ۇلى باستاعان جاقسىلارىمىز بەن جايساڭدارىمىز قولدارىنا قا­لام ۇستاعاندا ەڭ الدىمەن حال­قىنىڭ قاجەتىنە جارار دۇنيەلەردى جازعانىن, سوندىقتان دا ولاردىڭ ايتقاندارى ۋاقىت ۋىتىنا بوي الدىرمايتىنىن  اتاپ ءوتتى. بەلگىلى ءتىل مامانى, پروفەسسور شەرۋباي قۇرمانباي ۇلى ەل-جۇرتىنا جان-جۇرەگىمەن قىزمەت ەتۋدىڭ ۇلگىسىن كورسەتكەن اسىل اعالارىمىزدىڭ افوريزمدەرى وقىرمان ولجاسىنا اينالعانىن جاقسىلىق جورالعىسىنا بالاپ, ونىڭ ەندىگى جەردە ورەلى ورەندە­رىمىزدىڭ ۇستەلۇستى  كىتابى بولاتىنىنان ۇمىتتەنەتىنىن جەتكىزدى. كىتاپقا ۇزىن-ىرعاسى 25 الاش قايراتكەرىنىڭ كۇنى بۇگىنگە دەيىن ءمانىن جويماعان ماقال-ماتەلگە بەرگىسىز ەستى سوزدەرى ەنگىزىلىپتى. ولار­دى وقي وتىرىپ, ءسىز بەن ءبىزدىڭ دە وي-ءورىسىمىز ءبىراز بيىكتەردى شارلاپ قايتارىنا ەش كۇمانىڭىز  بولماسىن. تالعات باتىرحان, «ەگەمەن قازاقستان»