بۇدان جارتى جىلدان استام ۋاقىت بۇرىن, دالىرەگى, 2015 جىلعى 22 جەلتوقسان كۇنى اقش-تا تۇراتىن مارۆا ەسىمدى مۇسىلمان قىز پرەزيدەنتتىككە ۇمىتكەر ميللياردەر دونالد ترامپتىڭ NBC News تەلەارناسى مۇسىلماندارعا قاتىستى بەرگەن سۇحباتىندا جاساعان جانجالدى مالىمدەمەسىنە بايلانىستى وعان ارنايى حات جازىپ, كۇللى الەمدى ءدۇر سىلكىندىرگەن ەدى. حاتتىڭ الەۋمەتتىك جەلىلەردە جاريالانعان ماتىنىنە وراي وعان جۇزدەگەن مىڭ ادام پىكىر قوسىپ, تاقىرىپتى تالقىلاعان بولاتىن.
ارادا ءبىراز ۋاقىت ءوتىپ كەتكەنىمەن, سول حات ءالى ءوزىنىڭ ءمانى مەن مازمۇنىن جويعان جوق. ال سودان بەرى ءبىرشاما تىنشىپ قالعان دونالد قايتادان باياعى انىنە باسا باستادى. ءبىز وسى حاتتىڭ سول كەزدە ras.kz سايتىندا جاريالانعان نۇسقاسىن كوشىرىپ جاريالاعاندى ءجون كوردىك.
پرەزيدەنتتىكتە ءۇمىتى بار ادام قۇراما شتاتتاردا تۇراتىن مۇسىلماندار جونىندە مالىمەتتەر بازاسى, سونداي-اق ولاردى «قاداعالاپ وتىراتىن باسقا دا جۇيەلەر بولۋى كەرەك» ەكەنىن ءسوز ەتكەن.
باسىلىم حابارلاعانداي, ميللياردەردىڭ مالىمدەمەسى مۇسىلماندار قاۋىمىن قاتتى اشىندىرىپ جىبەرگەن. ولاي بولماعاندا شە, ترامپ مۇسىلمانداردى ارنايى كارتامەن, وزدەرىنىڭ كىم ەكەنىن جانە قاي ءدىندى ۇستاناتىنىن كورسەتەتىن كۋالىكپەن جۇرۋلەرى كەرەك دەپ ەسەپتەيدى. مۇنىڭ ءوزى اقش مۇسىلماندارىنىڭ ەلدەگى ەكىنشى سۇرىپتى ادامدار بولىپ قالعاندارىن ايعاقتار ەدى. وسىنى بايقاعان مۇسىلمان قاۋىمى بىردەن ۇمىتكەرگە قارسى شىقتى. سولاردىڭ اراسىندا ءبىر جاس مۇسىلمان قىزىنىڭ پوستى ترامپقا قايتارعان جاۋاپتاردىڭ ەڭ ۇزدىگى بولىپ ەسەپتەلىپ وتىر.
مارۆا ءوز حاتىندا بىلاي دەيدى:
«قۇرمەتتى @realdonaldtrump. مەنىڭ اتىم – مارۆا, مەن دە مۇسىلمانمىن. مەن ءسىز بىزگە ID-بەلگىسىن تاعىپ قويماقشى بولىپ جاتىر دەپ ەستىدىم. سول سەبەپتى مەن ولاردىڭ ءبىرىن وزىمە تاڭداپ الماقشىمىن. ال ءسىز ماعان قاراپ, مۇسىلمان ەكەنىمدى وپ-وڭاي بىلە قويماسسىز, سوندىقتان مەن ءوزىمنىڭ مۇسىلمان ەكەنىمدى بايقاتاتىن توسبەلگىنى ماقتانىشپەن تاعىپ العان بولار ەدىم. مەن بەيبىتشىلىك بەلگىسىن تاڭدادىم, سەبەبى, مەنىڭ يسلامىمنىڭ ءوزى تاپ وسى ۇعىمدى بىلدىرەدى.
مەنى ادىلەتسىزدىككە قارسى شىعىپ, بىرلىككە ۇمتىلۋعا ۇيرەتكەن يسلام. جازىقسىز ءبىر ادامدى ءولتىرۋدىڭ بۇكىل ادامزات بالاسىن ولتىرگەنمەن بىردەي بولىپ تابىلاتىنىن ۇيرەتكەن يسلام. ءسىز ءبىزدى قاداعالاپ تۇرادى دەپ ەستىدىم. تاماشا! ءسىز ەندى مەنىمەن بىرگە جەرگىلىكتى مەكتەپتەگى Cancer Awareness ۇيىمىنا نەمەسە مەنىڭ باقىت جاساۋعا ارنالعان جۇمىس ورنىما كەلە الاسىز. ءسىزدىڭ سونداي-اق مەنىڭ جەرگىلىكتى مەشىتىمە بارىپ, وندا ءۇي-جايسىز جۇرگەندەرگە قالاي سەندۆيچتەر مەن بۋتەربرودتار, اۋقات ىشكىسى كەلەتىندەردىڭ بارىنە تەگىن اس دايىندالىپ جاتقانىن كورۋگە دە مۇمكىندىگىڭىز بار. سول كەزدە ءسىز مەنىڭ مۇسىلمان بولا وتىرىپ, سىزدەن ءبىر دە كەم ەمەس امەريكالىق ەكەنىمدى كورەسىز. بالكىم, ءسىز مەنىڭ ىزىممەن جۇرە بەرسەڭىز, مەنىڭ وزىڭىزدەن ەشبىر تومەن ادام ەمەس ەكەنىمدى دە كورەرسىز. سالامۋ الەيكۋم (سىزگە بەيبىتشىلىك تىلەيمىن)».
حات بار-جوعى ەكى كۇننىڭ ىشىندە 80 مىڭ شەير جيناعان. ال كەيىنىرەك 5 ميلليوننان استام ادام وقىپ شىققان.
تالعات رايىمبەك.
