اريستوتەلدىڭ قابىرى گرەكيا جەرىنەن تابىلدى

مالىمەتتەر بويىنشا, زيرات حالكيديكي تۇبەگىندەگى كونە قا­لا ستاگير اۋماعىندا جاتقان كو­رىنەدى. ايگىلى فيلوسوفتىڭ جات­قان جەرىن العاش بولىپ كوس­تاس سيسمانيديس ەسىمدى گرەك ارحەو­لوگى انىقتاعان. بۇل تۋرالى ول «اريستوتەل – 2400» اتتى كونفەرەنتسيادا مالىمدەدى. قازبا جۇمىستارى 1996 جىلى باستالعان. سودان كۇنى بۇگىنگە دەيىن تابىلعان جادىگەرلەر اريستوتەلگە تيەسىلى بولۋى مۇمكىن دەگەن بولجام عانا جاسالىپ كەلگەن. ال كوستاس سيسمانيديس جيىن بارىسىندا قابىردىڭ گرەك فيلوسوفىنا تيەسىلى ەكەنىن دالەلدەيتىن ايعاقتار تاپقانىن ايتتى. – ءبىز اريستوتەلدىڭ قابىرىن انىقتادىق. سونىمەن قاتار, قاز­با جۇمىستارى كەزىندە كونە دە­رەككوزدەردە ايتىلاتىن قابىر مەن قۇربان شالاتىن ورىندى (التار) جانە ادامدار جينالاتىن ورىنعا جاقىن جەردە جاتقان تابىتقا اپاراتىن جولدى تاپتىق», – دەدى كوستاس سيسمانديس. ونىڭ ايتۋىنشا, زيرات ستاگير قالاسىنىڭ سولتۇستىگىندەگى بيىكتەۋ جوتانىڭ قاسىندا ورنالاسقان. ايتپاقشى, اريستوتەل ءبىزدىڭ داۋىرىمىزگە دەيىنگى 384 جىلى ءدال وسى قالادا دۇنيەگە كەلگەن. تاريحتا ول پلاتوننىڭ شاكىرتى, ەسكەندىر زۇلقارنايىننىڭ اقىلشىسى «ءبىرىنشى ۇستاز» دەگەن اتپەن قالعان. فورمالدى لوگيكانىڭ نەگىزىن قالاۋشى, فيلوسوفيانىڭ جان-جاقتى جۇيەسىن قالىپتاستىرۋشى ءارى ءوز زامانىنىڭ دارا دانىشپانى بولعان. ايان ءابدۋالي, «ەگەمەن قازاقستان»