تورعاي تىلسىمى

جاپوندىق تەلەكومپانيا قازاق جەرىندە وسى قۇپياعا دەن قويدى جاپونيانىڭ Fuji Television تەلەكومپانياسى «Mystery All the world» «الەمنىڭ بار شالعايى­نىڭ قۇپيالارى» اتتى تانىمال باعدارلاماسى ءۇشىن تورعاي گەوگليفتەرى تۋرالى فيلم ءتۇسىر­دى. كۇنشىعىس ەلىنىڭ بەلگىلى تەلەكومپانياسىنىڭ وكىلدەرىن تورعاي دالاسىنا «تورعاي شارشىسىن» العاش بايقاعان, Turgay Discovery جوباسىنىڭ جەتەكشىسى دميتري دەي ءوز ەكسپەديتسياسى قۇرامىندا الىپ باردى. «تورعاي دالاسىنداعى ارحەولو­گيالىق قۇبىلىسقا جاپون تەلەۆي­زياسىنىڭ قىزىعۋشىلىعى ارقا­سىندا قازاقستاننىڭ تاريحي ەسكەرت­كىشتەرى مەن مادەنيەتىن حالىق­ارالىق مەديا كەڭىستىكتە ناسي­حاتتاۋ مەن كەڭىنەن تاراتۋ ءۇشىن ەكى كۇندىك ساپارىمىزدى ۇيىمداستىرىپ, جۇزەگە اسىرۋدىڭ ءساتى ءتۇستى. ەكسپەديتسيا قۇرامىندا جاپون تەلەكومپانياسىنىڭ تەلەوپەراتورى ءارى رەپورتەرى كاكينۋما سان, Turgay Discovery جوباسىنىڭ جەتەكشىسى ءوزىم, جوبانىڭ زەرتتەۋ­شىسى سەرگەي كوزين بار», – دەپ جازدى دميتري دەي الەۋمەتتىك جەلىدەگى پاراقشاسىندا. جاپونيانىڭ Fuji Television تەلەكومپانياسى تۇسىرگەن قازاق­ستاندىق گەوگليفتەر تۋرالى ماتەريال «Mystery All the world» باعدارلاماسىندا 2016 جىلدىڭ ماۋسىم ايىندا كورسەتىلەدى. توپىراق ۇيىندىلەرىنەن تۇ­را­تىن گەومەتريالىق بەدەرلەر جوعارىدان تۇسىرگەندە عانا انىق كورىنەدى. بۇگىندە قوستاناي وبلىسىنىڭ وڭتۇستىگىندەگى تورعاي دالاسىنان كرەست, سۆاستيكا, شەڭبەر ۇلگىسىندەگى جۇزدەگەن گەوگليفتەر تابىلىپ وتىر. ءبىر قىزىعى, ولاردىڭ بارلىعى دا ءبىر-بىرىنەن الىس ەمەس, ءبىر اۋماقتا – تورعاي يىنىندە جاتىر. قازاقستاندىق جانە شەتەلدىك ازۋىن ايعا بىلە­گەن عالىمداردىڭ بارلىعى دا تورعايدان تابىلعان گەوگليفتەردى ەجەلگى مادەنيەتپەن بايلانىستىرادى جانە ولاردى مىسىر پيراميدالارى, وڭتۇستىك جانە ور­تالىق امەريكاداعى ءمىناجات نىساندارى مەن بريتانيالىق ستوۋن­حەندج سەكىلدى الەمدىك برەندتەر قاتارىنا جاتقىزادى. دميتري دەيدىڭ پىكىرىنشە, قازاق­ستاندىق گەوگليفتەرگە ءازىر­شە شەتەلدىك عالىمدار كوبىرەك قىزىعۋشىلىق تانىتىپ وتىر. امەريكالىق ناسا عارىش اگەنت­تىگى تورعاي گەوگليفتەرىن كوبەيتىپ تاراتتى. «قازعارىش» مۇنان كەيىن قايتا ءتۇسىردى. تۇركيادا 2014 جى­لى وتكەن ەۋروپا ارحەولوگتارى قاۋىم­داستىعىنىڭ فورۋمىندا تورعايدا تابىلعان بۇل ولجالار سەنساتسيا رەتىندە باعالاندى. ءنازيرا جارىمبەتوۆا, «ەگەمەن قازاقستان» قوستاناي وبلىسى