جوعارى وكىلدەردىڭ حالىقارالىق كەزدەسۋى

23-24 مامىردا پرەزيدەنتتىڭ كومەكشىسى – قازاقستان رەسپۋبليكاسى قاۋىپسىزدىك كەڭەسىنىڭ حاتشىسى نۇرلان ەرمەكباەۆ قاۋىپسىزدىك ماسەلەلەرىمەن اينالىساتىن جوعارى وكىلدەردىڭ VII حالىقارالىق كەزدەسۋىنە قاتىستى. اتالعان شارا رەسەي قاۋىپسىزدىك كەڭەسى­نىڭ باستاماسى بويىنشا چەشەنستان رەسپۋب­لي­كا­سىنىڭ استاناسى – گروزنىي قالاسىندا شامامەن 80 مەملەكەت جانە حالىقارالىق ۇيىمدار وكىلدەرىنىڭ قاتىسۋىمەن وتكىزىلدى. كەزدەسۋدىڭ كۇن تارتىبىنە حالىقارالىق تەرروريزم مەن ءدىني ەكسترەميزم, زاڭسىز كوشى-قون ارەكەتتەرىنە قارسى ءىس-قيمىل بو­يىن­شا حالىقارالىق ىنتىماقتاستىقتى دامىتۋ, سونداي-اق, اقپاراتتىق قاۋىپسىزدىكتى قامتاماسىز ەتۋ جونىندەگى حالىقارالىق جانە ۇلتتىق دەڭگەيلەردە قابىلدانىپ جاتقان شارالار ماسەلەلەرى ەنگىزىلدى. قازاقستان دەلەگاتسياسى باسشىسىنىڭ سوزىندە نەگىزگى ەكپىن قازاقستان باسشىسىنىڭ 2015 جىلعى قىركۇيەكتە وتكەن بۇۇ سامميتىندەگى زورلىق ەكسترەميزمگە قارسى ءىس-قيمىل تانىتۋ بويىنشا باستامالارىن حالىقارالىق ىلگەرىلەتۋدىڭ ماڭىزىنا ءتۇسىرىلدى. باق-تارعا تەرروريزم مەن ەكسترەميزم تاقىرىبىن كورسەتۋدە سالماقتىلىق قاجەت ەكەنى اتاپ كورسەتىلدى. گروزنىيدا بولۋى كەزىندە ن.ەرمەكباەۆ چەشەنستان رەسپۋبليكاسى باسشىسىنىڭ مىندەتىن اتقارۋشى رامزان قادىروۆپەن, رەسەي فەدەراتسياسى قاۋىپسىزدىك كەڭەسىنىڭ حاتشىسى نيكولاي پاترۋشەۆپەن كەزدەسىپ, كەلىسسوزدەر جۇرگىزدى. سونداي-اق, شاراعا قاتىسقان مەملەكەتتەر دەلەگاتسيالارىنىڭ باسشىلارىمەن, سونىڭ ىشىندە, قحر كومپارتياسى وك-ءنىڭ ساياسي بيۋرو مۇشەسى – ساياسي-زاڭدىلىق كوميسسياسى­نىڭ حاتشىسى مەن تسزيانچجۋمەن, اۋعانستان يسلام رەسپۋبليكاسى پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى – اير ۇلتتىق قاۋىپسىزدىك كەڭەسىنىڭ باسشىسى موحامماد حانيف اتمارمەن, ت.ب. بىرقاتار جۇمىس كەزدەسۋلەرى وتكىزىلدى.  «ەگەمەن-اقپارات»