ءماجىلىستىڭ كوشپەلى وتىرىسى

ەل ەكونوميكاسىن دامىتۋدى قامتاماسىز ەتۋدىڭ نەگىزى – ءتيىمدى كولىك-لوگيستيكا ينفراقۇرىلىمىن قۇرۋ

 ماجىلىستىڭ ەكونوميكالىق رەفورما جانە وڭىرلىك دامۋ كوميتەتى ەلىمىزدىڭ ينۆەستيتسيالار جانە دامۋ مينيسترلىگىندە كوشپەلى وتىرىس وتكىزدى. وتىرىسقا اتالعان كوميتەت توراعاسى رومان سكليار جەتەكشىلىك ەتتى, دەپ حابارلادى ءماجىلىستىڭ ءباسپاسوز قىزمەتى. وندا قازاقستان ەكونوميكاسىنىڭ ورنىقتى دامۋىن قامتاماسىز ەتۋدىڭ نەگىزگى باعىتى رەتىندە ءتيىمدى كولىك-لوگيستيكا ينفراقۇرىلىمىن قۇرۋ ماسەلەسى اڭگىمە وزەگىنە اينالدى. ايتا كەتەيىك, «100 ناقتى قادام» ۇلت جوسپارىندا قازاقستاننىڭ ينفراقۇرىلىمىن دامىتۋدا ەڭ الدىمەن كولىك-لوگيستيكا سالاسىن جولعا قويۋعا ايرىقشا نازار اۋدارىلعان. تالقىلاناتىن تاقىرىپتىڭ ماڭىزدىلىعىن نەگىزگە العان پارلامەنت ءماجىلىسى توراعاسىنىڭ ورىنباسارى ۆلاديمير بوجكو كوشپەلى وتىرىسقا ءوزى قاتىسىپ, وزەكتى ماسەلەلەردى قوزعادى. ول «100 ناقتى قادام» ۇلت جوسپارىن زاڭنامالىق قولداۋ تۇرعىسىنان اتقارىلعان جۇمىستاردى ءسوز ەتە كەلىپ, جول-كولىك ينفراقۇرىلىمىن دامىتۋ, كولىكتىك لوگيستيكا جانە اۋە تاسىمالىنا قاتىستى قابىلدانعان زاڭداردىڭ باسىمدىقتارىنا توقتالدى. سونداي-اق, ۆ.بوجكو اعىمداعى جىلدىڭ قاڭتارىنان باس­تاپ كاسىپكەرلىك قىزمەت پەن ىسكەرلىك بەلسەندىلىكتى ارتتىرۋ, ايماقتاردىڭ ەكونوميكالىق ءوسىمىن ىنتالاندىرۋ, ەڭبەكپەن قامتۋ, سونىڭ ىشىندە, كولىك جانە لوگيستيكا سالاسىن نىعايتۋعا ارنالعان زاڭدىق قۇجاتتاردى ايتا كەلىپ: «بۇل زاڭنامالىق نورمالاردىڭ بارلىعى كولىك سالاسىنداعى جوبالاردى جۇزەگە اسىرۋعا وتاندىق وندىرۋشىلەر مەن تۇرعىنداردى كەڭىنەن تارتۋعا جول اشادى. «نۇرلى جول» باعدارلاماسىندا اتاپ كورسەتىلگەندەي, كولىك-لوگيستيكا ينفراقۇرىلىمى ەلىمىز وڭىرلەرى اراسىنداعى ەكونوميكالىق بايلانىستاردى جۇزەگە اسىرۋدا, سونداي-اق, قازاقستاندىق تاۋاردى الەمدىك نارىققا ەكسپورتتاۋدا نەگىزگى جەتەكشى قۇرال بولۋ كەرەك», دەدى. ودان ءارى ينۆەستيتسيالار جانە دامۋ ءبىرىنشى ۆيتسە-ءمينيسترى جەڭىس قاسىمبەك بايانداما جاساپ, وسى سالادا اتقارىلعان جۇمىستار مەن العا قويىلعان ماقساتتار جايىندا اڭگىمەلەدى. تالقىلاۋ بارىسىندا ەكونوميكالىق رەفورما جانە وڭىرلىك دامۋ كوميتەتى مۇشەلەرى ەلىمىز وڭىرلەرىندەگى جولداردىڭ ادام توزگىسىز جاعدايىنا قاتىستى ارنايى ازىرلەنگەن بەينەتاسپانى كورسەتە وتىرىپ, مينيسترلىك وكىلدەرىنەن ناقتى جاۋاپ الدى. شاراعا ءماجىلىس دەپۋتاتتارىمەن قاتار, ينۆەستيتسيالار جانە دامۋ, ۇلتتىق ەكونوميكا, قارجى مينيسترلىكتەرىنىڭ, «سامۇرىق-قازىنا», «قازاقستان تەمىر جولى», «اتامەكەن» ۇلتتىق كاسىپكەرلەر پالاتاسىنىڭ وكىلدەرى قاتىستى.