قوستاناي. 28 ءساۋىر. قوستانايداعى «كازگيدرومەت» ورتالىعى وبلىستىق فيليالىنىڭ ماماندارى الداعى تاۋلىكتەردە وڭىرىندە قار ارالاس جاڭبىر جاۋاتىنىن بولجاپ وتىر. بۇل تۋرالى egemen.kz ءتىلشىسى حابارلادى.
سينوپتيكتەر قوستاناي وبلىسىندا الداعى ءۇش تاۋلىك ىشىندە 3 گرادۋسقا دەيىن كۇن سۋىتىپ, 28-29 ءساۋىر كۇندەرى قار ارالاس جاڭبىر جاۋاتىنىن ايتتى.
«كازگيدرومەت» كاسىپورنى وبلىستىق فيليالىنىڭ ينجەنەر-سينوپتيگى ۆالەنتينا زاگرەبينا: «وبلىس وڭىرىندە 27 ءساۋىردىڭ تۇنىندە 3 گرادۋسقا دەيىن سۋىق بولعان ەدى. اۋا رايىنىڭ وسى مىنەزى الداعى تاۋلىكتە دە وزگەرمەيدى. تۇندە 3 گرادۋس سۋىق بولادى دا, كۇندىز 3-8 گرادۋسقا دەيىن جىليدى. قار ارالاس جاڭبىر كۇتىپ وتىرمىز», – دەدى.
ماماننىڭ ايتۋىنشا, 30 ءساۋىر مەن 1 مامىر كۇندەرى كۇن جىلي تۇسەدى, تۇندە سىناپ باعاناسى 0-دەن 5 گرادۋسقا دەيىن كوتەرىلسە, كۇندىز 17, كەي جەرلەردە 23 گرادۋسقا دەيىن بارادى.
ءنازيرا جارىمبەتوۆا.
دەرەك, فوتو: egemen.kz.